Àireamh 7 - Am Bìoball Gàidhlig 1992

¹ Agus thàrladh air an là anns an do chuir Maois suas am pàillean gu h‑iomlan, agus anns an d’ung e e, agus anns an do naomhaich e e, agus a uidheam uile, araon an altair agus a soithichean uile, agus anns an d’ung e iad, agus anns an do naomhaich e iad;

² Gun tug ceannardan Israeil, cinn taighean an athraichean (eadhon ceannardan nan treubh, a bha os cionn na muinntir a chaidh àireamh), seachad tabhartas:

³ Agus thug iad an tabhartas an làthair an Tighearna, sia feunan còmhdaichte, agus dà‑dhamh-dheug: feun airson dithis de na ceannardan, agus damh airson gach fir dhiubh, agus thug iad air beulaibh a’ phàillein iad.

⁴ Agus labhair an Tighearna ri Maois, ag ràdh,

⁵ Gabh uapa iad, a‑chum is gum bi iad a dhèanamh seirbhis pàillean a’ choitheanail; agus bheir thu iad do na Lèbhitich, do gach fear a rèir a sheirbhis.

⁶ Agus ghabh Maois na feunan agus na daimh, agus thug e do na Lèbhitich iad.

⁷ Dà fheun agus ceithir daimh thug e do mhic Ghersoin, a rèir an seirbhis.

⁸ Agus ceithir feunan agus ochd daimh thug e do mhic Mherari, a rèir an seirbhis, fo làimh Itamair mhic Aaroin an sagart.

⁹ Ach do mhic Chohait cha tug e aon air bith; a chionn gum b’i seirbhis an ionaid naoimh a bhuineadh dhaibh-san, gun giùlaineadh iad air an guaillean.

¹⁰ Agus thug na ceannardan seachad tabhartas a‑chum coisrigeadh na h‑altarach, air an là anns an d’ungadh i: thug eadhon na ceannardan seachad an tabhartas air beulaibh na h‑altarach.

¹¹ Agus thubhairt an Tighearna ri Maois, Bheir gach ceannard seachad a thabhartas air a là fhèin, a‑chum coisrigeadh na h‑altarach.

¹² Agus esan a thug seachad a thabhartas air a’ chiad là, b’e Nahson mac Aminadaib, de threubh Iùdah.

¹³ Agus b’e a thabhartas aon mhias airgid, dom bu chudthrom ceud agus deich seceil ar fhichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

¹⁴ Aon spàin de dheich seceil òir, làn de thùis:

¹⁵ Aon tarbh òg, aon reithe, aon uan den chiad bhliadhna, a‑chum ìobairt-loisgte:

¹⁶ Aon mheann de na gobhair a‑chum ìobairt-pheacaidh:

¹⁷ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Nahsoin mhic Aminadaib.

¹⁸ Air an dara là thug Mataneel mac Shuair, ceannard Isachair, seachad tabhartas.

¹⁹ Thug e seachad mar a thabhartas aon mhias airgid, dom bu chudthrom ceud agus deich seceil ar fhichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

²⁰ Aon spàin òir de dheich seceil, làn de thùis:

²¹ Aon tarbh òg, aon reithe, aon uan den chiad bhliadhna, a‑chum ìobairt-loisgte:

²² Aon mheann de na gobhair a‑chum ìobairt-pheacaidh:

²³ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Nàtaneeil mhic Shuair.

²⁴ Air an treas là thug Eliab mac Heloin, ceannard chloinn Shebuluin, seachad tabhartas.

²⁵ B’e a thabhartas-san aon mhias airgid, dom bu chudthrom ceud agus deich seceil ar fhichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

²⁶ Aon spàin òir de dheich seceil, làn de thùis:

²⁷ Aon tarbh òg, aon reithe, aon uan den chiad bhliadhna, a‑chum ìobairt-loisgte:

²⁸ Aon mheann de na gobhair a‑chum ìobairt-pheacaidh:

²⁹ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Eliaib mhic Heloin.

³⁰ Air a’ cheathramh là thug Elisur mac Shedeuir, ceannard chloinn Reubein, seachad tabhartas.

³¹ B’e a thabhartas aon mhias airgid de cheud agus deich seceil ar fhichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

³² Aon spàin òir de dheich seceil, làn de thùis:

³³ Aon tarbh òg, aon reithe, aon uan den chiad bhliadhna, a‑chum ìobairt-loisgte:

³⁴ Aon mheann de na gobhair a‑chum ìobairt-pheacaidh:

³⁵ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Elisuir mhic Shedeuir.

³⁶ Air a’ chòigeamh là thug Selumiel mac Shurisadai, ceannard chloinn Shimeoin, seachad tabhartas.

³⁷ B’e a thabhartas-san aon mhias airgid, dom bu chudthrom ceud agus deich seceil ar fhichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

³⁸ Aon spàin òir de dheich seceil, làn de thùis:

³⁹ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁴⁰ Aon mheann de na gobhair a‑chum ìobairt-pheacaidh:

⁴¹ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Shelumieil mhic Shurisadal.

⁴² Air an t‑siathamh là thug Eliasaph mac Dheueil, ceannard chloinn Ghad, seachad tabhartas.

⁴³ B’e a thabhartas-san aon mhias airgid, dom bu chudthrom ceud agus deich seceil ar fichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

⁴⁴ Aon spàin òir de dheich seceil, làn de thùis:

⁴⁵ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁴⁶ Aon mheann de na gobhair a‑chum ìobairt-pheacaidh:

⁴⁷ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Eliasaiph mhic Dheueil.

