Amos 7 - Am Bìoball Gàidhlig 1992

¹ Mar seo thaisbein an Tighearna Iehòbhah dhòmhsa, agus, feuch, dhealbh e lòcaist ann an toiseach teachd a‑nìos an fhàis mu dheireadh; agus, feuch, b’e sin am fàs deireannach, an dèidh buan an rìgh.

² Agus thàrladh nuair a chuir iad crìoch air ithe luibhean na tìre, gun dubhairt mise, O Thighearna Iehòbhah, maith, guidheam ort; cò a thogas suas Iàcob? Oir tha e ro‑bheag.

³ Ghabh an Tighearna aithreachas dheth seo: Cha tachair seo, deir an Tighearna.

⁴ Mar seo thaisbein an Tighearna Iehòbhah dhòmhsa; agus, feuch, ghairm an Tighearna Iehòbhah gu breitheanais le teine, agus loisg e an doimhne mhòr: agus shluig e suas earrann.

⁵ An sin thubhairt mise, O Thighearna Iehòbhah, sguir, guidheam ort: cò a thogas suas Iàcob? Oir tha e ro‑bheag.

⁶ Ghabh an Tighearna aithreachas dheth seo: Cha tachair seo fòs, deir an Tighearna Iehòbhah.

⁷ Mar seo thaisbein e dhomh; agus, feuch, sheas an Tighearna air balla dèante le sreing-riaghailt, agus sreang-riaghailt na làimh.

⁸ Agus thubhairt an Tighearna rium; Ciod tha thu a’ faicinn, Amois? Agus thubhairt mise, Sreang-riaghailt. An sin thubhairt an Tighearna, feuch, cuiridh mise sreang-riaghailt ann am meadhon mo shluaigh Israel; cha ghabh mi nas mò seachad orra tuilleadh.

⁹ Agus cuirear ionadan àrda Isaaic fàs; agus nìthear naomh-ionadan Israeil nan làraich sgaoilte, agus èiridh mise an aghaidh taigh Ierobòaim leis a’ chlaidheamh.

¹⁰ An sin chuir Amasiah, sagart Bheteil, fios gu Ierobòam rìgh Israeil, ag ràdh, Dhealbh Amos foill ad aghaidh ann am meadhon taigh Israeil: chan urrainn am fearann a bhriathran uile a ghiùlan.

¹¹ Oir mar seo tha Amos ag ràdh, Gheibh Ierobòam bàs leis a’ chlaidheamh; agus bheirear Israel gu deimhinn air falbh ann am bruid as an tìr fhèin.

¹² Thubhairt Amasiah mar an ceudna ri Amos, O fhiosaiche, falbh, teich thusa gu tìr Iùdah, agus ith aran an sin, agus an sin dèan fàistneachd:

¹³ Ach na dèan fàistneachd nas mò ann am Betel: oir is e sin naomh-ionad an rìgh, agus is e sin teach na rìoghachd.

¹⁴ An sin fhreagair Amos, agus thubhairt e ri Amasiah, Cha b’fhàidh mise, cha mhò a bu mhac fàidh mi; ach bu bhuachaille sprèidhe mi, agus fear-tionail meas sicamoir:

¹⁵ Agus thug an Tighearna mi o bhith a’ leantainn an treud: agus thubhairt an Tighearna rium, Falbh, dèan fàistneachd dom phoball Israel.

¹⁶ A‑nis uime sin, cluinn thusa facal an Tighearna: tha thu ag ràdh, Na dèan fàistneachd an aghaidh Israeil, agus na sileadh d’fhacal an aghaidh taigh Isaaic.

¹⁷ Air an adhbhar sin, mar seo tha an Tighearna ag ràdh, Bidh do bhean na strìopaich anns a’ bhaile, agus tuitidh do mhic agus do nigheanan leis a’ chlaidheamh; agus bidh d’fhearann air a roinn leis an t‑sreing: agus gheibh thu bàs ann am fearann truaillte, agus thèid Israel gu deimhinn air falbh ann am bruid, a‑mach as a dhùthaich fhèin.