2 Samuel 4 - Am Bìoball Gàidhlig 1992

¹ Agus nuair a chuala mac Shauil gun d’fhuair Abner bàs ann an Hebron, dh’fhàs a làmhan fann, agus bha Israel uile fo bhuaireas.

² Agus bha aig mac Shauil dithis fhear a bha nan ceannardan air buidhnean; b’e ainm aoin dhiubh Baanah, agus ainm an fhir eile Rechab, mic Rimoin am Beerotach, de chloinn Bheniàmin: (oir mheasadh Beerot mar an ceudna de Bheniàmin:

³ Agus theich na Beerotaich gu Gitaim, agus tha iad nan luchd-cuairt an sin gu ruig an là‑an‑diugh:)

⁴ Agus bha aig Ionatan mac Shauil mac a bha bacach, agus a bha còig bliadhna a dh’aois nuair a thàinig an sgeul mu Shaul agus Ionatan à Iesreel; agus thog a bhanaltram leatha e, agus theich i: agus nuair a rinn i cabhag gu teicheadh, thuit esan, agus rinneadh bacach e; agus b’e a ainm Mephiboset.

⁵ Agus dh’imich mic Rimoin am Beerotach, Rechab agus Baanah, agus thàinig iad mu theas an là gu taigh Isboseit, a bha na laighe air leabaidh mu mheadhon-là.

⁶ Agus, feuch, thàinig iad air an aghaidh gu meadhon an taighe, mar gum biodh iad gu cruithneachd a thoirt leo, agus bhuail iad e fon chòigeamh aisne: agus chaidh Rechab agus a bhràthair Baanah as:

⁷ Oir nuair a thàinig iad a‑steach don taigh, bha esan na laighe air a leabaidh na sheòmar-cadail, agus bhuail iad e, agus mharbh iad e, agus chuir iad an ceann dheth, agus thug iad leo a cheann, agus dh’imich iad romhpa air slighe an fhàsaich rè na h‑oidhche.

⁸ Agus thug iad ceann Isboseit a dh’ionnsaigh Dhaibhidh gu Hebron, agus thubhairt iad ris an rìgh, Feuch, ceann Isboseit mhic Shauil do nàmhaid, a dh’iarr d’anam; agus thug an Tighearna dom thighearna, an rìgh, dìoghaltas air an là‑an‑diugh air Saul agus air a shliochd.

⁹ Agus fhreagair Daibhidh Rechab agus Baanah a bhràthair, mic Rimoin am Beerotach, agus thubhairt e riu, Mar as beò an Tighearna, a shaor m’anam as gach uile airc,

¹⁰ Nuair a dh’innis neach dhomh, ag ràdh, Feuch, tha Saul marbh (agus e a’ meas gu robh e a’ toirt deagh sgeòil leis) rug mi air, agus mharbh mi e ann an Siclag, nuair a shaoil e gun tugainn luigheachd dha airson a sgeòil:

¹¹ Nach mò gu mòr, nuair a mharbh daoine aingidh duine ionraic na thaigh fhèin air a leabaidh? Agus a‑nis nach iarr mi a fhuil-san air ur làimh-se, agus nach toir mi bhàrr na talmhainn sibh?

¹² Agus dh’àithn Daibhidh da òganaich, agus mharbh iad iad, agus gheàrr iad dhiubh an làmhan agus an casan, agus chroch iad suas iad os cionn an tobair ann an Hebron; agus ghabh iad ceann Isboseit, agus dh’adhlaic iad e ann an àit-adhlacaidh Abneir ann an Hebron.