2 Eachdraidh 34 - Am Bìoball Gàidhlig 1992

¹ Ochd bliadhna a dh’aois bha Iosiah, nuair a thòisich e air rìoghachadh, agus rìghich e ann an Ierusalem aon-bhliadhna-deug ar fhichead.

² Agus rinn e an nì a bha ceart ann an sùilean an Tighearna, agus dh’imich e ann an slighean Dhaibhidh a athair, agus cha do chlaon e a dh’ionnsaigh na làimhe deise no na làimhe clìthe.

³ Oir anns an ochdamh bliadhna de a rìoghachadh nuair a bha e fhathast òg, thòisich e air Dia Dhaibhidh a athair iarraidh, agus anns an dara-bliadhna-deug thòisich e air Iùdah agus Ierusalem a ghlanadh o na h‑àitean àrda, agus na doireachan, agus na dealbhan snaidhte, agus na dealbhan leaghte.

⁴ Agus bhris iad sìos altairean Bhàalim na fhianais, agus na dealbhan grèine a bha gu h‑àrd os an cionn gheàrr e sìos, agus na doireachan; agus na dealbhan snaidhte, agus na dealbhan leaghte bhris e nam mìrean, agus phronn e gu luaithre, agus chrath e i air uaighean na muinntir a dh’ìobair dhaibh.

⁵ Agus loisg e cnàmhan nan sagart air an altairean, agus ghlan e Iùdah agus Ierusalem.

⁶ Mar an ceudna ann am bailtean Mhanaseh, agus Ephraim, agus Shimeoin, eadhon gu ruig Naphtali, nan àitean fàsaichte mun cuairt.

⁷ Agus nuair a bhris e sìos na h‑altairean agus na doireachan, agus a phronn e na dealbhan snaidhte gu luaithre, agus a gheàrr e sìos na dealbhan grèine uile air feadh tìr Israeil uile, thill e gu Ierusalem.

⁸ Agus anns an ochdamh-bliadhna-deug de a rìoghachadh, nuair a ghlan e an tìr agus an taigh, chuir e Saphan mac Asaliah, agus Maaseiah uachdaran a’ bhaile, agus Ioah mac Ioahais an seanchaidh, a chàradh taigh an Tighearna a Dhia.

⁹ Agus thàinig iad gu Hilciah an t‑àrd-shagart, agus thugadh dhaibh an t‑airgead a thugadh a‑steach do thaigh Dhè, a chruinnich na Lèbhithich a ghlèidh na dorsan o làimh Mhanaseh agus Ephraim, agus o uile fhuidheall Israeil, agus o Iùdah uile, agus o Bheniàmin, agus o luchd-àiteachaidh Ierusaleim.

¹⁰ Agus thug iad e do làimh luchd-dèanamh na h‑obrach, a chuireadh os cionn taigh an Tighearna, agus thug iadsan e don luchd-obrach a dh’obraich ann an taigh an Tighearna, a chàradh agus a leasachadh an taighe:

¹¹ Thug iad e eadhon do na saoir agus don luchd-togail, a cheannach chlach snaidhte, agus fiodha a‑chum nan ceangal, agus gu ùrlar a chur anns na taighean a mhill rìghrean Iùdah.

¹² Agus rinn na daoine an obair gu fìrinneach: agus b’iad an luchd-amhairc thairis orra Iahat agus Obadiah, na Lèbhithich, de mhic Mherari; agus Sechariah agus Mesulam, de mhic nan Cohatach, a chur na h‑obrach air a h‑aghaidh; mar an ceudna de na Lèbhithich gach neach a bha eòlach air innealan-ciùil.

¹³ Bha iad cuideachd os cionn an luchd-iomchair eallach, agus nan luchd-amhairc thairis orrasan uile a rinn obair ann an gnè seirbhis air bith; agus de na Lèbhithich bha sgrìobhaichean, agus riaghladairean, agus dorsairean.

¹⁴ Agus nuair a bha iad a’ toirt a‑mach an airgid a thugadh a‑steach do thaigh an Tighearna, fhuair Hilciah an sagart leabhar lagh an Tighearna le làimh Mhaois.

¹⁵ Agus fhreagair Hilciah, agus thubhairt e ri Saphan an sgrìobhaiche, Fhuair mi leabhar an lagha ann an taigh an Tighearna. Agus thug Hilciah an leabhar do Shaphan.

¹⁶ Agus thug Saphan an leabhar a dh’ionnsaigh an rìgh, agus dh’aithris e an gnothach don rìgh, ag ràdh, Gach nì a dh’àithneadh dod sheirbhisich, tha iad a’ dèanamh.

¹⁷ Chruinnich iad an t‑airgead a fhuaireadh ann an taigh an Tighearna, agus thug iad e do làimh an luchd-amhairc-thairis, agus do làimh luchd-dèanamh na h‑obrach.

