Eseciel 3 - Am Bìoball Gàidhlig 1992

¹ Os bàrr thubhairt e rium, A mhic an duine, ith an nì a gheibh thu; ith an ròla seo, agus falbh, labhair ri taigh Israeil.

² Mar sin dh’fhosgail mi mo bheul, agus thug e orm an ròla sin ithe.

³ Agus thubhairt e rium, A mhic an duine, thoir air do bhroinn ithe, agus lìon do chom leis an ròla seo a bheir mi dhut. An sin dh’ith mi, agus bha e ann am bheul mar mhil air mhìlsead.

⁴ Agus thubhairt e rium, A mhic an duine, falbh, imich gu taigh Israeil, agus labhair lem bhriathran-sa riu.

⁵ Oir chan eil thu air do chur gu sluagh aig a bheil teanga choimheach, agus cainnt chruaidh, ach gu taigh Israeil.

⁶ Chan ann gu mòran shluagh, aig a bheil teanga choimheach, agus cainnt chruaidh, nach urrainn thu am briathran a thuigsinn: gu cinnteach nan cuirinn dan ionnsaigh-san thu, dh’èisdeadh iad riut.

⁷ Ach chan èisd taigh Israeil riut, oir chan èisd iad riumsa; oir tha taigh Israeil uile mì‑nàireach agus cruaidh-chridheach.

⁸ Feuch, rinn mi do ghnùis làidir an aghaidh an gnùise-san, agus d’aodann làidir an aghaidh an aodainn-san.

⁹ Mar adamant, nas cruaidhe na clach theine, rinn mise d’aodann: na biodh eagal ort romhpa, agus na biodh sgàth ort ron gnùis, ged tha iad nan taigh ceannairceach.

¹⁰ Os bàrr, thubhairt e rium, A mhic an duine, gabh ann ad chridhe m’uile bhriathran-sa a labhras mi riut, agus èisd led chluasan.

¹¹ Agus falbh, imich a dh’ionnsaigh na muinntir a tha ann am bruid, gu cloinn do shluaigh, agus labhair riu, agus innis dhaibh, Mar seo tha an Tighearna Dia ag ràdh, co aca a dh’èisdeas iad no nach èisd.

¹² An sin thog an spiorad suas mi, agus chuala mi air mo dhèidh guth tormain mhòir, ag ràdh, Beannaichte gu robh glòir an Tighearna o a àite fhèin.

¹³ Chuala mi fòs fuaim sgiathan nam beò-chreutairean a bhean ri chèile, agus fuaim nan roth thall mun coinneamh, agus fuaim luasgaidh mhòir.

¹⁴ An sin thog an spiorad suas mi, agus thug e leis mi, agus dh’imich mi ann an searbhadas, ann an teas mo spioraid, ach bha làmh an Tighearna treun orm.

¹⁵ An sin thàinig mi a‑chum na muinntir a bha nam braighdean aig Tel-abib, a bha a chòmhnaidh làimh ri abhainn Chebair, agus shuidh mi far an do shuidh iadsan, agus dh’fhan mi an sin seachd làithean làn uamhais nam meadhon.

¹⁶ Agus thàrladh an ceann seachd làithean gun tàinig facal an Tighearna am ionnsaigh, ag ràdh,

¹⁷ A mhic an duine, rinn mise fear-faire dhìot do thaigh Israeil: uime sin, èisd am facal om bheul, agus thoir rabhadh dhaibh uamsa.

¹⁸ Nuair a their mise ris an aingidh, Gheibh thu gu cinnteach bàs; agus nach toir thusa rabhadh dha, agus nach labhair thu a thoirt rabhaidh don chiontach o a dhroch shlighe, a‑chum a anam a thèarnadh; bàsaichidh an droch dhuine sin na aingidheachd, ach iarraidh mise a fhuil air do làimh-sa.

¹⁹ Gidheadh ma bheir thu rabhadh don aingidh, agus nach till e o a aingidheachd, no o a dhroch shlighe, bàsaichidh esan na aingidheachd; ach shaor thusa d’anam fhèin.

²⁰ A‑rìs, nuair a thilleas fìrean o a fhìreantachd, agus a chuireas e an gnìomh peacadh, agus a chuireas mise ceap-tuislidh fa a chomhair, gheibh e bàs; a chionn nach tug thusa dha rabhadh, na pheacadh gheibh e bàs, agus cha chuimhnichear a fhìreantachd a rinn e; ach iarraidh mise a fhuil air do làimh-sa.

²¹ Gidheadh ma bheir thu rabhadh don fhìrean, air chor is nach ciontaich am fìrean, agus nach dèan e peacadh, mairidh e gu cinnteach beò, do bhrìgh gun d’fhuair e rabhadh; mar an ceudna shaor thusa d’anam fhèin.

²² Agus bha làmh an Tighearna orm an sin, agus thubhairt e rium, Eirich, siubhail a‑mach don chòmhnard, agus an sin labhraidh mise riut.

²³ An sin dh’èirich mi, agus chaidh mi a‑mach a‑chum a’ chòmhnaird, agus, feuch, sheas glòir an Tighearna anns an àite sin, mar a’ ghlòir a chunnaic mi aig abhainn Chebair; agus thuit mi air m’aghaidh.

²⁴ An sin chaidh an spiorad annam, agus chuir e air mo chasan mi, agus labhair e rium, agus thubhairt e rium, Falbh, druid thu fhèin a‑staigh ann ad thaigh.

²⁵ Ach thusa, O mhic an duine, feuch, cuiridh iad boinn ort, agus ceanglaidh iad thu leo, agus cha tèid thu a‑mach nam measg.

²⁶ Agus bheir mise air do theangaidh leantainn rid ghiall, air chor is gum bi thu balbh, agus nach bi thu dhaibh ad fhear-cronachaidh; oir tha iad nan taigh ceannairceach.

²⁷ Ach nuair a labhras mise riut, fosglaidh mi do bheul, agus their thu riu, Mar seo tha an Tighearna Dia ag ràdh, Esan a dh’èisdeas, èisdeadh e: agus esan a dhearmadas, dearmadadh e; oir tha iad nan taigh ceannairceach.