2 Eachdraidh 26 - Am Bìoball Gàidhlig 1992

¹ Agus ghabh sluagh Iùdah uile Udsiah, agus e sia-bliadhna-deug a dh’aois, agus rinn iad e na rìgh an àit a athar Amasiah.

² Thog esan Elat, agus dh’aisig e e do Iùdah, an dèidh don rìgh cadal maille ra athraichean.

³ Sia-bliadhna-deug a dh’aois bha Udsiah nuair a thòisich e air rìoghachadh, agus rìghich e dà‑bhliadhna-dheug agus dà‑fhichead ann an Ierusalem: agus b’e ainm a mhàthar Iecoliah o Ierusalem.

⁴ Agus rinn e an nì a bha ceart ann an sùilean an Tighearna, a rèir gach nì a rinn Amasiah a athair.

⁵ Agus dh’iarr e Dia ann an làithean Shechariah, a theagaisg e ann an eagal Dhè: agus fhad is a dh’iarr e an Tighearna, thug Dia air soirbheachadh.

⁶ Agus chaidh e a‑mach, agus chog e an aghaidh nam Philisteach, agus bhris e sìos balla Ghait, agus balla Iabneith, agus balla Asdoid; agus thog e bailtean ann an Asdod, agus am measg nam Philisteach.

⁷ Agus chuidich Dia leis an aghaidh nam Philisteach, agus an aghaidh nan Arabach a bha nan còmhnaidh ann an Gur-bàal, agus nan Amonach.

⁸ Agus thug na h‑Amonaich tìodhlacan do Udsiah; agus chaidh a ainm a‑mach gu ruig dol a‑steach na h‑Eiphit, oir dh’fhàs e ro‑chumhachdach.

⁹ Agus thog Udsiah tùir ann an Ierusalem aig geata na h‑oisne, agus aig geata a’ ghlinne, agus aig an oisinn, agus dhaingnich e iad.

¹⁰ Agus thog e tùir anns an fhàsach, agus chladhaich e mòran thobar; oir bha mòran sprèidhe aige, agus anns an tìr ìosail agus anns a’ chòmhnard treabhaichean, agus fìonliosadairean anns na slèibhtean agus ann an Carmel, a chionn gum bu toigh leis tuathanachas.

¹¹ Bha aig Udsiah mar an ceudna armailt de dhaoine a dhèanadh cogadh, a rachadh a‑mach gu cath nam buidhnean, a rèir uibhir an àireimh, le làimh Ieieil an sgrìobhaiche, agus Mhaaseiah am fear-riaghlaidh, fo làimh Hananiah aon de uachdarain an rìgh.

¹² B’e àireamh iomlan prìomh-athraichean nan daoine comasach gaisgeil, dà mhìle agus sia ceud.

¹³ Agus fon làimh-san bha armailt, trì cheud mìle agus seachd mìle agus còig ceud, a dhèanadh cogadh le treun neart, a chuideachadh leis an rìgh an aghaidh an nàmhaid.

¹⁴ Agus dheasaich Udsiah air an son, eadhon don fheachd uile, targaidean, agus sleaghan, agus clogaidean, agus lùirichean, agus boghachan, agus croinn-tabhaill a thilgeadh chlach.

¹⁵ Agus rinn e ann an Ierusalem innealan-cogaidh, a dhealbhadh le daoine ealanta, gu bhith air na tùir agus air oisnean nam ballachan, a thilgeadh shaighead agus chlach mòra leo; agus chaidh a ainm a‑mach an cèin, oir b’iongantach an dòigh air an do chuidicheadh leis gus an d’fhàs e cumhachdach.

¹⁶ Ach nuair a dh’fhàs e cumhachdach, thogadh a chridhe suas a‑chum aimhleis, agus pheacaich e an aghaidh an Tighearna a Dhia: oir chaidh e a‑steach do theampall an Tighearna, a losgadh tùise air altair na tùise.

¹⁷ Agus chaidh Asariah an sagart a‑steach na dhèidh, agus maille ris ceithir-fichead sagart leis an Tighearna, fir threuna;

¹⁸ Agus sheas iad an aghaidh Udsiah an rìgh, agus thubhairt iad ris, Cha bhuin e dhutsa, Udsiah, tùis a losgadh don Tighearna, ach do na sagartan, mic Aaroin, a tha air an naomhachadh a losgadh tùise: imich a‑mach as an ionad naomh, oir pheacaich thu, agus cha bhi e dhut a‑chum urraim on Tighearna Dia.

¹⁹ Agus bha fearg air Udsiah, agus tùiseir aige na làimh a losgadh tùise: agus nuair a bha fearg air ris na sagartan, air ball dh’èirich luibhre suas ann an clàr a aodainn, am fianais nan sagartan ann an taigh an Tighearna, os cionn altair na tùise.

²⁰ Agus dh’amhairc Asariah an t‑àrd-shagart, agus na sagartan uile air, agus, feuch, bha luibhre air ann an clàr a aodainn, agus ghreas iad a‑mach as a sin e; agus rinn e fhèin mar an ceudna cabhag gu dol a‑mach, a chionn gun do bhuail an Tighearna e.

²¹ Agus bha Udsiah an rìgh na lobhar gu là a bhàis, agus ghabh e còmhnaidh ann an taigh air leth, mar fhear a bha na lobhar, nuair a dhruideadh a‑mach e à taigh an Tighearna; agus bha Iotam a mhac os cionn taigh an rìgh, a’ toirt breith air sluagh na tìre.

²² Agus a’ chuid eile de ghnìomharan Udsiah, an toiseach agus mu dheireadh, sgrìobh Isaiah am fàidh, mac Amois.

²³ Agus chaidil Udsiah maille ra athraichean, agus dh’adhlaic iad e maille ra athraichean ann am magh àit-adhlacaidh nan rìghrean: oir thubhairt iad, Tha e na lobhar. Agus rìghich Iotam a mhac na àite.