Britheamhan 4 - Am Bìoball Gàidhlig 1992

¹ Agus rinn clann Israeil olc a‑rìs ann an sùilean an Tighearna, nuair a bha Ehud marbh.

² Agus reic an Tighearna iad do làimh Iabin rìgh Chanàain, a rìghich ann an Hasor; agus b’e ceannard a shluaigh Sisera, a bha a chòmhnaidh ann an Haroset nan cinneach.

³ Agus ghlaodh clann Israeil ris an Tighearna: oir bha naoi ceud carbad iarainn aige; agus rinn e ainneart air cloinn Israeil gu ro‑mhòr rè fichead bliadhna.

⁴ Agus thug Deborah, ban-fhàidh, bean Lapidoit, breith air Israel anns an àm sin.

⁵ Agus bha i a chòmhnaidh fo chraoibh-phailme Dheborah, eadar Ramah agus Betel, ann an sliabh Ephraim: agus chaidh clann Israeil suas da h‑ionnsaigh airson breitheanais.

⁶ Agus chuir i fios, agus ghairm i Barac, mac Abinoaim, a‑mach à Cedes-naphtali, agus thubhairt i ris, Nach d’àithn an Tighearna Dia Israeil, ag ràdh, Imich, agus tarraing gu sliabh Thaboir, agus thoir leat deich mìle fear de chloinn Naphtali, agus de chloinn Shebuluin;

⁷ Agus tàirngidh mise ad ionnsaigh gu sruth Chisoin, Sisera, ceannard armailtean Iabin, le a charbadan agus a mhòr-shluagh; agus bheir mi thairis e dod làimh?

⁸ Agus thubhairt Barac rithe, Ma thèid thusa leam, an sin thèid mi; ach mura tèid thu leam, cha tèid.

⁹ Agus thubhairt i, Gu cinnteach thèid mi leat: gidheadh cha bhi an turas a ghabhas tu a‑chum do chliù; oir do làimh mnà reicidh an Tighearna Sisera. Agus dh’èirich Deborah, agus chaidh i maille ri Barac gu Cedes.

¹⁰ Agus ghairm Barac Sebulun agus Naphtali gu Cedes; agus chaidh e suas da chois le deich mìle fear: agus chaidh Deborah suas maille ris.

¹¹ A‑nis sgar Heber an Ceneach, a bha de chloinn Hobaib, athair-cèile Mhaois, e fhèin o na Cenich, agus shuidhich e a bhùth gu ruig còmhnard Shanaim, a tha làimh ri Cedes.

¹² Agus dh’innis iad do Shisera gun deachaidh Barac mac Abinoaim suas gu sliabh Thaboir.

¹³ Agus chruinnich Sisera ri chèile a charbadan uile, eadhon naoi ceud carbad iarainn, agus an sluagh uile a bha maille ris, o Hasoret nan cinneach, gu sruth Chisoin.

¹⁴ Agus thubhairt Deborah ri Barac, Eirich; oir is e seo an là anns an tug an Tighearna Sisera thairis dod làimh: nach eil an Tighearna air dol a‑mach romhad? Agus chaidh Barac sìos o shliabh Thaboir, agus deich mìle fear na dhèidh.

¹⁵ Agus sgrios an Tighearna Sisera, agus a charbadan uile, agus a shluagh uile, le faobhar a’ chlaidheimh ro Bharac: agus theirinn Sisera sìos o a charbad, agus theich e as da chois.

¹⁶ Ach lean Barac an dèidh nan carbad, agus an dèidh an t‑sluaigh, gu Haroset nan cinneach: agus thuit sluagh Shisera uile le faobhar a’ chlaidheimh: cha d’fhàgadh uiread is a h‑aon dhiubh.

¹⁷ Gidheadh theich Sisera da chois gu bùth Iaeil, bean Hebeir an Ceneach; oir bha sìth eadar Iabin rìgh Hasoir agus taigh Hebeir an Ceneach.

¹⁸ Agus chaidh Iael a‑mach an coinneamh Shisera, agus thubhairt i ris, Tionndaidh a‑steach, mo thighearna, tionndaidh a‑steach am ionnsaigh-sa; na biodh eagal ort. Agus nuair a thionndaidh e a‑steach da h‑ionnsaigh don bhùth, chòmhdaich i e le brat.

¹⁹ Agus thubhairt e rithe, Thoir dhomh, guidheam ort, beagan uisge ra òl, oir tha tart orm: agus dh’fhosgail i searrag bhainne, agus thug i deoch dha, agus chòmhdaich i e.

²⁰ A‑rìs thubhairt e rithe, Seas ann an doras a’ bhùtha, agus ma thig duine agus gum feòraich e dhìot, agus gun abair e, A bheil duine sam bith an seo? An sin their thusa, Chan eil.

²¹ An sin ghabh Iael, bean Hebeir, tarrang den phàillean, agus ghlac i òrd na làimh, agus chaidh i gu sàmhach a‑steach da ionnsaigh, agus bhuail i an tarrang na lethcheann, agus shàth i anns an talamh i; (oir bha e trom na chadal agus sgìth;) agus fhuair e bàs.

²² Agus, feuch, nuair a bha Barac an tòir air Sisera, thàinig Iael a‑mach na choinneamh, agus thubhairt i ris, Thig, agus feuchaidh mise dhut am fear a tha thu ag iarraidh. Agus nuair a chaidh e a‑steach da bùth, feuch, bha Sisera na laighe marbh, agus an tarrang na lethcheann.

²³ Mar sin cheannsaich Dia air an là sin Iabin rìgh Chanàain am fianais chloinn Israeil.

²⁴ Agus shoirbhich le làimh chloinn Israeil, agus bha i trom air Iabin rìgh Chanàain, gus an do chuir iad as do Iabin rìgh Chanàain.