Eòin 2 - Am Bìoball Gàidhlig 1992

¹ Agus air an treas là bha pòsadh ann an Cana Ghalile; agus bha màthair Iosa an sin.

² Agus fhuair Iosa mar an ceudna agus a dheisciobail cuireadh a‑chum a’ phòsaidh.

³ Agus air teireachdainn don fhìon, thubhairt màthair Iosa ris, Chan eil fìon aca.

⁴ Thubhairt Iosa rithe, Ciod e mo ghnothach-sa riut, a bhean? Cha tàinig m’uair-sa fhathast.

⁵ Thubhairt a mhàthair ris an luchd-frithealaidh, Ge bè nì a their e ribh, dèanaibh e.

⁶ Agus bha sia soithichean-uisge de chloich air an cur an sin, a rèir gnàth-glanaidh nan Iùdhach, a ghabhadh dà fheircin no trì, gach aon dhiubh.

⁷ Thubhairt Iosa riu, Lìonaibh na soithichean le uisge. Agus lìon iad iad gus am beul.

⁸ Agus thubhairt e riu, Tàirngibh a‑nis, agus thugaibh a‑chum uachdaran na cuirme. Agus thug iad ann e.

⁹ Nuair a bhlais uachdaran na cuirme an t‑uisge a rinneadh na fhìon (agus cha robh fhios aige cia as a thàinig e; ach bha fhios aig an luchd-frithealaidh a tharraing an t‑uisge), ghairm uachdaran na cuirme am fear nuadh-pòsda,

¹⁰ Agus thubhairt e ris, Cuiridh gach duine fìon math an làthair air tùs; agus nuair a dh’òlas daoine gu leòr, an sin am fìon as miosa: ach ghlèidh thusa am fìon math gus a‑nis.

¹¹ Seo toiseach nam mìorbhailean a rinn Iosa ann an Cana Ghalile, agus dh’fhoillsich e a ghlòir; agus chreid a dheisciobail ann.

¹² An dèidh seo chaidh e sìos do Chapernàum, e fhèin, agus a mhàthair, agus a bhràithrean, agus a dheisciobail; agus cha d’fhan iad ann mòran làithean.

¹³ Agus bha càisg nan Iùdhach am fagas; agus chaidh Iosa suas gu Ierusalem,

¹⁴ Agus fhuair e nan suidhe anns an teampall luchd-reic cruidh, agus chaorach, agus chalaman, agus luchd-malairt an airgid:

¹⁵ Agus air dèanamh sgiùrsair dha de chùird chaola, dh’fhuadaich e a‑mach as an teampall iad uile, agus na caoraich agus an crodh; agus dhòirt e a‑mach airgead an luchd-malairt, agus thilg e na bùird thairis;

¹⁶ Agus thubhairt e riùsan a bha a’ reic chalaman, Togaibh iad sin à seo; na dèanaibh taigh m’Athar-sa na thaigh-marsantachd.

¹⁷ Agus chuimhnich a dheisciobail gu robh e sgrìobhte, Dh’ith eud do thaighe suas mi.

¹⁸ An sin fhreagair na h‑Iùdhaich, agus thubhairt iad ris, Ciod an comharradh a nochdas tu dhuinne, do bhrìgh gu bheil thu a’ dèanamh nan nithean sin?

¹⁹ Fhreagair Iosa agus thubhairt e riu, Leagaibh sìos an teampall seo, agus ann an trì làithean cuiridh mise suas e.

²⁰ An sin thubhairt na h‑Iùdhaich, Sia bliadhna agus dà‑fhichead bha an teampall seo ga thogail, agus an cuir thusa suas ann an trì làithean e?

²¹ Ach labhair esan mu theampall a chuirp.

²² Uime sin nuair a bha e air èirigh o na mairbh, chuimhnich a dheisciobail gun dubhairt e seo: agus chreid iad an sgriobtar, agus am facal a thubhairt Iosa.

²³ A‑nis nuair a bha e ann an Ierusalem aig a’ chàisg, air an fhèill, chreid mòran na ainm, nuair a chunnaic iad na mìorbhailean a rinn e.

²⁴ Ach cha d’earb Iosa e fhèin riu, do bhrìgh gum b’aithne dha na h‑uile dhaoine,

²⁵ Agus nach robh feum aige neach air bith a dhèanamh fianais air duine: oir bha fhios aige ciod a bha anns an duine.