Britheamhan 2 - Am Bìoball Gàidhlig 1992

¹ Agus thàinig aingeal an Tighearna a‑nìos o Ghilgal gu Bochim, agus thubhairt e, Thug mi a‑nìos sibh as an Eiphit, agus thug mi a‑steach sibh don fhearann a mhionnaich mi dur n‑athraichean; agus thubhairt mi, Cha bhris mi mo choicheangal ribh gu bràth.

² Agus cha dèan sibh coicheangal sam bith ri luchd-àiteachaidh na tìre seo; tilgidh sibh sìos an altairean: ach cha tug sibh gèill dom ghuth: carson a rinn sibh seo?

³ Uime sin mar an ceudna thubhairt mi, Chan fhuadaich mi a‑mach iad romhaibh; ach bidh iad mar bhioran nur taobhan, agus bidh an diathan nan ribe dhuibh.

⁴ Agus nuair a labhair aingeal an Tighearna na briathran sin ri cloinn Israeil uile, thog an sluagh suas an guth, agus ghuil iad.

⁵ Agus ghairm iad ainm an àite sin Bochim: agus dh’ìobair iad an sin don Tighearna.

⁶ Agus nuair a leig Iosua leis an t‑sluagh imeachd, chaidh clann Israeil, gach duine da oighreachd, a ghabhail seilbh air an fhearann.

⁷ Agus rinn an sluagh seirbhis don Tighearna rè uile làithean Iosua, agus uile làithean nan seanair a mhair beò an dèidh Iosua, a chunnaic uile obraichean mòra an Tighearna, a rinn e airson Israeil.

⁸ Agus fhuair Iosua mac Nuin, òglach an Tighearna, bàs, agus e ceud agus deich bliadhna a dh’aois.

⁹ Agus dh’adhlaic iad e ann an crìch a oighreachd fhèin ann an Timnat-heres, ann an sliabh Ephraim, air an taobh mu thuath de shliabh Ghaais.

¹⁰ Agus chruinnicheadh mar an ceudna an ginealach sin uile a‑chum an athraichean: agus dh’èirich ginealach eile suas nan dèidh, do nach b’aithne an Tighearna, no na h‑obraichean a rinn e airson Israeil.

¹¹ Agus rinn clann Israeil olc ann an sealladh an Tighearna, agus rinn iad seirbhis do Bhàalim.

¹² Agus thrèig iad an Tighearna Dia an athraichean, a thug a‑mach iad à tìr na h‑Eiphit, agus lean iad diathan eile, de dhiathan an t‑sluaigh a bha mun cuairt orra, agus chrom iad iad fhèin sìos dhaibh, agus bhrosnaich iad an Tighearna gu corraich.

¹³ Agus thrèig iad an Tighearna, agus rinn iad seirbhis do Bhàal agus do Astarot.

¹⁴ Agus las corraich an Tighearna an aghaidh Israeil, agus thug e thairis iad do làimh chreachadairean a chreach iad, agus reic e iad do làimh an naimhdean mun cuairt, air chor is nach b’urrainn iad na b’fhaide seasamh an làthair an naimhdean.

¹⁵ Ge bè taobh a chaidh iad a‑mach, bha làmh an Tighearna nan aghaidh a‑chum uilc, mar a thubhairt an Tighearna, agus mar a mhionnaich an Tighearna dhaibh: agus bha iad ann an teinn ro‑mhòir.

¹⁶ Gidheadh thog an Tighearna suas britheamhan, a shaor iad à làimh na muinntir sin a chreach iad.

¹⁷ Gidheadh chan èisdeadh iad rim britheamhan, ach chaidh iad le strìopachas an dèidh dhiathan eile, agus chrom iad iad fhèin dhaibh: thill iad gu grad as an t‑slighe anns an d’imich an athraichean, a’ toirt gèill do àitheantan an Tighearna: cha do rinn iadsan mar sin.

¹⁸ Agus nuair a thog an Tighearna suas dhaibh britheamhan, an sin bha an Tighearna leis a’ bhritheamh, agus shaor e iad à làimh an naimhdean, rè uile làithean a’ bhritheimh: oir ghabh an Tighearna truas dhiubh airson an osnaich o làthair na muinntir sin a rinn ainneart orra, agus a shàraich iad.

¹⁹ Agus nuair a bha am britheamh marbh, thill iad, agus thruaill iad iad fhèin nas mò na an athraichean, ann an leantainn dhiathan eile, gu seirbhis a dhèanamh dhaibh, agus gu cromadh sìos dhaibh; cha do sguir iad on gnìomharan fhèin, no on slighe eas-umhail.

²⁰ Agus las fearg an Tighearna an aghaidh Israeil; agus thubhairt e, A chionn gun do bhris an sluagh seo mo choicheangal a dh’àithn mi dan athraichean, agus nach d’èisd iad rim ghuth,

²¹ Cha chuir mise mar an ceudna, à seo suas, duine sam bith a‑mach romhpa, de na cinnich a dh’fhàg Iosua nuair a fhuair e bàs;

²² A‑chum leòsan gun dearbh mi Israel, an glèidh iad slighe an Tighearna, a dh’imeachd innte, mar a ghlèidh an athraichean i, no nach glèidh.

²³ Uime sin dh’fhàg an Tighearna na cinnich sin, gun am fuadachadh a‑mach gu grad; agus cha tug e thairis iad do làimh Iosua.