2 Eachdraidh 24 - Am Bìoball Gàidhlig 1992

¹ Seachd bliadhna a dh’aois bha Iòas nuair a thòisich e air rìoghachadh, agus rìghich e dà‑fhichead bliadhna ann an Ierusalem: agus b’e ainm a mhàthar Sibia o Bheer-sèba.

² Agus rinn Iòas an nì a bha ceart ann an sùilean an Tighearna rè uile làithean Iehoiada an sagart.

³ Agus ghabh Iehoiada air a shon dà mhnaoi, agus ghin e mic agus nigheanan.

⁴ Agus na dhèidh seo bha e ann an inntinn Iòais taigh an Tighearna a chàradh.

⁵ Agus chruinnich e ri chèile na sagartan agus na Lèbhithich, agus thubhairt e riu, Rachaibh a‑mach do bhailtean Iùdah, agus cruinnichibh o Israel uile airgead a chàradh taigh ur Dè o bhliadhna gu bliadhna, agus faicibh gun dèan sibh cabhag anns a’ ghnothach. Gidheadh cha do rinn na Lèbhithich cabhag.

⁶ Agus ghairm an rìgh Iehoiada an t‑àrd-shagart, agus thubhairt e ris, Carson nach d’iarr thu air na Lèbhithich cìs Mhaois, òglach an Tighearna, a thoirt a‑steach o Iùdah, agus o Ierusalem, agus o choitheanal Israeil, airson pàillean na fianais?

⁷ Oir bhris mic na droch mhnà Ataliah sìos taigh Dhè; agus mar an ceudna uile nithean coisrigte taigh an Tighearna thug iad seachad do Bhàalim.

⁸ An sin air àithne an rìgh rinn iad ciste, agus chuir iad i aig geata taigh an Tighearna air an taobh a‑muigh.

⁹ Agus thug iad gairm air feadh Iùdah agus Ierusaleim, cìs Mhaois òglach Dhè, a chuir e air Israel anns an fhàsach, a thoirt a‑steach don Tighearna.

¹⁰ Agus rinn na h‑uachdarain uile, agus an sluagh uile, gàirdeachas, agus thug iad leo, agus thilg iad anns a’ chiste, gus an do lìonadh i.

¹¹ Agus nuair a thugadh a’ chiste a‑steach a dh’ionnsaigh luchd-riaghlaidh an rìgh le làimh nan Lèbhitheach, agus a chunnaic iad gu robh mòran airgid innte, an sin thàinig sgrìobhaiche an rìgh agus fear-riaghlaidh an àrd-shagairt, agus dh’fhalamhaich iad a’ chiste, agus ghabh iad i, agus thug iad air a h‑ais i da h‑àite fhèin. Mar sin rinn iad o là gu là, agus chruinnich iad airgead ann am pailteas.

¹² Agus thug an rìgh agus Iehoiada e dhaibhsan a rinn obair seirbhis taigh an Tighearna, agus thuarasdalaich iad luchd-snaithidh chlach agus saoir a chàradh taigh an Tighearna, agus mar an ceudna luchd-obrach ann an iarann agus ann an umha a dhèanamh suas taigh an Tighearna.

¹³ Agus dh’obraich an luchd-obrach, agus choileanadh an obair len làimh; agus rinn iad suas taigh an Tighearna cho ceart is a bha e roimhe, agus dhaingnich iad e.

¹⁴ Agus nuair a chrìochnaich iad an obair, thug iad na dh’fhàgadh den airgead an làthair an rìgh agus Iehoiada, agus rinn iad soithichean dheth do thaigh an Tighearna, soithichean-frithealaidh nan ìobairtean-loisgte, agus spàinean, agus soithichean òir agus airgid: agus dh’ìobair iad ìobairtean-loisgte a‑ghnàth ann an taigh an Tighearna, rè uile làithean Iehoiada.

¹⁵ Ach dh’fhàs Iehoiada sean, agus bha e làn de làithean, agus fhuair e bàs: ceud agus deich-bliadhna-fichead a dh’aois bha e nuair a fhuair e bàs.

¹⁶ Agus dh’adhlaic iad e ann am baile Dhaibhidh maille ris na rìghrean, a chionn gun do rinn e math ann an Israel, araon a‑thaobh Dhè, agus a‑thaobh a thaighe.

¹⁷ Agus an dèidh bàs Iehoiada, thàinig uachdarain Iùdah, agus rinn iad ùmhlachd don rìgh. An sin dh’èisd an rìgh riu.

¹⁸ Agus thrèig iad taigh an Tighearna, Dia an athraichean, agus rinn iad seirbhis do dhoireachan agus do dhealbhan: agus thàinig fearg air Iùdah agus Ierusalem airson an cionta.

¹⁹ Gidheadh chuir e fàidhean dan ionnsaigh, gu an toirt air an ais a dh’ionnsaigh an Tighearna; agus rinn iad fianais nan aghaidh, ach cha d’èisd iadsan riu.

²⁰ Agus thàinig spiorad an Tighearna air Sechariah mac Iehoiada an sagart, agus sheas e os cionn an t‑sluaigh, agus thubhairt e riu, Mar seo tha Dia ag ràdh, Carson a tha sibh a’ briseadh àitheantan an Tighearna? Uime sin cha soirbhich leibh. A chionn gun do thrèig sibhse an Tighearna, trèigidh esan sibhse.

²¹ Agus chaidh iad ann an co‑bhainn na aghaidh, agus chlach iad le clachan e, air àithne an rìgh, ann an cùirt taigh an Tighearna:

²² Oir cha do chuimhnich Iòas an rìgh an coibhneas a rinn Iehoiada a athair ris, ach mharbh e a mhac: agus nuair a bha esan a’ faghail a’ bhàis, thubhairt e, Chì an Tighearna, agus agraidh e.

²³ Agus aig ceann na bliadhna thàinig armailt Shiria a‑nìos na aghaidh: agus thàinig iad gu Iùdah agus gu Ierusalem, agus sgrios iad uile uachdarain an t‑sluaigh o mheasg an t‑sluaigh, agus chuir iad an creach uile a dh’ionnsaigh rìgh Dhamascais.

²⁴ Oir le beagan dhaoine thàinig armailt Shiria, agus thug an Tighearna thairis nan làimh sluagh ro‑mhòr, a chionn gun do thrèig iad an Tighearna, Dia an athraichean: uime sin rinn iad breitheanas an aghaidh Iòais.

²⁵ Agus nuair a dh’imich iad uaithe, a chionn gun d’fhàg iad e ann an eucailean mòra, rinn a sheirbhisich fhèin ceannairc na aghaidh airson fuil mac Iehoiada an sagart, agus mharbh iad e air leabaidh, agus nuair a fhuair e bàs, dh’adhlaic iad e ann am baile Dhaibhidh, ach cha d’adhlaic iad e ann an àitean-adhlaic nan rìghrean.

²⁶ Agus is iad seo iadsan a rinn ceannairc na aghaidh: Sabad mac Shimeait a’ bhan-Amonach, agus Iehosabad mac Shimrit a’ bhan-Mhòabach, agus a mhic.

²⁷ A‑nis a‑thaobh meud na cìse a thog e, agus mar a rinn e suas taigh Dhè, feuch, tha iad sgrìobhte ann an eachdraidh leabhar nan rìgh. Agus rìghich Amasiah a mhac na àite.