⁴⁸ Air an t‑seachdamh là thug Elisama mac Amihuid, ceannard chloinn Ephraim, seachad tabhartas.

⁴⁹ B’e a thabhartas-san aon mhias airgid, dom bu chudthrom ceud agus deich seceil ar fichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

⁵⁰ Aon spàin òir de dheich seceil, làn de thùis:

⁵¹ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁵² Aon mheann de na gobhair a‑chum ìobairt-pheacaidh:

⁵³ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Elisama mhic Amihuid.

⁵⁴ Air an ochdamh là thug Gamaliel mac Phedahsuir, ceannard chloinn Mhanaseh, seachad tabhartas.

⁵⁵ B’e a thabhartas-san aon mhias airgid de cheud agus deich seceil ar fichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

⁵⁶ Aon spàin òir de dheich seceil, làn de thùis:

⁵⁷ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁵⁸ Aon mheann de na gobhair a‑chum ìobairt-pheacaidh:

⁵⁹ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Ghamalieil mhic Phedahsuir.

⁶⁰ Air an naoidheamh là thug Abidan mac Ghideoni, ceannard chloinn Bheniàmin, seachad tabhartas.

⁶¹ B’e a thabhartas-san aon mhias airgid, dom bu chudthrom ceud agus deich seceil ar fichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

⁶² Aon spàin òir de dheich seceil, làn de thùis:

⁶³ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁶⁴ Aon mheann de na gobhair a‑chum ìobairt-pheacaidh:

⁶⁵ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Abidain mhic Ghideoni.

⁶⁶ Air an deicheamh là thug Ahieser mac Amisadai, ceannard chloinn Dhan, seachad tabhartas.

⁶⁷ B’e a thabhartas-san aon mhias airgid, dom bu chudthrom ceud agus deich seceil ar fichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

⁶⁸ Aon spàin òir de dheich seceil, làn de thùis:

⁶⁹ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁷⁰ Aon mheann de na gobhair a‑chum ìobairt-pheacaidh:

⁷¹ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Ahieseir mhic Amisadai.

⁷² Air an aon-là‑deug thug Pagiel mac Ocrain, ceannard chloinn Aseir, seachad tabhartas.

⁷³ B’e a thabhartas-san aon mhias airgid, dom bu chudthrom ceud agus deich seceil ar fichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

⁷⁴ Aon spàin òir de dheich seceil, làn de thùis:

⁷⁵ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁷⁶ Aon mheann de na gobhair a‑chum ìobairt-pheacaidh:

⁷⁷ Agus a‑chum ìobairt nan tabhartas-sìthe, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Phagieil mhic Ocrain.

⁷⁸ Air an dara-là‑deug thug Ahira mac Enain, ceannard chloinn Naphtali, seachad tabhartas.

⁷⁹ B’e a thabhartas-san aon mhias airgid, dom bu chudthrom ceud agus deich seceil ar fichead, aon chuach airgid de dheich agus trì-fichead secel, a rèir secel an ionaid naoimh, iad le chèile làn de fhlùr mìn measgte le ola, a‑chum tabhartais-bìdh:

⁸⁰ Aon spàin òir de dheich seceil, làn de thùis:

⁸¹ Aon tarbh òg, aon reithe, aon uan den chiad bhliadhna, a‑chum ìobairt-loisgte:

⁸² Aon mheann de na gobhair a‑chum ìobairt-pheacaidh:

⁸³ Agus a‑chum ìobairt nan tabhartas-sìth, dà tharbh, còig reitheachan, còig buic-ghoibhre, còig uain den chiad bhliadhna. B’e seo tabhartas Ahira mhic Enain.

⁸⁴ B’e seo coisrigeadh na h‑altarach (anns an là anns an d’ungadh i) le ceannardan Israeil: dà‑mhias-dheug airgid, dà‑chuaich-dheug airgid, dà‑spàin-dheug òir:

⁸⁵ B’e cudthrom gach mèis airgid ceud agus deich seceil ar fhichead, agus gach cuaiche deich agus trì-fichead: b’e cudthrom nan soithichean airgid uile, dà mhìle agus ceithir cheud seceil, a rèir secel an ionaid naoimh.

⁸⁶ Bha dà‑spàin-dheug òir ann, làn de thùis, cudthrom gach aon fa leth deich seceil, a rèir secel an ionaid naoimh: b’e òr nan spàinean uile ceud agus fichead secel.

⁸⁷ B’iad na tairbh uile a‑chum ìobairt-loisgte dà‑tharbh-dheug, na reitheachan a dhà-dheug, na h‑uain den chiad bhliadhna a dhà-dheug, maille rin tabhartas-bìdh: agus na minn de na gobhair a‑chum ìobairt-pheacaidh a dhà-dheug.

⁸⁸ Agus b’iad na tairbh uile, a‑chum ìobairt nan tabhartas-sìth, ceithir tairbh ar fhichead, na reitheachan trì-fichead, na buic-ghoibhre trì-fichead, na h‑uain den chiad bhliadhna trì-fichead. B’e seo coisrigeadh na h‑altarach, an dèidh dhi a bhith air a h‑ungadh.

⁸⁹ Agus nuair a chaidh Maois a‑steach do phàillean a’ choitheanail, a labhairt ris, an sin chuala e guth aoin a’ labhairt ris o uachdar na cathair-thròcair a bha os cionn àirc na Fianais, o eadar an dà cherub; agus labhair e ris.