Eseciel 4 - Am Bìoball Gàidhlig 1992

¹ Thusa mar an ceudna, a mhic an duine, gabh thugad leac-shuaine, agus cuir fad chomhair i, agus tarraing oirre am baile, Ierusalem:

² Agus cuartaich e le feachd, agus tog na aghaidh daingneach, agus tilg suas tòrr na aghaidh; suidhich fòs camp na aghaidh, agus cuir reitheachan-cogaidh na aghaidh air gach taobh mun cuairt.

³ A thuilleadh air seo, gabh thugad aghann iarainn, agus suidhich e mar bhalla iarainn, eadar thu agus am baile, agus cuir do ghnùis na aghaidh, agus bidh e air a theannachadh, agus cuiridh tu camp na aghaidh: bidh seo na chomharradh do thaigh Israeil.

⁴ Laigh thusa fòs air do thaobh clì, agus leig euceart taigh Israeil air: a rèir àireamh nan làithean a laigheas tu air, giùlainidh tu an euceart.

⁵ Oir leag mise ortsa bliadhnachan an euceartan, a rèir àireamh nan làithean, trì cheud, deich agus ceithir-fichead là: mar sin giùlainidh tu euceart taigh Israeil.

⁶ Agus nuair a choileanas tu iad, laigh a‑rìs air do thaobh deas, agus giùlainidh tu euceart taigh Iùdah dà‑fhichead là: dh’òrdaich mise dhut là airson bliadhna.

⁷ Uime sin cuiridh tu d’aghaidh ri sèisdeadh Ierusaleim, agus bidh do ghàirdean air a rùsgadh, agus nì thu fàistneachd na h‑aghaidh.

⁸ Agus, feuch, cuiridh mise cuibhrichean ort, agus cha tionndaidh thu thu fhèin on aon taobh gus an taobh eile, gus an crìochnaich thu làithean do shèisdidh.

⁹ Gabh thugad fòs cruithneachd, agus eòrna, agus pònair, agus peasair, agus meanbh-pheasair, agus peasair fhiadhain, agus cuir iad ann an aon soitheach, agus dèan dhut fhèin aran dhiubh, a rèir àireamh nan làithean a laigheas tu air do thaobh; trì cheud, ceithir-fichead agus deich làithean ithidh tu dheth.

¹⁰ Agus bidh am biadh a dh’itheas tu air a chothromachadh, fichead secel anns an là: o àm gu àm ithidh tu e.

¹¹ Olaidh tu mar an ceudna uisge le tomhas; an siathamh cuid de hin: o àm gu àm òlaidh tu.

¹² Agus ithidh tu e mar aran eòrna, agus le aolach a thig a‑mach à duine deasaichidh tu e nan sealladh.

¹³ Agus thubhairt an Tighearna, Eadhon mar seo ithidh clann Israeil an aran truaillte am measg nan cinneach, gus an iomain mise iad.

¹⁴ An sin thubhairt mise, Ah a Thighearna Dhia! Feuch, cha do thruailleadh m’anam-sa: oir om òige a‑nìos gus a‑nis cha d’ith mi dheth sin a bhàsaicheas leis fhèin, no a bha na chonablach; cha mhò a thàinig feòil ghràineil ann am bheul.

¹⁵ An sin thubhairt e rium, Feuch, thug mi dhut buachar bhò an àite aolach duine, agus deasaichidh tu d’aran leis.

¹⁶ Os bàrr thubhairt e rium, A mhic an duine, feuch, brisidh mise lorg an arain ann an Ierusalem; agus ithidh iad aran air thomhas agus le cùram; agus òlaidh iad uisge le tomhas agus le uamhas.

¹⁷ A‑chum gum bi uireasbhaidh arain agus uisge orra, agus gum bi uamhas orra gach aon ri chèile, agus gun leagh iad air falbh airson an euceirt.