Eseciel 1 - Am Bìoball Gàidhlig 1992

¹ Agus thàrladh, anns an deicheamh-bliadhna-fichead, anns a’ cheathramh mìos, air a’ chòigeamh là den mhìos, air dhòmhsa a bhith am measg nam braighdean aig abhainn Chebair, gun d’fhosgladh na nèamhan, agus chunnaic mi taisbeanaidhean Dhè.

² Air a’ chòigeamh là den mhìos (b’i sin an còigeamh bliadhna de bhruid rìgh Iehoiacin),

³ Thàinig facal an Tighearna gu Eseciel an sagart, mac Bhusi, ann an tìr nan Caldèanach, aig uisge Chebair; agus bha làmh an Tighearna air anns an àite sin.

⁴ Agus dh’amhairc mi, agus, feuch, ghiùlain iomaghaoth on àird a tuath neul mòr a bha air a chuartachadh le fillidhean teine, agus dealradh air gach taobh dheth; agus na mheadhon bha amhail dreach òmair, eadhon ann am meadhon an teine.

⁵ Agus a‑mach as a mheadhon mar an ceudna thàinig coslas ceithir bheò-chreutairean, agus b’e seo an aogas: bha iad ann am meudachd duine.

⁶ Agus bha ceithir aghaidhean aig gach aon dhiubh, agus ceithir sgiathan aig gach aon dhiubh.

⁷ Agus bha an casan dìreach; agus bha bonn an cas mar bhonn cas laoigh, agus loinnrich iad mar dhath pràise lìomhte.

⁸ Agus bha làmhan duine fo an sgiathan, air an ceithir taobhan; agus bha aig a’ cheithir an aghaidhean agus an sgiathan.

⁹ Bha an sgiathan dlùthaichte, gach aon ri chèile; cha do thionndaidh iad nuair a ghluais iad; chaidh iad air an aghaidh, gach aon dìreach roimhe.

¹⁰ Airson coslas an aghaidhean, bha aca nan ceathrar aghaidh duine, agus aghaidh leòmhainn air an taobh deas; agus bha aca nan ceathrar aghaidh daimh air an làmh chlì: bha fòs aca nan ceathrar aghaidh iolaire.

¹¹ B’amhail seo an aghaidhean: agus an sgiathan sgaoilte gu h‑àrd; dithis aig gach aon, dlùthaichte ri chèile, agus dithis a’ falach an cuirp.

¹² Agus dh’imich iad, gach aon dìreach air aghaidh: far an robh an spiorad air tì dol, dh’imich iad: cha do thionndaidh iad nuair a dh’imich iad.

¹³ A‑thaobh coslas nam beò-chreutairean bha an aogas mar èibhlean dearga teine, cosmhail ri lòchran, a chaidh air ais agus air aghaidh am measg nam beò-chreutairean: agus bha an teine dealrach; agus as an teine thàinig a‑mach dealanach.

¹⁴ Agus ruith na beò-chreutairean, agus thill iad, mar phlath dealanaich.

¹⁵ A‑nis am feadh a bha mi a’ sealltainn air na beò-chreutairean, feuch, aon roth air an talamh, làimh ris na beò-chreutairean, aig an ceithir aghaidhean.

¹⁶ Bha dreach nan rothan agus an obair mar dhreach criostail; agus bha an aon choslas aig a’ cheithir, agus bha an aogas agus an obair mar gum biodh ann roth ann am meadhon rotha.

¹⁷ Nan imeachd dh’imich iad air an ceithir taobhan: cha do thionndaidh iad nuair a dh’imich iad.

¹⁸ A‑thaobh an cearcal, bha iad cho àrd is gum b’uamhasach iad; agus bha an cearcail làn de shùilean mun cuairt dhaibh nan ceathrar.

¹⁹ Agus nuair a ghluais na beò-chreutairean, ghluais na rothan làimh riu: agus nuair a thogadh na beò-chreutairean suas on talamh, thogadh na rothan.

²⁰ Càit air bith a bha an spiorad air tì dol, dh’imich iadsan an taobh a bha an spiorad air tì dol, agus thogadh suas na rothan fan comhair; oir bha spiorad a’ bheò-chreutair anns na rothan.

²¹ Nuair a ghluais iad sin, ghluais iad seo; agus nuair a thogadh iad sin suas on talamh, thogadh na rothan suas fan comhair: oir bha spiorad a’ bheò-chreutair anns na rothan.

²² Agus bha aogas an speur a bha thar cinn a’ bheò-chreutair mar dhreach criostail uamhasaich, air a sgaoileadh thar an cinn gu h‑àrd.

²³ Agus fon speur bha an sgiathan gu dìreach, gach aon fa chomhair a chèile; aig gach aon bha dithis, a dh’fhalaich air an taobh seo, agus aig gach aon bha dithis a dh’fhalaich air an taobh sin, an cuirp.

²⁴ Agus chuala mi fuaim an sgiathan, mar thoirm mòran uisgeachan, mar ghuth an Uile-chumhachdaich; nuair a ghluais iad, chluinnte fuaim mar thorman sluaigh; tràth sheas iad, leig iad sìos an sgiathan.

²⁵ Agus bha guth on speur, a bha thar an cinn, tràth sheas iad, agus a leig iad sìos an sgiathan.

²⁶ Agus os cionn an speur, a bha thar an cinn, bha samhladh rìgh-chathrach, mar choslas clach saphir; agus air samhladh na rìgh-chathrach, bha taisbeanadh mar gum biodh coslas duine na shuidhe oirre.

²⁷ Agus chunnaic mi mar dhreach òmair, mar choslas teine gach taobh a‑staigh ann: o thaisbeanadh a leasraidh, agus os a chionn, agus o thaisbeanadh a leasraidh agus foidhe, chunnaic mi mar gum biodh ann coslas teine, agus e dealrach mun cuairt.

²⁸ Mar choslas a’ bhogha a tha anns an neul ann an là na froise, b’amhail dreach an dealraidh mun cuairt. B’e seo foillseachadh samhladh glòir an Tighearna; agus nuair a chunnaic mise, thuit mi air m’aghaidh, agus chuala mi guth aoin a’ labhairt.