Ecsodus 16 - Am Bìoball Gàidhlig 1992

¹ Agus dh’fhalbh iad o Elim, agus thàinig coitheanal chloinn Israeil uile gu fàsach Shin a tha eadar Elim agus Sinài, air a’ chòigeamh-là‑deug den dara mìos an dèidh dhaibh teachd a‑mach à tìr na h‑Eiphit.

² Agus rinn coitheanal chloinn Israeil uile gearan an aghaidh Mhaois agus Aaroin anns an fhàsach.

³ Agus thubhairt clann Israeil riu, B’fheàrr gum faigheamaid bàs le làimh an Tighearna ann an tìr na h‑Eiphit, nuair a bha sinn nar suidhe làimh ris na poitean feòla, agus nuair a dh’ith sinn aran gu ar sàth; oir thug sibh a‑mach sinn don fhàsach seo, a mharbhadh a’ choitheanail seo uile le acras.

⁴ An sin thubhairt an Tighearna ri Maois, Feuch, frasaidh mise dhuibh aran o nèamh, agus thèid an sluagh a‑mach, agus cruinnichidh iad cuibhreann gach là air an là sin fhèin, a‑chum is gun dearbh mi iad, co aca a ghluaiseas iad ann am lagh, no nach gluais.

⁵ Agus air an t‑siathamh là ullaichidh iad an nì sin a bheir iad a‑steach, agus bidh e a dhà uimhir agus a chruinnicheas iad gach là eile.

⁶ Agus thubhairt Maois agus Aaron ri cloinn Israeil uile, Mu fheasgar, an sin bidh fhios agaibh gun tug an Tighearna a‑mach sibh à tìr na h‑Eiphit.

⁷ Agus anns a’ mhadainn, an sin chì sibh glòir an Tighearna; do bhrìgh gu bheil e a’ cluinntinn ur gearain an aghaidh an Tighearna: agus ciod sinne, gu bheil sibh a’ dèanamh gearain nar n‑aghaidh?

⁸ Agus thubhairt Maois, Bidh a’ chùis mar seo nuair a bheir an Tighearna dhuibh anns an fheasgar feòil ra h‑ithe, agus aran anns a’ mhadainn gu ur sàth; do bhrìgh gu bheil an Tighearna a’ cluinntinn ur gearain a tha sibh a’ dèanamh na aghaidh: agus ciod sinne? Chan ann nar n‑aghaidh-ne a tha ur gearan, ach an aghaidh an Tighearna.

⁹ Agus thubhairt Maois ri Aaron, Abair ri coitheanal chloinn Israeil uile, Thigibh am fagas an làthair an Tighearna, oir chuala e ur gearan.

¹⁰ Agus nuair a labhair Aaron ri coitheanal chloinn Israeil uile, dh’amhairc iad a dh’ionnsaigh an fhàsaich, agus, feuch, dh’fhoillsicheadh glòir an Tighearna ann an neul.

¹¹ Agus labhair an Tighearna ri Maois, ag ràdh,

¹² Chuala mi gearan chloinn Israeil; labhair riu, ag ràdh, Mu fheasgar ithidh sibh feòil, agus anns a’ mhadainn sàsaichear sibh le aran: agus bidh fhios agaibh gur mise an Tighearna ur Dia.

¹³ Agus nuair a bha am feasgar ann, an sin thàinig na gearra-goirt a‑nìos, agus chòmhdaich iad an camp; agus anns a’ mhadainn bha an drùchd na laighe mu thimcheall a’ champa.

¹⁴ Agus nuair a dh’èirich an drùchd, a bha na laighe, suas, feuch, bha air aghaidh an fhàsaich nì beag cruinn, beag mar an liath-reothadh air an talamh.

¹⁵ Agus nuair a chunnaic clann Israeil e, thubhairt iad gach aon ri chèile, Mana: oir cha robh fhios aca ciod e. Agus thubhairt Maois riu, Seo an t‑aran a thug an Tighearna dhuibh ra ithe.

¹⁶ Seo an nì a dh’àithn an Tighearna, Cruinnichibh dheth gach duine a rèir a itheannaich, omer do gach neach a rèir àireamh ur n‑anaman; gabhadh gach duine agaibh air an son-san a tha na bhùth.

