2 Eachdraidh 29 - Am Bìoball Gàidhlig 1992

¹ Thòisich Heseciah air rìoghachadh nuair a bha e còig-bliadhna-fichead a dh’aois, agus rìghich e naoi-bliadhna-fichead ann an Ierusalem: agus b’e ainm a mhàthar Abiah, nighean Shechariah.

² Agus rinn e an nì a bha ceart ann an sùilean an Tighearna, a rèir nan uile nithean a rinn Daibhidh a athair.

³ Anns a’ chiad bhliadhna de a rìoghachadh, air a’ chiad mhìos, dh’fhosgail e dorsan taigh an Tighearna, agus chàraich e iad.

⁴ Agus thug e a‑steach na sagartan agus na Lèbhithich, agus chruinnich e iad don t‑sràid an ear.

⁵ Agus thubhairt e riu, Eisdibh rium, a Lèbhitheacha; a‑nis naomhaichibh sibh fhèin, agus naomhaichibh taigh an Tighearna, Dia ur n‑athraichean, agus thugaibh a‑mach an salchar as an ionad naomh.

⁶ Oir pheacaich ar n‑athraichean, agus rinn iad an nì a bha olc ann an sùilean an Tighearna ar Dia, agus thrèig iad e, agus thionndaidh iad an aghaidhean o phàillean an Tighearna, agus chuir iad cùl ris.

⁷ Mar an ceudna dhruid iad dorsan an sgàth-thaighe, agus chuir iad as na lòchrain, agus cha do loisg iad tùis, agus cha tug iad ìobairtean-loisgte suas anns an ionad naomh, do Dhia Israeil.

⁸ Uime sin bha fearg an Tighearna ri Iùdah agus ri Ierusalem, agus thug e thairis iad do thuairgne, do uamhann, agus do sgeig, mar a chì sibh le ur sùilean.

⁹ Oir feuch, thuit ar n‑athraichean leis a’ chlaidheamh, agus tha ar mic, agus ar nigheanan, agus ar mnathan ann am braighdeanas airson seo.

¹⁰ A‑nis tha e ann am chridhe coicheangal a dhèanamh ris an Tighearna Dia Israeil, a‑chum gun tionndaidh a fhearg laiste uainn.

¹¹ Mo mhic, na bithibh a‑nis dearmadach; oir thagh an Tighearna sibh gu seasamh na làthair a dhèanamh seirbhis dha, agus gu bhith a’ frithealadh dha agus a’ losgadh tùise.

¹² An sin dh’èirich na Lèbhithich, Mahat mac Amasai, agus Ioel mac Asariah, de mhic nan Cohatach; agus de mhic Mherari, Cis mac Abdi, agus Asariah mac Iehaleleil: agus de na Gersonaich, Ioah mac Shimah, agus Eden mac Ioah:

¹³ Agus de mhic Elisaphain, Simri agus Iehiel: agus de mhic Asaiph, Sechariah agus Mataniah:

¹⁴ Agus de mhic Hemain, Iehiel agus Simei: agus de mhic Iedutuin, Semaiah agus Udsiel.

¹⁵ Agus chruinnich iad am bràithrean, agus naomhaich iad iad fhèin, agus thàinig iad a rèir àithne an rìgh ann am briathran an Tighearna, a ghlanadh taigh an Tighearna.

¹⁶ Agus chaidh na sagartan don chuid a b’fhaide a‑staigh de thaigh an Tighearna ga ghlanadh, agus thug iad a‑mach gach salchar a fhuair iad ann an teampall an Tighearna, gu cùirt taigh an Tighearna. Agus thog na Lèbhithich leo e, gu a thoirt a‑mach gu sruth Chidroin.

¹⁷ A‑nis thòisich iad air a’ chiad là den chiad mhìos air naomhachadh, agus air an ochdamh là den mhìos thàinig iad gu sgàth-thaigh an Tighearna, agus naomhaich iad taigh an Tighearna ann an ochd làithean, agus air an t‑siathamh-là‑deug den chiad mhìos chrìochnaich iad an obair.

¹⁸ An sin chaidh iad a‑steach a dh’ionnsaigh Heseciah an rìgh, agus thubhairt iad, Ghlan sinn taigh an Tighearna uile, agus altair na h‑ìobairt-loisgte maille ra soithichean uile, agus bòrd an arain thaisbeanta maille ra shoithichean uile.

¹⁹ Agus na soithichean sin uile a chuir rìgh Ahas, nuair a rìghich e, air falbh na easaontas, dheasaich sinne agus naomhaich sinn, agus, feuch, tha iad fa chomhair altair an Tighearna.

