Eòin 18 - Am Bìoball Gàidhlig 1992

¹ Nuair a labhair Iosa na briathran seo, chaidh e maille ra dheisciobail thairis air sruth Chedroin, far an robh lios, don deachaidh e fhèin agus a dheisciobail.

² Agus b’aithne do Iùdas, a bhrath esan, an t‑àit: oir thàinig Iosa gu tric an sin maille ra dheisciobail.

³ An sin air do Iùdas buidheann agus maoir fhaotainn o na h‑àrd-shagartan agus na Pharasaich, thàinig e don àite sin le leusan, agus lòchrain, agus airm.

⁴ Uime sin air do Iosa fios a bhith aige air na h‑uile nithean a bha gu teachd air, chaidh e a‑mach, agus thubhairt e riu, Cò a tha sibh ag iarraidh?

⁵ Fhreagair iadsan e, Iosa o Nàsaret, Thubhairt Iosa riu, Is mise e. Agus sheas mar an ceudna Iùdas, a bhrath esan, maille riu.

⁶ An sin cho luath is a thubhairt e riu, Is mise e, chaidh iad air an ais, agus thuit iad air an làr.

⁷ An sin dh’fheòraich e dhiubh a‑rìs, Cò a tha sibh ag iarraidh? Thubhairt iadsan, Iosa o Nàsaret.

⁸ Fhreagair Iosa, Thubhairt mi ribh gur mise e. Uime sin mas mise a tha sibh ag iarraidh, leigibh leo sin falbh:

⁹ A‑chum gun coileante am facal a labhair e, An dream a thug thu dhomh, cha do chaill mi aon dhiubh.

¹⁰ An sin air do Shìmon Peadar claidheamh a bhith aige, tharraing e e, agus bhuail e òglach an àrd-shagairt, agus gheàrr e a’ chluas dheas dheth. Agus b’e ainm an òglaich Malchas.

¹¹ An sin thubhairt Iosa ri Peadar, Cuir do chlaidheamh anns an truaill: an cupan a thug m’Athair dhòmhsa, nach òl mi e?

¹² An sin rug a’ bhuidheann, agus an ceannard, agus maoir nan Iùdhach, air Iosa, agus cheangail iad e,

¹³ Agus thug iad leo e air tùs gu Annas; (oir b’esan athair-cèile Chaiaphais, a bha na àrd-shagart air a’ bhliadhna sin).

¹⁴ A‑nis b’e Caiaphas a thug comhairle do na h‑Iùdhaich, gum b’iomchaidh gum faigheadh aon duine bàs airson an t‑sluaigh.

¹⁵ Agus lean Sìmon Peadar agus deisciobal eile Iosa. B’aithne don àrd-shagart an deisciobal sin, agus chaidh e a‑steach maille ri Iosa do chùirt an àrd-shagairt.

¹⁶ Ach sheas Peadar aig an doras an leth a‑muigh. Uime sin chaidh an deisciobal sin eile a b’aithne don àrd-shagart a‑mach, agus labhair e ris a’ bhan-dorsair, agus thug e Peadar a‑steach.

¹⁷ An sin thubhairt a’ bhanoglach a bha a’ gleidheadh an dorais ri Peadar, Nach ann de dheisciobail an duine seo thusa mar an ceudna? Thubhairt esan, Chan ann.

¹⁸ Agus bha na seirbhisich agus na maoir nan seasamh, air dhaibh teine guail a chur suas, oir bha am fuachd ann, agus bha iad gan garadh fhèin: agus bha Peadar na sheasamh maille riu, agus ga gharadh fhèin.

¹⁹ An sin dh’fhiosraich an t‑àrd-shagart de Iosa mu thimcheall a dheisciobal, agus mu thimcheall a theagaisg.

²⁰ Fhreagair Iosa e, Labhair mise gu follaiseach ris an t‑saoghal; theagaisg mi a‑ghnàth anns an t‑sionagog, agus anns an teampall, far a bheil na h‑Iùdhaich a’ cruinneachadh as gach àit; agus am falach cha do labhair mi nì air bith.

²¹ Carson a tha thu a’ fiosrachadh dhìomsa? Feòraich dhiubhsan a chuala, ciod a thubhairt mi riu: feuch, tha fhios acasan ciod a thubhairt mi.

