2 Eachdraidh 4 - Am Bìoball Gàidhlig 1992

¹ Agus rinn e altair umha: fichead làmh-choille a fad, agus fichead làmh-choille a leud, agus deich làmhan-coille a h‑àirde.

² Agus rinn e muir leaghte, deich làmhan-coille o bhile gu bile, cruinn mun cuairt, agus còig làmhan-coille a h‑àirde; agus chuartaich snàthainn deich làmhan-coille ar fhichead i mun cuairt.

³ Agus foidhpe bha coslas dhamh, a chuartaich i mun cuairt, deich anns an làmh-choille a’ dol mu thimcheall na mara mun cuairt. Thilgeadh dà shreath dhamh nuair a thilgeadh i fhèin.

⁴ Sheas i air dà‑dhamh-dheug, trì ag amharc gu tuath, agus trì ag amharc an iar, agus trì ag amharc gu deas, agus trì ag amharc an ear: agus chuireadh a’ mhuir orra gu h‑àrd, agus bha a’ chuid-dheiridh dhiubh uile a‑staigh.

⁵ Agus bha leud boise air tighead innte, agus bha a bile air a dhèanamh mar bhile cupain, le blàthan lilidh: ghabh i agus chùm i trì mìle bat.

⁶ Agus rinn e deich soithichean-ionnlaid, agus chuir e còig dhiubh air an làimh dheis, agus còig air an làimh chlì, a dh’ionnlad annta: nithean na h‑ìobairt-loisgte nigh iad annta; ach bha a’ mhuir airson nan sagart, a dh’ionnlad innte.

⁷ Agus rinn e deich coinnleirean òir, a rèir an cumaidh, agus chuir e iad anns an teampall, còig air an làimh dheis, agus còig air an làimh chlì.

⁸ Agus rinn e deich bùird, agus chuir e iad anns an teampall, còig air an làimh dheis, agus còig air an làimh chlì: agus rinn e ceud cuach òir.

⁹ Agus rinn e cùirt nan sagart, agus a’ chùirt mhòr, agus dorsan airson na cùirte, agus chòmhdaich e an dorsan thairis le umha.

¹⁰ Agus chuir e a’ mhuir air an taobh deas den cheann an ear, fa chomhair na h‑àird a deas.

¹¹ Agus rinn Huram na h‑aighnean, agus na sluasaidean, agus na cuachan; agus chuir Huram crìoch air dèanamh na h‑obrach a rinn e do rìgh Solamh ann an taigh Dhè:

¹² Eadhon an dà phost, agus na cuairtean, agus na cinn a bha air mullach an dà phuist, agus an dà lìon-obair a chòmhdachadh dà chuairt nan ceann a bha air mullach nam post:

¹³ Agus ceithir cheud pomgranat don dà lìon-obair; dà shreath phomgranat do gach lìon-obair, a chòmhdachadh dà chuairt nan ceann, a bha air na puist.

¹⁴ Agus rinn e buinn, agus rinn e soithichean-ionnlaid air na buinn:

¹⁵ Aon mhuir, agus dà‑dhamh-dheug foidhpe:

¹⁶ Agus na h‑aighnean, agus na sluasaidean, agus na greimichean feòla, agus an uidheam uile, rinn Huram do rìgh Solamh ann an taigh an Tighearna de umha lìomhte.

¹⁷ Ann an còmhnard Iòrdain thilg an rìgh iad, anns an talamh chreadha eadar Sucot agus Seredatah.

¹⁸ Agus rinn Solamh an t‑uidheam seo uile ann am mòr-phailteas: oir cha robh e comasach cudthrom an umha fhaghail a‑mach.

¹⁹ Agus rinn Solamh an t‑uidheam uile a bhuineadh do thaigh Dhè, agus an altair òir, agus na bùird air an robh aran na fianais;

²⁰ Agus na coinnleirean maille rin lòchrain a‑chum gun loisgeadh iad a rèir a’ ghnàtha air beulaibh a’ ghuth-àite, de òr fìorghlan;

²¹ Agus na blàthan, agus na lòchrain, agus na clobhachan, de òr, eadhon den òr a bu ghlaine;

²² Agus na smàladairean; agus na cuachan, agus na spàinean, agus na tùiseirean, de òr fìorghlan;

²³ Agus dol a‑steach an taighe, a dhorsan a b’fhaide a‑staigh aig an ionad as ro‑naoimhe, agus dorsan taigh an teampaill de òr.