²⁰ An sin dh’èirich Heseciah an rìgh gu moch, agus chruinnich e uachdarain a’ bhaile, agus chaidh e suas do thaigh an Tighearna.

²¹ Agus thug iad leo seachd tairbh òga, agus seachd reitheachan, agus seachd uain, agus seachd buic-ghoibhre mar ìobairt-pheacaidh airson na rìoghachd, agus airson an ionaid naoimh, agus airson Iùdah: agus dh’àithn e do na sagartan, mic Aaroin, an ìobradh air altair an Tighearna.

²² Uime sin mharbh iadsan na tairbh, agus ghabh na sagartan an fhuil, agus chrath iad i air an altair: mharbh iad mar an ceudna na reitheachan, agus chrath iad an fhuil air an altair: mharbh iad cuideachd na h‑uain, agus chrath iad an fhuil air an altair.

²³ Agus thug iad leo na buic-ghoibhre airson na h‑ìobairt-pheacaidh an làthair an rìgh agus a’ choitheanail, agus chuir iad an làmhan orra:

²⁴ Agus mharbh na sagartan iad, agus chrath iad am fuil air an altair a‑chum rèite a dhèanamh airson Israeil uile: oir dh’àithn an rìgh an ìobairt-loisgte agus an ìobairt-pheacaidh airson Israeil uile.

²⁵ Agus chuir e na Lèbhithich ann an taigh an Tighearna le ciombalan, le saltairean, agus le clàrsaichean, a rèir àithne Dhaibhidh agus Ghaid, fear-seallaidh an rìgh, agus Nàtain am fàidh: oir b’i sin àithne an Tighearna le làimh a fhàidhean.

²⁶ Agus sheas na Lèbhithich le innealan Dhaibhidh, agus na sagartan leis na trompaidean.

²⁷ Agus dh’àithn Heseciah an ìobairt-loisgte ìobradh air an altair: agus nuair a thòisich an ìobairt-loisgte, thòisich mar an ceudna laoidh an Tighearna leis na trompaidean, agus le innealan Dhaibhidh rìgh Israeil.

²⁸ Agus rinn an coitheanal uile adhradh, agus sheinn an luchd-seinn, agus shèid na trompadairean: mhair seo uile gus an do chrìochnaicheadh an ìobairt-loisgte.

²⁹ Agus nuair a chuir iad crìoch air ìobradh, chrom an rìgh agus iadsan uile a bha maille ris iad fhèin, agus rinn iad adhradh.

³⁰ Agus dh’àithn Heseciah an rìgh agus na h‑uachdarain do na Lèbhithich gum moladh iad an Tighearna ann am briathran Dhaibhidh, agus Asaiph am fear-seallaidh: agus mhol iad le subhachas, agus chrom iad an cinn, agus rinn iad adhradh.

³¹ An sin fhreagair Heseciah, agus thubhairt e, A‑nis choisrig sibh sibh fhèin don Tighearna: thigibh am fagas, agus thugaibh leibh ìobairtean, agus tabhartasan buidheachais do thaigh an Tighearna. Agus thug an coitheanal a‑steach ìobairtean, agus tabhartasan buidheachais, agus iadsan uile a bha toileach nan cridhe, tabhartasan-loisgte.

³² Agus b’e àireamh nan tabhartas-loisgte a thug an coitheanal leo, trì-fichead agus deich tairbh òga, ceud reithe, dà cheud uan; iad sin uile a‑chum ìobairt-loisgte don Tighearna.

³³ Agus na nithean coisrigte, sia ceud damh, agus trì mìle caora.

³⁴ Ach bha na sagartan tearc, agus cha b’urrainn iad na tabhartasan loisgte uile fhionnadh: uime sin chuidich am bràithrean na Lèbhithich leo, gus an do chrìochnaicheadh an obair, agus gus an do naomhaich na sagartan iad fhèin: oir bha na Lèbhithich na bu deise nan cridhe a‑chum iad fhèin a naomhachadh na na sagartan.

³⁵ Agus mar an ceudna bha na tabhartasan loisgte ann am pailteas, maille ri saill nan tabhartas-sìthe agus nan tabhartas-dibhe, a‑chum na h‑ìobairt-loisgte. Agus dheasaicheadh seirbhis taigh an Tighearna.

³⁶ Agus rinn Heseciah agus an sluagh uile gàirdeachas, a chionn gun do dheasaich Dia airson an t‑sluaigh: oir rinneadh an nì gu grad.