2 Samuel 20 - Am Bìoball Gàidhlig 1992

¹ Agus thachair gu robh duine an sin le Belial dom b’ainm Sèba, mac Bhichri, Beniàmineach; agus shèid e trompaid, agus thubhairt e, Chan eil againne cuibhreann sam bith ann an Daibhidh, agus chan eil oighreachd sam bith againn ann am mac Iese: gach fear a dh’ionnsaigh a bhùthan, O Israeil.

² Agus chaidh gach duine de Israel suas o bhith an dèidh Dhaibhidh, agus lean iad Sèba mac Bhichri: ach dhlùth-lean daoine Iùdah rin rìgh, o Iòrdan eadhon gu Ierusalem.

³ Agus thàinig Daibhidh da thaigh ann an Ierusalem; agus ghabh an rìgh an deichnear bhan, a choileabaich, a dh’fhàg e a ghleidheadh an taighe, agus chuir e ann an gainntir iad, agus bheathaich e iad, ach cha deachaidh e a‑steach dan ionnsaigh; agus bha iad air an druideadh suas gu là am bàis, a’ caitheamh am beatha ann am bantrachas.

⁴ An sin thubhairt an rìgh ri Amasa, Cruinnich dhòmhsa fir Iùdah an ceann trì làithean, agus seas fhèin an seo.

⁵ Agus dh’fhalbh Amasa a chruinneachadh fir Iùdah: ach dh’fhan e na b’fhaide na an t‑àm suidhichte a shònraich esan dha.

⁶ Agus thubhairt Daibhidh ri Abisai, A‑nis nì Sèba mac Bhichri tuilleadh croin dhuinn na rinn Absalom: gabh thusa seirbhisich do thighearna, agus falbh air a thòir, air eagal gum faigh e dha fhèin bailtean daingnichte, agus gun tèid e as uainn.

⁷ Agus chaidh a‑mach na dhèidh fir Ioaib, agus na Ceretich, agus na Peletich, agus na fir threuna uile: agus chaidh iad a‑mach à Ierusalem, a dhol air tòir Shèba mac Bhichri.

⁸ Nuair a bha iad aig a’ chloich mhòir a tha ann an Gibeon, thàinig Amasa romhpa. Agus bha Ioab crioslaichte le fallaing a chuir e uime, agus oirre sin crios le claidheamh ceangailte air a leis na thruaill; agus nuair a chaidh e air aghaidh, thuit e aisde.

⁹ Agus thubhairt Ioab ri Amasa, A bheil thu slàn, a bhràthair? Agus ghlac Ioab le a dheas làimh Amasa air a fheusaig, a thabhairt pòige dha.

¹⁰ Ach cha tug Amasa fa‑near an claidheamh a bha ann an làimh Ioaib: agus bhuail e leis e fon chòigeamh aisne, agus leig e a‑mach a mhionach a dh’ionnsaigh an làir, agus cha do bhuail e a‑rìs e; agus fhuair e bàs. Agus chaidh Ioab, agus a bhràthair Abisai, air tòir Shèba mhic Bhichri.

¹¹ Agus sheas fear de òganaich Ioaib làimh ris, agus thubhairt e, Esan leis an ionmhainn Ioab, agus esan a tha le Daibhidh, leanadh e Ioab.

¹² Agus bha Amasa ga aonairt fhèin ann am fuil am meadhon an rathaid mhòir. Agus nuair a chunnaic an duine gun d’fhan an sluagh uile nan seasamh, dh’atharraich e Amasa on rathad mhòr don achadh, agus thilg e aodach air, nuair a chunnaic e gun d’fhan gach neach a thàinig làimh ris nan seasamh.

¹³ Nuair a dh’atharraicheadh e on rathad mhòr, chaidh an sluagh uile air an aghaidh an dèidh Ioaib, a dhol air tòir Shèba mhic Bhichri.

¹⁴ Agus chaidh e air feadh uile threubhan Israeil gu Abel-bhetmaacah, agus na Berich uile: agus chruinnicheadh iad an ceann a chèile, agus chaidh iad mar an ceudna na dhèidh.

¹⁵ Agus thàinig iad, agus theannaich iad e, ann an Abel-bhetmaacah, agus chuir iad suas tòrr an aghaidh a’ bhaile, agus sheas e làimh ris a’ bhalla: agus rinn an sluagh uile a bha maille ri Ioab an dìcheall air a’ bhalla a leagadh sìos.

¹⁶ An sin ghlaodh bean ghlic a‑mach as a’ bhaile, Eisdibh, èisdibh, abraibh, guidheam oirbh, ri Ioab, Thig am fagas an seo, agus labhraidh mi riut.

¹⁷ Agus nuair a thàinig e am fagas di, thubhairt a’ bhean, An tu Ioab? Agus fhreagair esan, Is mi. An sin thubhairt i ris, Eisd ri briathran do bhanoglaich. Agus fhreagair esan, Tha mi ag èisdeachd.

¹⁸ An sin labhair i, ag ràdh, Gu cinnteach labhair iad an toiseach, ag ràdh, Gu deimhinn iarraidh iad sìth air Abel: agus mar sin crìochnaichidh iad an gnothach.

¹⁹ Is aon mise dhiubhsan a tha sìochail agus fìrinneach ann an Israel: ach tha thusa ag iarraidh baile, agus màthair ann an Israel, a sgrios, Carson a shluigeas tu suas oighreachd an Tighearna?

²⁰ Agus fhreagair Ioab agus thubhairt e, Guma fada, fada sin uamsa, gun sluiginn suas, no gun sgriosainn.

²¹ Chan ann mar sin a tha an gnothach: ach thog duine de shliabh Ephraim, don ainm Sèba mac Bhichri, a làmh suas an aghaidh an rìgh, an aghaidh Daibhidh: thugaibh esan a‑mhàin thairis, agus imichidh mi on bhaile. Agus thubhairt a’ bhean ri Ioab, Feuch, tilgear a cheann ad ionnsaigh thar a’ bhalla.

²² An sin chaidh a’ bhean a dh’ionnsaigh an t‑sluaigh uile na gliocas: agus gheàrr iad ceann Shèba mhic Bhichri dheth, agus thilg iad a‑mach e a dh’ionnsaigh Ioaib: agus shèid e trompaid, agus chaidh iad air falbh on bhaile, gach fear a dh’ionnsaigh a bhùtha. Agus thill Ioab do Ierusalem a dh’ionnsaigh an rìgh.

²³ A‑nis bha Ioab os cionn armailtean Israeil uile: agus bha Benaiah mac Iehoiada os cionn nan Cereteach, agus os cionn nam Peleteach:

²⁴ Agus bha Adoram os cionn na cìse: agus bha Iehosaphat mac Ahiluid na sheanchaidh:

²⁵ Agus bha Sebha na sgrìobhaiche: agus b’iad Sadoc agus Abiatar na sagartan:

²⁶ Agus mar an ceudna bha Ira an t‑Iaireach na àrd fhear-riaghlaidh aig Daibhidh.