2 Eachdraidh 17 - Am Bìoball Gàidhlig 1992

¹ Agus rìghich Iehosaphat a mhac na àite, agus neartaich e e fhèin an aghaidh Israeil.

² Agus chuir e feachd ann an uile bhailtean daingnichte Iùdah, agus chuir e freiceadain ann an tìr Iùdah, agus ann am bailtean Ephraim, a ghlac Asa a athair.

³ Agus bha an Tighearna maille ri Iehosaphat, a chionn gun do ghluais e ann an ciad shlighean Dhaibhidh a athair, agus nach d’iarr e a dh’ionnsaigh Bhàalim;

⁴ Ach gun d’iarr e a dh’ionnsaigh an Tighearna, Dia a athar, agus gun do ghluais e na àitheantan, agus cha b’ann a rèir dèanadas Israeil:

⁵ Uime sin dhaingnich an Tighearna an rìoghachd na làimh; agus thug Iùdah uile tìodhlacan gu Iehosaphat: agus bha aige beartas agus urram ann am pailteas.

⁶ Agus dh’àrdaicheadh a chridhe ann an slighean an Tighearna; agus mar an ceudna chuir e air falbh na h‑àitean àrda agus na doireachan à Iùdah.

⁷ Agus anns an treas bliadhna de a rìoghachadh chuir e cuid de a uachdarain, Benhail, agus Obadiah, agus Sechariah, agus Netaneel, agus Micaiah, a theagasg ann am bailtean Iùdah.

⁸ Agus maille riùsan na Lèbhithich, Semaiah, agus Netaniah, agus Sebadiah, agus Asahel, agus Semiramot, agus Iehonatan, agus Adoniah, agus Tobiah, agus Tob-adoniah, Lèbhithich uile; agus maille riùsan Elisama, agus Iehoram, na sagartan.

⁹ Agus theagaisg iad ann an Iùdah, agus leabhar lagh an Tighearna aca, agus chaidh iad mun cuairt air feadh uile bhailtean Iùdah, agus theagaisg iad an sluagh.

¹⁰ Agus bha eagal an Tighearna air uile rìoghachdan nan tìrean a bha mun cuairt air Iùdah, agus cha do chog iad ri Iehosaphat.

¹¹ Agus thug cuid de na Philistich tìodhlacan do Iehosaphat, agus airgead cìse: mar an ceudna thug na h‑Arabaich da ionnsaigh sprèidh, seachd mìle agus seachd ceud reithe, agus seachd mìle agus seachd ceud boc-goibhre.

¹² Agus dh’fhàs Iehosaphat gu h‑anabarrach mòr: agus thog e ann an Iùdah caistealan agus bailtean-ionmhais.

¹³ Agus bha mòran obrach aige ann am bailtean Iùdah, agus fir-chogaidh, daoine comasach gaisgeil ann an Ierusalem.

¹⁴ Agus seo an àireamh, a rèir taigh an athraichean: de Iùdah, ceannardan mhìltean: Adnah an ceannard, agus maille ris daoine comasach gaisgeil, trì cheud mìle.

¹⁵ Agus na dhèidh-san Iehohanan an ceannard, agus maille ris dà cheud agus ceithir-fichead mìle.

¹⁶ Agus na dhèidh-san Amasiah mac Shichri, a thug e fhèin suas don Tighearna, agus maille ris dà cheud mìle fear comasach gaisgeil.

¹⁷ Agus de Bheniàmin: Eliada fear comasach gaisgeil, agus maille ris daoine armaichte le bogha agus le targaid, dà cheud mìle.

¹⁸ Agus na dhèidh-san Iehosabad, agus maille ris ceud agus ceithir-fichead mìle, deas gu cogadh.

¹⁹ Bha iad sin a’ feitheamh air an rìgh, a bhàrr orrasan a chuir an rìgh anns na bailtean daingnichte air feadh Iùdah uile.