Àireamh 3 - Am Bìoball Gàidhlig 1992

¹ Is iad seo mar an ceudna ginealaichean Aaroin agus Mhaois, anns an là anns an do labhair an Tighearna ri Maois ann an sliabh Shinài.

² Agus is iad seo ainmean mic Aaroin; Nàdab an ciad-ghin, agus Abihu, Eleàsar, agus Itamar.

³ Is iad sin ainmean mic Aaroin, na sagartan a dh’ungadh, a choisrig e gu frithealadh ann an dreuchd an t‑sagairt.

⁴ Agus fhuair Nàdab agus Abihu bàs an làthair an Tighearna, nuair a thug iad suas teine coimheach an làthair an Tighearna, ann am fàsach Shinài, agus cha robh clann aca: agus fhritheil Eleàsar agus Itamar ann an dreuchd an t‑sagairt, ann an sealladh Aaroin an athair.

⁵ Agus labhair an Tighearna ri Maois, ag ràdh,

⁶ Thoir treubh Lèbhi am fagas, agus taisbein iad an làthair Aaroin an sagart, a‑chum is gum fritheil iad dha.

⁷ Agus gleidhidh iad a chùram-san, agus cùram a’ choitheanail uile, air beulaibh pàillean a’ choitheanail a dhèanamh seirbhis a’ phàillein.

⁸ Agus gleidhidh iad uile shoithichean pàillean a’ choitheanail, agus cùram chloinn Israeil, a dhèanamh seirbhis a’ phàillein.

⁹ Agus bheir thu na Lèbhithich do Aaron, agus da mhic: tha iad air an tabhairt dha gu h‑iomlan a‑mach à cloinn Israeil.

¹⁰ Agus òrdaichidh tu Aaron agus a mhic, agus feithidh iadsan air dreuchd an t‑sagairt: agus cuirear an coigreach, a thig am fagas, gu bàs.

¹¹ Agus labhair an Tighearna ri Maois, ag ràdh,

¹² Agus mise, feuch, ghabh mi na Lèbhithich o mheasg chloinn Israeil, an àit a’ chiad-ghin uile a dh’fhosglas a’ bhrù am measg chloinn Israeil: agus is leamsa na Lèbhithich;

¹³ A chionn gur leamsa gach uile chiad-ghin; oir air an là anns an do bhuail mi gach ciad-ghin ann an tìr na h‑Eiphit, naomhaich mi dhomh fhèin gach ciad-ghin ann an Israeil, eadar dhuine agus ainmhidh; is leamsa iad: Is mise an Tighearna.

¹⁴ Agus labhair an Tighearna ri Maois ann am fàsach Shinài, ag ràdh,

¹⁵ Àireamh clann Lèbhi a rèir taighean an athraichean, a rèir an teaghlaichean: gach fireannach o mhìos a dh’aois agus os a chionn àirmhidh tu iad.

¹⁶ Agus dh’àireamh Maois iad a rèir facal an Tighearna, mar a thugadh àithne dha.

¹⁷ Agus b’iad seo mic Lèbhi a rèir an ainmean: Gerson, agus Cohat, agus Merari.

¹⁸ Agus is iad seo ainmean mic Ghersoin a rèir an teaghlaichean: Libni agus Simei.

¹⁹ Agus mic Chohait a rèir an teaghlaichean: Amram, agus Idsar, Hebron, agus Udsiel.

²⁰ Agus mic Mherari a rèir an teaghlaichean: Mahli, agus Musi: is iad sin teaghlaichean nan Lèbhitheach, a rèir taighean an athraichean.

²¹ O Gherson bha teaghlach Libni, agus teaghlach Shimei: is iad sin teaghlaichean nan Gersonach.

²² Iadsan a chaidh àireamh dhiubh, a rèir àireamh nam fireannach uile, o mhìos a dh’aois agus os a chionn, eadhon iadsan a chaidh àireamh dhiubh, b’iad seachd mìle agus còig ceud.

²³ Suidhichidh teaghlaichean nan Gersonach air cùlaibh a’ phàillein air taobh na h‑àird an iar.

²⁴ Agus bidh Eliasaph mac Laeil na cheann-taighe athraichean nan Gersonach.

²⁵ Agus air cùram mic Ghersoin, ann am pàillean a’ choitheanail, bidh am pàillean, agus am bùth, a chòmhdach, agus am brat airson doras pàillean a’ choitheanail,

²⁶ Agus cùirteanan na cùirte, agus am brat airson doras na cùirte, a tha làimh ris a’ phàillean, agus làimh ris an altair mun cuairt, agus a cùird, airson a seirbhis uile.

²⁷ Agus o Chohat bha teaghlach nan Amramach, agus teaghlach nan Idseharach, agus teaghlach nan Hebronach, agus teaghlach nan Udsielach: is iad sin teaghlaichean nan Cohatach.