¹⁸ Agus dh’innis Saphan an sgrìobhaiche don rìgh, ag ràdh, Thug Hilciah an sagart leabhar dhomh. Agus leugh Saphan e an làthair an rìgh.

¹⁹ Agus nuair a chuala an rìgh briathran an lagha, reub e a aodach.

²⁰ Agus dh’àithn an rìgh do Hilciah, agus do Ahicam mac Shapain, agus do Abdon mac Mhicah, agus do Shaphan an sgrìobhaiche, agus do Asaiah, seirbhiseach an rìgh, ag ràdh,

²¹ Rachaibh, fiosraichibh den Tighearna air mo shon-sa, agus air an son-san a dh’fhàgadh ann an Israel agus ann an Iùdah, a‑thaobh briathran an leabhair a fhuaireadh: oir is mòr fearg an Tighearna, a tha air a taomadh a‑mach oirnn, a chionn nach do choimhead ar n‑athraichean facal an Tighearna, a dhèanamh a rèir gach nì a tha sgrìobhte anns an leabhar seo.

²² Agus chaidh Hilciah agus iadsan a dh’òrdaich an rìgh gu Huldah a’ bhan-fhàidh, bean Shaluim, mhic Thicbhah, mhic Hasrah, fear-ghleidhidh an aodaich; (a‑nis bha i a chòmhnaidh ann an Ierusalem ann an oilthaigh;) agus labhair iad rithe mar sin.

²³ Agus fhreagair i iad, Mar seo tha an Tighearna Dia Israeil ag ràdh, Innsibh don duine a chuir sibh am ionnsaigh-sa,

²⁴ Mar seo tha an Tighearna ag ràdh, Feuch, bheir mise olc air an àite seo, agus air a luchd-àiteachaidh, eadhon gach mallachadh a tha sgrìobhte anns an leabhar a leugh iad am fianais rìgh Iùdah;

²⁵ A chionn gun do thrèig iad mise, agus gun do loisg iad tùis do dhiathan eile, a‑chum mo bhrosnachadh gu corraich le uile obraichean an làmh; uime sin taomar m’fhearg a‑mach air an àite seo, agus cha mhùchar i.

²⁶ Ach a‑thaobh rìgh Iùdah, a chuir sibh a dh’fhiosrachadh den Tighearna, mar seo their sibh ris, Mar seo tha an Tighearna Dia Israeil ag ràdh, A‑thaobh nam briathar a chuala tu,

²⁷ A chionn gun do thiomaich do chridhe, agus gun d’irioslaich thu thu fhèin an làthair Dhè, nuair a chuala tu a bhriathran an aghaidh an àite seo, agus an aghaidh a luchd-àiteachaidh, agus gun d’irioslaich thu thu fhèin am làthair-sa, agus gun do reub thu d’aodach, agus gun do ghuil thu am làthair, chuala mise mar an ceudna thusa, arsa an Tighearna.

²⁸ Feuch, cruinnichidh mi thu a‑chum d’athraichean, agus cruinnichear thu dod uaigh ann an sìth, agus chan fhaic do shùilean an t‑olc sin uile a bheir mise air an àite seo, agus air a luchd-àiteachaidh. Agus thug iad fios a‑rìs a dh’ionnsaigh an rìgh.

²⁹ Agus chuir an rìgh teachdairean uaithe, agus chruinnich e ri chèile uile sheanairean Iùdah agus Ierusaleim.

³⁰ Agus chaidh an rìgh suas do thaigh an Tighearna, agus fir Iùdah uile, agus luchd-àiteachaidh Ierusaleim, agus na sagartan agus na Lèbhithich, agus an sluagh uile eadar bheag agus mhòr; agus leugh e nan èisdeachd uile bhriathran leabhar a’ choicheangail, a fhuaireadh ann an taigh an Tighearna.

³¹ Agus sheas an rìgh na àite fhèin, agus rinn e coicheangal am fianais an Tighearna gun gluaiseadh e an dèidh an Tighearna, agus gun gleidheadh e a àitheantan, agus a theisteis agus a reachdan, le a uile chridhe agus le a uile anam, a choileanadh briathran a’ choicheangail, a tha sgrìobhte anns an leabhar seo.

³² Agus thug e orrasan uile a fhuaireadh ann an Ierusalem agus Beniàmin, seasamh: agus rinn luchd-àiteachaidh Ierusaleim a rèir coicheangal Dhè, Dia an athraichean.

³³ Agus chuir Iosiah air falbh na gràinealachdan uile as na tìrean uile a bhuineadh do chloinn Israeil, agus thug e orrasan uile a fhuaireadh ann an Israel seirbhis a dhèanamh don Tighearna an Dia. Rè a làithean uile cha do chlaon iad o leantainn an Tighearna, Dia an athraichean.