²² Agus nuair a thubhairt e na nithean seo, bhuail aon de na maoir, a bha na sheasamh an làthair, a bhas air Iosa, ag ràdh, An ann mar seo a fhreagras tu an t‑àrd-shagart?

²³ Fhreagair Iosa e, Ma labhair mi gu h‑olc, dèan fianais air an olc: ach mas ann gu math, carson a tha thu gam bhualadh?

²⁴ (A‑nis chuir Annas e ceangailte gu Caiaphas an t‑àrd-shagart.)

²⁵ Agus bha Sìmon Peadar na sheasamh agus ga gharadh. Uime sin thubhairt iad ris, Nach aon de a dheisciobail thusa mar an ceudna? Dh’àich esan, agus thubhairt e, Cha mhi.

²⁶ Thubhairt aon de sheirbhisich an àrd-shagairt, (caraid don fhear den do gheàrr Peadar a chluas), Nach faca mise thu anns an lios maille ris?

²⁷ An sin dh’àich Peadar a‑rìs, agus air ball ghoir an coileach.

²⁸ An sin thug iad Iosa o Chaiaphas gu àit a’ bhreitheanais: agus b’i a’ mhadainn a bha ann, agus cha deachaidh iad fhèin do àit a’ bhreitheanais, a‑chum nach biodh iad air an salachadh; ach gun itheadh iad a’ chàisg.

²⁹ An sin chaidh Pilat a‑mach dan ionnsaigh-san, agus thubhairt e, Ciod a’ chasaid a tha sibh a’ toirt an aghaidh an duine seo?

³⁰ Fhreagair iadsan agus thubhairt iad ris, Mura b’fhear droch-bheairt e, cha tugamaid thairis dhutsa e.

³¹ An sin thubhairt Pilat riu, Gabhaibh-se e, agus thugaibh breith air a rèir ur lagha fhèin. An sin thubhairt na h‑Iùdhaich ris, Chan eil e ceadaichte dhuinne neach air bith a chur gu bàs:

³² A‑chum gum biodh facal Iosa air a choileanadh, a labhair e, a’ ciallachadh ciod a’ ghnè bàis a bha e gu fhaotainn.

³³ An sin chaidh Pilat a‑steach a‑rìs do àit a’ bhreitheanais, agus ghairm e Iosa, agus thubhairt e ris, An tusa Rìgh nan Iùdhach?

³⁴ Fhreagair Iosa e, A bheil thu ag ràdh seo uat fhèin, no an d’innis daoine eile dhut e mum thimcheall-sa?

³⁵ Fhreagair Pilat, An Iùdhach mise? Thug do chinneach fhèin, agus na h‑àrd-shagartan, thairis dhòmhsa thu: ciod a rinn thu?

³⁶ Fhreagair Iosa, Chan ann den t‑saoghal seo a tha mo rìoghachd-sa: nam b’ann den t‑saoghal seo a bhiodh mo rìoghachd, dhèanadh mo sheirbhisich cogadh, a‑chum nach tugte thairis do na h‑Iùdhaich mi: ach a‑nis chan ann o seo a tha mo rìoghachd.

³⁷ Air an adhbhar sin thubhairt Pilat ris, An rìgh thu mas eadh? Fhreagair Iosa, Thubhairt thusa gur rìgh mi. Is ann a‑chum na crìche seo a thàinig mi don t‑saoghal, a‑chum gun dèanainn fianais don fhìrinn. Gach neach a tha air taobh na fìrinn, èisdidh e rim ghuth-sa.

³⁸ Thubhairt Pilat ris, Ciod i an fhìrinn? Agus air dha seo a ràdh, chaidh e a‑mach a‑rìs a‑chum nan Iùdhach, agus thubhairt e riu, Chan eil mise a’ faotainn coire air bith ann.

³⁹ Ach tha gnàth agaibhse gun leiginn as duine dhuibh air a’ chàisg: uime sin an àill leibh mi a leigeadh rìgh nan Iùdhach fa sgaoil dhuibh?

⁴⁰ An sin ghlaodh iadsan uile, ag ràdh, Chan e an duine seo, ach Barabas. A‑nis b’fhear-reubainn Barabas.