2 Timòteus 2 - Am Bìoball Gàidhlig 1992

¹ Uime sin bi‑sa, a mhic, làidir anns a’ ghràs a tha ann an Iosa Crìosd.

² Agus na nithean a chuala tu uamsa am measg mòran fhianaisean, earb thusa na nithean sin fhèin ri daoine fìrinneach, a bhios iomchaidh daoine eile a theagasg mar an ceudna.

³ Fuiling thusa uime sin cruaidh-chàs, mar dheagh shaighdear Iosa Crìosd.

⁴ Cha dèan neach sam bith a leanas an cogadh e fhèin a ribeadh ann an gnothaichean na beatha seo: a‑chum gun toilich e an tì a thagh e gu bhith na shaighdear.

⁵ Agus mar an ceudna ged nì fear air bith spàirn, cha chrùnar e mura dèan e spàirn gu dligheach.

⁶ Is còir don treabhaiche a shaothraicheas air tùs, co‑roinn fhaotainn den toradh.

⁷ Smaoinich air na nithean a tha mi ag ràdh; agus gun tugadh an Tighearna dhut tuigse anns na h‑uile nithean.

⁸ Cuimhnich gun do thogadh o na mairbh Iosa Crìosd, de shìol Dhaibhidh, a rèir mo shoisgeil-sa;

⁹ Airson a bheil mise a’ fulang mar fhear droch-bheairt, eadhon gu gèimhlean; ach chan eil facal Dhè ceangailte.

¹⁰ Uime sin tha mi ag iomchar nan uile nithean airson nan daoine taghte, a‑chum gum faigh iadsan mar an ceudna an t‑slàinte a tha ann an Iosa Crìosd, maille ri glòir shìorraidh.

¹¹ Is ràdh fìor seo, Ma bhàsaicheas sinn maille ris, gum bi sinn beò mar an ceudna maille ris:

¹² Ma dh’fhuilingeas sinn, rìghichidh sinn mar an ceudna maille ris: ma dh’àicheas sinn e, àichidh esan sinne mar an ceudna:

¹³ Mura creid sinne, gidheadh tha esan a’ fantainn fìrinneach; chan eil e an comas dha e fhèin àicheadh.

¹⁴ Cuir na nithean sin an cuimhne dhaibh, a’ cur sparraidh orra am fianais an Tighearna, gun iad a bhith a’ connsachadh mu fhacail anns nach eil tairbhe sam bith, ach a thilgeas bun-os‑cionn an luchd-èisdeachd.

¹⁵ Dèan dìcheall air thu fhèin a nochdadh dearbhte do Dhia, ad shaothraiche nach ruig a leas nàire a ghabhail, a’ roinn facal na fìrinn gu ceart.

¹⁶ Ach seachainn faoin-chainnt mhì-naomh; oir thèid iad air aghaidh a‑chum an tuilleadh mì‑dhiadhachd.

¹⁷ Agus ithidh am facal mar chnàmhainn; dem bheil Himenèus agus Philètus;

¹⁸ Muinntir a‑thaobh na fìrinn a chaidh air seachran, ag ràdh gun deachaidh an aiseirigh cheana seachad; agus a tha a’ tilgeadh creideamh dream àraidh bun-os‑cionn.

¹⁹ Gidheadh, tha bunait Dhè a’ seasamh daingeann, aig a bheil an seula seo, Is aithne don Tighearna an dream sin as leis. Agus, gach neach a tha ag ainmeachadh ainm Chrìosd, trèigeadh e eucoir.

²⁰ Ach ann an taigh mòr chan e a‑mhàin gu bheil soithichean òir, agus airgid, ach mar an ceudna soithichean fiodha, agus creadha; agus cuid dhiubh a‑chum urraim, agus cuid eile a‑chum eas-urraim.

²¹ Uime sin ma ghlanas neach e fhèin uapa seo, bidh e na shoitheach a‑chum urraim, air a naomhachadh, agus iomchaidh a‑chum feum a’ mhaighistir, deas a‑chum gach uile dheagh obrach.

²² Teich uime sin o ana-miannan na h‑òige: ach lean fìreantachd, creideamh, gràdh, sìth, maille riùsan a tha a’ gairm air an Tighearna o chridhe glan.

²³ Ach seachainn ceistean amaideach agus neo-fhòghlaimte, air dhut fios a bhith agad gun tog iad connsachadh.

²⁴ Agus chan fhaod òglach an Tighearna a bhith connspaideach; ach ciùin ris na h‑uile dhaoine, ealamh a‑chum teagaisg, foighidinneach,

²⁵ Ann an ceannsachd a’ teagasg na dream a sheasas na aghaidh; a dh’fheuchainn an toir Dia uair air bith aithreachas dhaibh, a‑chum aidmheil na fìrinn;

²⁶ Agus air mosgladh dhaibh gun tèid iad as o ribe an diabhail, aig a bheil iad air am beò-ghlacadh a‑chum a thoile.