²⁸ Ann an àireamh nam fireannach uile o mhìos a dh’aois agus os a chionn bha ochd mìle agus sia ceud, a bha a’ gleidheadh cùram an ionaid naoimh.

²⁹ Suidhichidh teaghlaichean mic Chohait air taobh a’ phàillein mu dheas.

³⁰ Agus bidh Elisaphan mac Udsieil na cheann-taighe athair-theaghlaichean nan Cohatach.

³¹ Agus air an cùram-san bidh an àirc, agus am bòrd, agus an coinnleir, agus na h‑altairean, agus soithichean an ionaid naoimh, leis am fritheil iad, agus am brat, agus a sheirbhis uile.

³² Agus bidh Eleàsar, mac Aaroin an sagart, na cheannard air ceannardan nan Lèbhitheach, agus bidh sùil aige orrasan a bhios a’ gleidheadh cùram an ionaid naoimh.

³³ O Mherari bha teaghlach nam Mahlach, agus teaghlach nam Musitheach: is iad sin teaghlaichean Mherari.

³⁴ Agus iadsan a chaidh àireamh dhiubh, a rèir àireamh nam fireannach uile, o mhìos a dh’aois agus os a chionn, b’iad sia mìle agus dà cheud.

³⁵ Agus b’e Suriel mac Abihail ceann-taighe athair-theaghlaichean Mherari; suidhichidh iadsan air taobh a’ phàillein mu thuath.

³⁶ Agus fo choimhead agus chùram mic Mherari bidh bùird a’ phàillein, agus a chroinn, agus a phuist, agus a bhuinn, agus a shoithichean uile, agus gach nì a fhrithealas dha,

³⁷ Agus puist na cùirte mun cuairt, agus am buinn, agus am pinneachan, agus an cùird.

³⁸ Ach iadsan a champaicheas air beulaibh a’ phàillein air taobh na h‑àird an ear, eadhon air beulaibh pàillean a’ choitheanail leth ri èirigh na grèine, is iad Maois, agus Aaron, agus a mhic, a’ gleidheadh cùram an ionaid naoimh, airson cùram chloinn Israeil; agus cuirear an coigreach, a thig am fagas, gu bàs.

³⁹ Iadsan uile a chaidh àireamh de na Lèbhithich, a dh’àireamh Maois agus Aaron a rèir àithne an Tighearna, a rèir an teaghlaichean, na fireannaich uile o mhìos a dh’aois agus os a chionn, b’iad dà mhìle ar fhichead.

⁴⁰ Agus thubhairt an Tighearna ri Maois, Gabh àireamh gach ciad-ghin a tha na fhireannach de chloinn Israeil o mhìos a dh’aois agus os a chionn, agus gabh àireamh an ainmean.

⁴¹ Agus gabhaidh tu na Lèbhithich dhòmhsa (Is mise an Tighearna), an àite nan ciad-ghin uile am measg chloinn Israeil; agus sprèidh nan Lèbhitheach an àite nan ciad-ghin uile am measg sprèidh chloinn Israeil.

⁴² Agus dh’àireamh Maois, mar a dh’àithn an Tighearna dha, gach ciad-ghin am measg chloinn Israeil.

⁴³ Agus gach ciad-ghin a bha na fhireannach, a rèir àireamh nan ainmean, o mhìos a dh’aois agus os a chionn, dhiubhsan a chaidh àireamh dhiubh, b’iad dà mhìle ar fhichead, dà cheud agus trì-fichead agus trì-deug.

⁴⁴ Agus labhair an Tighearna ri Maois, ag ràdh,

⁴⁵ Gabh na Lèbhithich an àite nan ciad-ghin uile am measg chloinn Israeil, agus sprèidh nan Lèbhitheach an àite an sprèidhe-san, agus bidh na Lèbhithich leamsa: Is mise an Tighearna.

⁴⁶ Agus air an son-san a tha gu bhith air am fuasgladh den dà cheud agus an trì-fichead agus an trì-deug, de chiad-ghin chloinn Israeil, a tha nas lìonmhoire na na Lèbhithich;

⁴⁷ Gabhaidh tu eadhon còig seceil am fear air an ceann; a rèir secel an ionaid naoimh gabhaidh tu iad: is e an secel fichead gerah.

⁴⁸ Agus bheir thu an t‑airgead, leis am fuasglar an àireamh chòrr dhiubh, do Aaron agus da mhic.

⁴⁹ Agus ghabh Maois an t‑airgead fuasglaidh uapasan a bha a thuilleadh orrasan a dh’fhuasgladh leis na Lèbhithich.

⁵⁰ O chiad-ghin chloinn Israeil ghabh e an t‑airgead: mìle trì cheud agus trì-fichead agus còig seceil, a rèir secel an ionaid naoimh.

⁵¹ Agus thug Maois airgead na muinntir sin a dh’fhuasgladh do Aaron agus da mhic, a rèir facal an Tighearna, mar a dh’àithn an Tighearna do Mhaois.