Àireamh 9 - Am Bìoball Gàidhlig 1992

¹ Agus labhair an Tighearna ri Maois ann am fàsach Shinài, anns a’ chiad mhìos den dara bliadhna an dèidh dhaibh teachd a‑mach à tìr na h‑Eiphit, ag ràdh,

² Cumadh, mar an ceudna, clann Israeil a’ chàisg na h‑àm suidhichte fhèin.

³ Anns a’ cheathramh-là‑deug den mhìos seo, air feasgar, cumaidh sibh i na h‑àm suidhichte fhèin, a rèir a h‑òrdaighean uile, agus a rèir a deas-ghnàthan uile, cumaidh sibh i.

⁴ Agus labhair Maois ri cloinn Israeil, iad a chumail na càisge.

⁵ Agus chùm iad a’ chàisg air a’ cheathramh-là‑deug den chiad mhìos air feasgar, ann am fàsach Shinài: a rèir gach nì a dh’àithn an Tighearna do Mhaois, mar sin rinn clann Israeil.

⁶ Agus bha daoine àraidh a shalaicheadh le corp duine mhairbh, air chor is nach b’urrainn iad a’ chàisg a chumail air an là sin; agus thàinig iad an làthair Mhaois agus an làthair Aaroin air an là sin.

⁷ Agus thubhairt na daoine sin ris, Tha sinne air ar salachadh le corp duine mhairbh: carson a chumar air ar n‑ais sinn, a‑chum is nach faod sinn tabhartas an Tighearna a thoirt seachad na àm suidhichte fhèin am measg chloinn Israeil?

⁸ Agus thubhart Maois riu, Seasaibh an sin, agus cluinnidh mise ciod a dh’àithneas an Tighearna dur taobh.

⁹ Agus labhair an Tighearna ri Maois, ag ràdh,

¹⁰ Labhair ri cloinn Israeil, ag ràdh, Ma bhios duine sam bith dhibh, no de ur sliochd, air a shalachadh le corp marbh, no ma bhios e air thuras fad air astar, gidheadh cumaidh e a’ chàisg don Tighearna.

¹¹ Anns a’ cheathramh-là‑deug den dara mìos air feasgar cumaidh iad i: le aran neo-ghortaichte, agus le lusan searbha ithidh iad i.

¹² Chan fhàg iad a’ bheag dhith gu madainn, cha mhò a bhriseas iad cnàimh dhith: a rèir uile òrdaighean na càisge cumaidh iad i.

¹³ Ach an duine a tha glan, agus nach eil air thuras, agus a dhearmadas a’ chàisg a chumail; gearrar eadhon an t‑anam sin fhèin as o a shluagh, a chionn nach tug e seachad tabhartas an Tighearna na àm suidhichte: giùlainidh an duine sin a pheacadh.

¹⁴ Agus ma bhios coigreach air chuairt nur measg, agus gun cùm e a’ chàisg don Tighearna, a rèir òrdagh na càisge, agus a rèir a gnàtha, mar sin nì e: bidh aon òrdagh agaibh araon airson a’ choigrich, agus air a shon-san a rugadh anns an tìr.

¹⁵ Agus air an là anns an do thogadh suas am pàillean, chòmhdaich an neul am pàillean, eadhon bùth na Fianais; agus air feasgar bha air a’ phàillean mar gum bu choslas teine gus a’ mhadainn.

¹⁶ Mar sin bha e a‑ghnàth: chòmhdaich an neul e anns an là, agus coslas teine anns an oidhche.

¹⁷ Agus nuair a thogadh an neul suas on phàillean, an sin gun dàil ghabh clann Israeil an turas: agus anns an ionad anns an do stad an neul, ann an sin champaich clann Israeil.

¹⁸ Air àithne an Tighearna ghabh clann Israeil an turas, agus air àithne an Tighearna champaich iad: am feadh is a dh’fhan an neul air a’ phàillean, dh’fhan iad nam bùthan.

¹⁹ Agus nuair a dh’fhan an neul air a’ phàillean mòran de làithean, an sin ghlèidh clann Israeil freasdal an Tighearna, agus cha d’imich iad.

²⁰ Agus nuair a bha an neul beagan de làithean air a’ phàillean, a rèir àithne an Tighearna dh’fhan iad nam bùthan, agus a rèir àithne an Tighearna ghabh iad an turas.

²¹ Agus nuair a dh’fhan an neul o fheasgar gu madainn, agus a thogadh an neul suas anns a’ mhadainn, an sin ghabh iad an turas: ma b’ann anns an là no anns an oidhche a thogadh an neul suas, ghabh iad an turas.

²² No co‑dhiù a b’ann dà là, no mìos, no bliadhna, a dh’fhan an neul air a’ phàillean, a’ fuireach air, dh’fhan clann Israeil nam bùthan, agus cha d’imich iad: ach nuair a thogadh suas e, ghabh iad an turas.

²³ A rèir àithne an Tighearna dh’fhan iad nam bùthan, agus a rèir àithne an Tighearna ghabh iad an turas: ghlèidh iad freasdal an Tighearna, a rèir àithne an Tighearna le làimh Mhaois.