Daniel 1 - Am Bìoball Gàidhlig 1992

¹ Anns an treas bliadhna de linn Iehoiacim rìgh Iùdah, thàinig Nebuchadnesar rìgh Bhàbiloin gu Ierusalem, agus chuartaich e le feachd e.

² Agus thug an Tighearna Iehoiacim rìgh Iùdah da làimh, le cuid de shoithichean taigh Dhè, a thug e gu tìr Shìnair, gu taigh a dhè; seadh, thug e na soithichean gu taigh-tasgaidh a dhè.

³ Agus labhair an rìgh ri Aspenas, uachdaran a chaillteanach, gun tugadh e leis cuid de chloinn Israeil, agus de shliochd an rìgh, agus de na prionnsachan;

⁴ Clann air nach robh ciurram air bith, ach a bha maiseach, agus fòghlaimte anns a h‑uile gliocas, agus fiosrach ann an eòlas, agus seòlta air ealdhain, agus a bha comasach air seasamh ann an lùchairt an rìgh, agus dom faodadh iad fòghlam agus teanga nan Caldèanach a theagasg.

⁵ Agus dh’òrdaich an rìgh dhaibh lòn làitheil de bhiadh an rìgh, agus den fhìon a bha e ag òl: mar sin gan àrachadh trì bliadhna, a‑chum gun seasadh iad an ceann na h‑aimsir sin an làthair an rìgh.

⁶ A‑nis am measg na muinntir seo bha de chloinn Iùdah, Daniel, Hananiah, Misael, agus Asariah;

⁷ Don tug uachdaran nan caillteanach ainmean: oir thug e air Daniel mar ainm Beltesasar; agus air Hananiah Sadrach; agus air Misael Mesach; agus air Asariah Abed-nego.

⁸ Ach ghabh Daniel rùn na chridhe nach truailleadh e e fhèin leis a’ chuibhreann de bhiadh an rìgh, no leis an fhìon den d’òl e: uime sin ghuidh e air uachdaran nan caillteanach nach biodh e air a shalachadh.

⁹ A‑nis thug Dia do Dhaniel deagh-ghean agus coibhneas gràdhach o uachdaran nan caillteanach.

¹⁰ Agus thubhairt uachdaran nan caillteanach ri Daniel, Tha eagal orm ro mo thighearna an rìgh, a dh’òrdaich ur biadh agus ur deoch: oir ciod uime am faiceadh e ur n‑aghaidhean nas miosa coslas na a chlann eile de ur seòrsa? An sin cuiridh sibh mise ann an cunnart mo chinn on rìgh.

¹¹ An sin thubhairt Daniel ri Melsar, a chuir uachdaran nan caillteanach os cionn Dhanieil, Hananiah, Mhisaeil agus Asariah,

¹² Dearbh do sheirbhisich, guidheam ort, deich làithean, agus thugar dhuinn peasair ra h‑ithe, agus uisge ra òl.

¹³ An sin amhaircear air ar n‑aghaidhean ann ad làthair-sa, agus air aghaidh na cloinne a tha ag ithe de chuibhreann-bìdh an rìgh: agus mar a chìthear ceart dhut, buin rid sheirbhisich.

¹⁴ Is amhail a dh’aontaich e leo anns a’ chùis seo agus dhearbh e iad deich làithean.

¹⁵ Agus an ceann deich làithean bha dreach an aghaidhean na bu mhaisiche agus na bu shultmhoire na an uile chlann a dh’ith an cuibhreann de bhiadh an rìgh.

¹⁶ Mar seo thug Melsar air falbh cuibhreann am bìdh, agus am fìon a bu chòir dhaibh òl; agus thug e dhaibh peasair.

¹⁷ A‑thaobh nan ceathrar chloinne seo, thug Dia dhaibh eòlas agus tuigse anns a h‑uile fòghlam agus gliocas: agus bha tuigse aig Daniel anns na h‑uile sheallaidhean agus bhruadairean.

¹⁸ A‑nis aig ceann nan làithean, anns an dubhairt an rìgh gun tugadh e a‑steach iad, an sin thug uachdaran nan caillteanach a‑steach iad an làthair Nebuchadnesair.

¹⁹ Agus rinn an rìgh còmhradh riu; agus nam measg uile cha d’fhuaireadh aon cosmhail ri Daniel, Hananiah, Misael, agus Asariah: air an adhbhar sin sheas iad fa chomhair an rìgh.

²⁰ Agus anns na h‑uile ghnothaichean gliocais agus tuigse a dh’fhiosraich an rìgh dhiubh, fhuair e iad deich uairean na b’fheàrr na na h‑uile dhraoidhean agus speuradairean a bha na rìoghachd uile.

²¹ Agus mhair Daniel gu ciad bhliadhna rìgh Chìruis.