Britheamhan 21 - Am Bìoball Gàidhlig 1992

¹ A‑nis mhionnaich fir Israeil ann am Mispeh, ag ràdh, Cha toir fear air bith againn nighean do Bheniàmin na mnaoi.

² Agus thàinig an sluagh gu taigh Dhè, agus dh’fhan iad an sin gu feasgar am fianais Dhè, agus thog iad suas an guth, agus ghuil iad gu goirt;

³ Agus thubhairt iad, Carson, O Thighearna Dhè Israeil, a thàinig an nì seo gu crìch ann an Israel, gum biodh an‑diugh aon treubh a dh’easbhaidh air Israel?

⁴ Agus air an là màireach dh’èirich an sluagh gu moch, agus thog iad an sin altair, agus dh’ìobair iad ìobairtean-loisgte agus ìobairtean-sìthe.

⁵ Agus thubhairt clann Israeil, Cò am measg uile threubhan Israeil nach tàinig a‑nìos maille ris a’ choitheanal a dh’ionnsaigh an Tighearna? Oir rinn iad mionnan mòra ma thimcheall-san nach tigeadh a‑nìos a dh’ionnsaigh an Tighearna gu Mispeh, ag ràdh, Cuirear gu cinnteach gu bàs e.

⁶ Agus ghabh clann Israeil aithreachas a‑thaobh Bheniàmin, am bràthair, agus thubhairt iad, Ghearradh air falbh an‑diugh aon treubh o Israel.

⁷ Cionnas a nì sinn airson bhan dhaibhsan a mhair, agus gun do mhionnaich sinn air an Tighearna, nach toir sinn dhaibh de ar nigheanan mar mhnathan?

⁸ Agus thubhairt iad, Cia an aon de threubhan Israeil nach tàinig a‑nìos a dh’ionnsaigh an Tighearna gu Mispeh? Agus, feuch, cha tàinig duine don champ o Iabes-ghilead a dh’ionnsaigh a’ choitheanail.

⁹ Oir dh’àirmheadh an sluagh agus, feuch, cha robh neach air bith an sin de luchd-àiteachaidh Iabeis-ghilead.

¹⁰ Agus chuir an coitheanal an sin dà‑mhìle-dheug fear dhiùbhsan a bu trèine, agus dh’àithn iad dhaibh, ag ràdh, Falbhaidh agus buailibh luchd-àiteachaidh Iabeis-ghilead le faobhar a’ chlaidheimh, maille ris na mnathan agus ris a’ chloinn.

¹¹ Agus seo an nì a nì sibh, sgriosaidh sibh gu tur gach fireannach, agus gach bean a laigh le fireannach.

¹² Agus fhuair iad am measg luchd-àiteachaidh Iabeis-ghilead ceithir cheud maighdeann òg, aig nach robh aithne air fear le laighe le fireannach sam bith: agus thug iad don champ iad gu Siloh, a tha ann an tìr Chanàain.

¹³ Agus chuir an coitheanal uile daoine uapa, agus labhair iad ri cloinn Bheniàmin a bha ann an carraig Rimoin, agus ghairm iad orra ann an sìth.

¹⁴ Agus thàinig Beniàmin a‑rìs anns an àm sin; agus thug iad dhaibh mnathan a ghlèidh iad beò de mhnathan Iabeis-ghilead: gidheadh cha d’fhuair iad na bu leòr mar sin.

¹⁵ Agus ghabh an sluagh aithreachas a‑thaobh Bheniàmin, a chionn gun do rinn an Tighearna briseadh ann an treubhan Israeil.

¹⁶ Agus thubhairt seanairean a’ choitheanail, Cionnas a nì sinn airson bhan dhaibhsan a mhair, oir sgriosadh na mnathan a‑mach à Beniàmin?

¹⁷ Agus thubhairt iad, Tha oighreachd ann air an son-san a chaidh as de Bheniàmin: agus cha sgriosar treubh à Israel.

¹⁸ Gidheadh, chan fhaod sinn mnathan a thoirt dhaibh de ar nigheanan fhèin; oir mhionnaich clann Israeil, ag ràdh, Mallaichte gu robh esan a bheir bean do Bheniàmin.

¹⁹ An sin thubhairt iad, Feuch, tha fèill an Tighearna ann an Siloh gach bliadhna, anns an àit a tha air an taobh mu thuath de Bhetel, air an taobh an ear den rathad mhòr a tha a’ dol suas o Bhetel gu Sechem, agus air an taobh mu dheas de Lebonah.

²⁰ Uime sin dh’àithn iad do chloinn Bheniàmin, ag ràdh, Falbhaibh, agus dèanaibh feall-fhalach anns na fìon-liosan;

²¹ Agus seallaibh, agus, feuch, ma thig nigheanan Shiloh a‑mach a dhannsa ann an dannsan, an sin thigibh-se a‑mach as na fìonliosan, agus glacaibh gach fear dhibh a bhean de nigheanan Shiloh, agus rachaibh gu tìr Bheniàmin.

²² Agus tàrlaidh nuair a thig an athraichean no am bràithrean dar n‑ionnsaigh-ne a dhèanamh gearain, gun abair sinn riu, Bithibh bàidheil riu air ar son-ne, a chionn nach do ghlèidh sinn do gach fear a bhean anns a’ chogadh, oir cha tug sibhse dhaibh anns an àm seo, air chor is gum biodh sibh ciontach.

²³ Agus rinn clann Bheniàmin mar sin, agus ghabh iad mnathan dhaibh fhèin a rèir an àireimh, dhiùbhsan a bha a’ dannsa, a ghlac iad; agus chaidh iad agus thill iad a dh’ionnsaigh an oighreachd, agus thog iad suas na bailtean, agus ghabh iad còmhnaidh annta.

²⁴ Agus dh’imich clann Israeil as a sin anns an àm sin, gach duine a dh’ionnsaigh a thrèibhe, agus a dh’ionnsaigh a theaghlaich, agus chaidh iad a‑mach as a sin gach duine a dh’ionnsaigh a oighreachd fhèin.

²⁵ Anns na làithean sin cha robh rìgh air bith ann an Israel: rinn gach duine an nì sin a bha ceart na shùilean fhèin.