Ecsodus 25 - Am Bìoball Gàidhlig 1992

¹ Agus labhair an Tighearna ri Maois, ag ràdh,

² Labhair ri cloinn Israeil, gun toir iad am ionnsaigh tabhartas: o gach duine a bheir seachad gu toileach e le a chridhe gabhaidh sibh mo thabhartas.

³ Agus is e seo an tabhartas a ghabhas sibh uapa; òr, agus airgead, agus umha,

⁴ Agus gorm, agus corcar, agus sgàrlaid, agus anart grinn, agus fionnadh ghobhar,

⁵ Agus craicnean reitheachan air an dath dearg, agus craicnean bhroc, agus fiodh sitim,

⁶ Ola a‑chum solais, spìosraidh a‑chum ola-ungaidh, agus a‑chum tùise deagh-bholaidh,

⁷ Clachan onics, agus clachan rin cur anns an èphoid, agus anns an uchd-èideadh.

⁸ Agus nì iad dhomh ionad naomh, agus gabhaidh mise còmhnaidh nam measg.

⁹ A rèir gach nì a leigeas mise dhut fhaicinn, a rèir samhladh a’ phàillein, agus samhladh a àirneis uile, eadhon mar sin nì sibh.

¹⁰ Agus nì iad àirc de fhiodh sitim: dà làmh-choille gu leth a fad, agus làmh-choille gu leth a leud, agus làmh-choille gu leth a h‑àirde.

¹¹ Agus còmhdaichidh tu thairis i le òr fìorghlan, a‑staigh agus a‑muigh còmhdaichidh tu thairis i; agus nì thu oirre coron òir mun cuairt.

¹² Agus nì thu air a son ceithir failbheagan òir, agus cuiridh tu iad air a ceithir oisnean; agus bidh dà fhailbheig air aon taobh dhith, agus dà fhailbheig air an taobh eile dhith.

¹³ Agus nì thu bataichean de fhiodh sitim, agus còmhdaichidh tu thairis iad le òr.

¹⁴ Agus cuiridh tu na bataichean anns na failbheagan air taobhan na h‑àirce, a‑chum an àirc a ghiùlan leo.

¹⁵ Ann am failbheagan na h‑àirce bidh na bataichean: cha ghluaisear uaipe iad.

¹⁶ Agus cuiridh tu anns an àirc an Fhianais a bheir mise dhut.

¹⁷ Agus nì thu cathair-thròcair de òr fìorghlan; dà làmh-choille gu leth a fad, agus làmh-choille gu leth a leud.

¹⁸ Agus nì thu dà cherub òir: de obair bhuailte nì thu iad, aig dà cheann na cathair-thròcair.

¹⁹ Agus nì thu aon cherub aig aon cheann, agus cerub eile aig a’ cheann eile den chathair-thròcair: nì sibh na ceruban aig a dà cheann.

²⁰ Agus bidh na ceruban a’ sìneadh a‑mach an sgiathan gu h‑àrd, a’ còmhdachadh na cathair-thròcair len sgiathan, agus an aghaidhean ri chèile: ris a’ chathair-thròcair bidh aghaidhean nan cerub.

²¹ Agus cuiridh tu a’ chathair-thròcair suas air an àirc, agus anns an àirc cuiridh tu an Fhianais a bheir mise dhut.

²² Agus coinnichidh mise thu an sin, agus labhraidh mi riut o uachdar na cathair-thròcair, o eadar an dà cherub a tha air àirc na Fianais, a‑thaobh gach nì a dh’àithneas mi dhut do chloinn Israeil.

²³ Agus nì thu bòrd de fhiodh sitim; dà làmh-choille a fhad, agus làmh-choille a leud, agus làmh-choille gu leth a àirde.

²⁴ Agus còmhdaichidh tu thairis e le òr fìorghlan, agus nì thu dha coron òir mun cuairt.

²⁵ Agus nì thu dha iomall de leud boise mun cuairt, agus nì thu coron òir da iomall mun cuairt.

²⁶ Agus nì thu dha ceithir failbheagan òir, agus cuiridh tu na failbheagan air na ceithir oisnean a tha aig a cheithir chasan.

²⁷ Fa chomhair an iomaill bidh na failbheagan, a‑chum àitean do na bataichean, gus am bòrd a ghiùlan.

²⁸ Agus nì thu na bataichean de fhiodh sitim, agus còmhdaichidh tu thairis iad le òr; giùlainear am bòrd leo.

²⁹ Agus nì thu a mhiasan, agus a thùiseirean, agus a chuachan, agus a chupain, leis an toirear seachad ìobairt-dibhe; de òr fìorghlan nì thu iad.

³⁰ Agus cuiridh tu air a’ bhòrd aran taisbeanta romhamsa an còmhnaidh.

³¹ Agus nì thu coinnleir de òr fìorghlan, de obair bhuailte nìthear an coinnleir. Bidh a chas, agus a mheòir, a chupain, a chnapan, agus a bhlàthan, den obair cheudna.

³² Agus thig sia meòir a‑mach as a thaobhan; trì meòir a’ choinnleir à aon taobh dheth, agus trì meòir a’ choinnleir as an taobh eile dheth.

³³ Trì cupain air an dèanamh cosmhail ri almoinean ann an aon mheur, maille ri cnap agus blàth; agus trì cupain air an dèanamh cosmhail ri almoinean anns a’ mheur eile, maille ri cnap agus blàth; mar sin anns na sia meòir a thig a‑mach as a’ choinnleir.

³⁴ Agus anns a’ choinnleir bidh ceithir cupain air an dèanamh cosmhail ri almoinean, maille rin cnapan agus am blàthan.

³⁵ Agus bidh cnap fo dhà mheur dheth, agus cnap fo dhà mheur dheth, agus cnap fo dhà mheur dheth; mar sin do na sia meòir a thig a‑mach as a’ choinnleir.

³⁶ Bidh na cnapan agus am meòir den obair cheudna: bidh e uile na aon obair bhuailte de òr fìorghlan.

³⁷ Agus nì thu dha seachd lòchrain: agus cuirear suas a lòchrain, a‑chum gun toir iad solas thall fa chomhair.

³⁸ Agus bidh a chlobhachan agus a smàl-shoithichean de òr fìorghlan.

³⁹ De thàlann de òr fìorghlan nìthear e, maille ris na soithichean sin uile.

⁴⁰ Agus feuch gun dèan thu iad a rèir an t‑samhlaidh a chaidh a leigeadh fhaicinn dhut anns an t‑sliabh.