Ecsodus 26 - Am Bìoball Gàidhlig 1992

¹ Agus nì thu am pàillean le deich cùirteanan de anart grinn toinnte, agus de ghorm, agus de chorcar, agus de sgàrlaid: maille ri ceruban de obair ealanta nì thu iad.

² Fad aon chùirtein ochd làmhan-coille ar fhichead, agus leud aon chùirtein, ceithir làmhan-coille: an aon tomhas do na cùirteanan uile.

³ Bidh còig cùirteanan air an ceangal gach aon ri chèile; agus na còig cùirteanan eile air an ceangal gach aon ri chèile.

⁴ Agus nì thu lùban de ghorm air oir aon chùirtein, on iomall anns a’ choicheangal: agus, air a’ mhodh cheudna, nì thu ann an oir a’ chùirtein as fhaide a‑mach, ann an coicheangal an dara aoin.

⁵ Lethcheud lùb nì thu ann an aon chùirtean, agus lethcheud lùb nì thu ann an oir a’ chùirtein a tha ann an coicheangal an dara aoin; a‑chum is gun gabh na lùban greim de a chèile.

⁶ Agus nì thu lethcheud cromag òir, agus ceanglaidh tu na cùirteanan ri chèile leis na cromagan: agus bidh e na aon phàillean.

⁷ Agus nì thu cùirteanan de fhionnadh ghobhar gu bhith nan còmhdach air a’ phàillean: aon-chùirtean-deug nì thu dhiubh.

⁸ Fad aon chùirtein deich làmhan-coille ar fhichead, agus leud aon chùirtein ceithir làmhan-coille: bidh an t‑aon-chùirtean-deug uile a dh’aon tomhas.

⁹ Agus cuiridh tu ri chèile còig cùirteanan leo fhèin, agus sia cùirteanan leo fhèin, agus dùblaichidh tu an siathamh cùirtean air taobh-beòil a’ bhùtha.

¹⁰ Agus nì thu lethcheud lùb air oir an aon chùirtein as fhaide a‑mach anns a’ choicheangal, agus lethcheud lùb air oir a’ chùirtein a tha a’ coicheangal an dara aoin.

¹¹ Agus nì thu lethcheud cromag de umha, agus cuiridh tu na cromagan anns na lùban, agus cuiridh tu am bùth ri chèile, air chor is gum bi e na aon.

¹² Agus am fuidheall a dh’fhàgar de chùirteanan a’ bhùtha, leth a’ chùirtein a dh’fhàgar, crochar e thar taobh-cùil a’ phàillein.

¹³ Agus làmh-choille air an taobh seo, agus làmh-choille air an taobh eile de na dh’fhàgadh air am fad de chùirteanan a’ bhùtha, crochar e thar taobhan a’ phàillein, air an taobh seo, agus air an taobh eile, ga chòmhdachadh.

¹⁴ Agus nì thu còmhdach airson a’ bhùtha de chraicnean reitheachan air an dath dearg, agus còmhdach de chraicnean bhroc os a chionn.

¹⁵ Agus nì thu bùird airson a’ phàillein de fhiodh sitim, nan seasamh:

¹⁶ Deich làmhan-coille fad bùird, agus làmh-choille gu leth leud aon bhùird.

¹⁷ Bidh dà làimh aig aon bhòrd, air an cur an òrdagh fa chomhair a chèile; mar seo nì thu do uile bhùird a’ phàillein.

¹⁸ Agus nì thu na bùird airson a’ phàillein, fichead bòrd air an taobh deas, ris an àird a deas.

¹⁹ Agus nì thu dà‑fhichead cas airgid fon fhichead bòrd: dà chois fo aon bhòrd a rèir a dhà làimh, agus dà chois fo bhòrd eile a rèir a dhà làimh.

²⁰ Agus airson an dara taoibh den phàillean air an taobh tuath, fichead bòrd;

²¹ Agus an dà‑fhichead cas de airgead, dà chois fo aon bhòrd, agus dà chois fo bhòrd eile.

²² Agus airson taobhan a’ phàillein air an làimh an iar, nì thu sia bùird.

²³ Agus nì thu dà bhòrd airson oisnean a’ phàillein anns an dà thaobh.

²⁴ Agus bidh iad air an coicheangal foidhe, agus mar an ceudna bidh iad air an coicheangal os a chionn ri aon fhailbheig: mar seo nìthear dhaibh le chèile; bidh iad airson an dà oisne.

²⁵ Agus bidh ochd bùird ann, agus an casan de airgead, sia-casan-deug; dà chois fo aon bhòrd, agus dà chois fo bhòrd eile.

²⁶ Agus nì thu croinn de fhiodh sitim; còig airson nam bòrd air aon taobh den phàillean.

²⁷ Agus còig croinn airson nam bòrd air an taobh eile den phàillean, agus còig croinn airson bùird taobhan a’ phàillein airson an dà thaoibh an iar.

²⁸ Agus ruigidh an crann meadhonach ann am meadhon nam bòrd o cheann gu ceann.

²⁹ Agus còmhdaichidh tu thairis na bùird le òr, agus nì thu am failbheagan de òr mar àiteachan do na croinn: agus còmhdaichidh tu thairis na croinn le òr.

³⁰ Agus togaidh tu suas am pàillean a rèir a shamhlaidh, a nochdadh dhut anns an t‑sliabh.

³¹ Agus nì thu brat de ghorm, agus de chorcar, agus de sgàrlaid, agus de anart grinn toinnte: de obair ealanta nìthear e, le ceruban.

³² Agus crochaidh tu e air ceithir puist de fhiodh sitim, air an còmhdachadh thairis le òr: agus bidh an cromagan de òr, air na ceithir buinn airgid.

³³ Agus crochaidh tu suas am brat fo na cromagan, agus bheir thu a‑steach ann an sin àirc na Fianais, an taobh a‑staigh den bhrat: agus roinnidh am brat dhuibhse eadar an t‑ionad naomh agus an t‑ionad ro‑naomh.

³⁴ Agus cuiridh tu a’ chathair-thròcair air àirc na Fianais, anns an ionad ro‑naomh.

³⁵ Agus cuiridh tu am bòrd an leth a‑muigh den bhrat, agus an coinnleir fa chomhair a’ bhùird air taobh deas a’ phàillein: agus cuiridh tu am bòrd air an taobh tuath.

³⁶ Agus nì thu còmhdach airson doras a’ bhùtha, de ghorm, agus de chorcar, agus de sgàrlaid, agus de anart grinn toinnte, obraichte le obair ghrèise.

³⁷ Agus nì thu airson a’ chòmhdaich còig puist de fhiodh sitim, agus còmhdaichidh tu thairis iad le òr, agus tilgidh tu air an son còig buinn umha.