¹⁷ Agus rinn clann Israeil mar sin, agus chruinnich iad, cuid na bu mhò, agus cuid na bu lugha.

¹⁸ Agus nuair a thomhais iad e le omer, cha robh a’ bheag thairis aigesan a chruinnich na bu mhò, agus air-san a chruinnich na bu lugha, cha robh uireasbhaidh: chruinnich gach duine a rèir a itheannaich.

¹⁹ Agus thubhairt Maois riu, Na fàgadh duine sam bith dheth gu madainn.

²⁰ Gidheadh cha d’èisd iad ri Maois, ach dh’fhàg cuid dhiubh dheth gu madainn, agus ghin e cnuimhean, agus lobh e: agus bha corraich air Maois riu.

²¹ Agus chruinnich iad e air gach madainn, gach duine a rèir a itheannaich; agus nuair a dh’fhàs a’ ghrian teth, leaghadh e.

²² Agus air an t‑siathamh là chruinnich iad a dhà uiread arain, dà omer airson gach aoin: agus thàinig uachdarain a’ choitheanail uile, agus dh’innis iad sin do Mhaois.

²³ Agus thubhairt e riu, Seo an nì a labhair an Tighearna, Bidh fois na sàbaid naoimh don Tighearna a‑màireach: a mheud is a tha sibh gu fhuineadh, fuinibh an‑diugh, agus a mheud is a tha sibh gu bhruithe, bruithibh; agus gach nì a bhios thairis, taisgibh suas dhuibh fhèin gu madainn.

²⁴ Agus thaisg iad suas e gu madainn, mar a dh’àithn Maois; agus cha do lobh e, cha mhò a bha cnuimh sam bith ann.

²⁵ Agus thubhairt Maois, Ithibh sin an‑diugh, oir tha sàbaid ann an‑diugh don Tighearna; an‑diugh chan fhaigh sibh e anns a’ mhachair.

²⁶ Sia làithean cruinnichidh sibh e, ach air an t‑seachdamh là bidh an t‑sàbaid; cha bhi e ann air an là sin.

²⁷ Agus thàrladh air an t‑seachdamh là gun deachaidh cuid den t‑sluagh a‑mach ga chruinneachadh, agus cha d’fhuair iad a’ bheag.

²⁸ Agus thubhairt an Tighearna ri Maois, Cia fhada a dhiùltas sibh m’àitheantan-sa a choimhead, agus mo reachdan?

²⁹ Faicibh, do bhrìgh gun tug an Tighearna dhuibh an t‑sàbaid, air an adhbhar sin tha e a’ tabhairt dhuibh air an t‑siathamh là aran dà là: fanaibh, gach duine na àite fhèin; na rachadh duine sam bith a‑mach as a àit air an t‑seachdamh là.

³⁰ Mar sin ghabh an sluagh fois air an t‑seachdamh là.

³¹ Agus thug taigh Israeil Mana mar ainm air; agus bha e mar fhrois coriandeir, geal, agus a bhlas mar abhlain air an dèanamh le mil.

³² Agus thubhairt Maois, Seo an nì a dh’àithn an Tighearna, Lìon omer dheth gu bhith air a ghleidheadh airson ur ginealaichean, a‑chum gum faic iad an t‑aran leis an do bheathaich mi sibh anns an fhàsach, nuair a thug mi a‑mach sibh à tìr na h‑Eiphit.

³³ Agus thubhairt Maois ri Aaron, Gabh soitheach, agus cuir ann làn omeir de Mhana, agus taisg e an làthair an Tighearna, gu bhith air a ghleidheadh airson ur ginealaichean.

³⁴ Mar a dh’àithn an Tighearna do Mhaois, mar sin thaisg Aaron e an làthair na Fianais, gu bhith air a ghleidheadh.

³⁵ Agus dh’ith clann Israeil am Mana dà‑fhichead bliadhna, gus an tàinig iad gu tìr àitichte: dh’ith iad am Mana, gus an tàinig iad gu crìch tìr Chanàain.

³⁶ A‑nis is e omer an deicheamh cuid de ephah.