Àireamh 12 - Am Bìoball Gàidhlig 1992

¹ Agus labhair Miriam agus Aaron an aghaidh Mhaois airson na mnà o Etiopia, a phòs e; oir bha e air pòsadh mnà o Etiopia.

² Agus thubhairt iad, An do labhair an Tighearna da‑rìribh le Maois a‑mhàin? Nach do labhair e mar an ceudna leinne? Agus chuala an Tighearna e.

³ (A‑nis bha an duine Maois ro‑chiùin, thar nan uile dhaoine a bha air aghaidh na talmhainn.)

⁴ Agus labhair an Tighearna gu grad ri Maois, agus ri Aaron, agus ri Miriam, Thigibh a‑mach sibhse nur triùir gu pàillean a’ choitheanail. Agus thàinig iad nan triùir a‑mach.

⁵ Agus thàinig an Tighearna a‑nuas ann am meall neòil, agus sheas e ann an doras a’ phàillein, agus ghairm e air Aaron agus Miriam: agus thàinig iad le chèile a‑mach.

⁶ Agus thubhairt e, Eisdibh a‑nis rim bhriathran-sa: Ma tha fàidh nur measg, nì mise an Tighearna mi fhèin aithnichte dha ann an taisbeanadh, agus labhraidh mi ris ann am bruadar.

⁷ Chan ann mar sin dom sheirbhiseach Maois, a tha fìrinneach ann am thaigh uile.

⁸ Beul ri beul labhraidh mi ris-san, eadhon gu soilleir, agus chan ann am briathran dorcha, agus chì e coslas an Tighearna: carson matà nach robh eagal oirbh labhairt an aghaidh mo sheirbhisich Maois?

⁹ Agus las fearg an Tighearna nan aghaidh, agus dh’fhalbh e.

¹⁰ Agus dh’fhalbh an neul bhàrr a’ phàillein, agus, feuch, rinneadh Miriam na lobhar, geal mar shneachda: agus dh’amhairc Aaron air Miriam, agus, feuch, bha i na lobhar.

¹¹ Agus thubhairt Aaron ri Maois, Och! mo thighearna, guidheam ort, na cuir am peacadh as ar leth, leis an do rinn sinn gu h‑amaideach, agus leis an do pheacaich sinn.

¹² Na biodh i mar aon marbh, da bheil an fheòil air a leth-chaitheamh, nuair a thig e a‑mach à broinn a mhàthar.

¹³ Agus ghlaodh Maois ris an Tighearna, ag ràdh, Leighis i a‑nis, O Dhè, guidheam ort.

¹⁴ Agus thubhairt an Tighearna ri Maois, Nan tilgeadh a h‑athair ach smugaid na h‑aodann, nach bu chòir dhi a bhith fo nàire seachd làithean? Druidear a‑mach on champ i rè seachd làithean, agus na dhèidh sin gabhar a‑steach i a‑rìs.

¹⁵ Agus dhruideadh Miriam a‑mach on champ seachd làithean: agus cha do ghabh an sluagh an turas, gus an tugadh Miriam a‑steach a‑rìs.

¹⁶ Agus na dhèidh sin dh’imich an sluagh o Haserot, agus champaich iad ann am fàsach Phàrain.