2 Eachdraidh 15 - Am Bìoball Gàidhlig 1992

¹ Agus thàinig spiorad Dhè air Asariah mac Odeid:

² Agus chaidh e suas an coinneamh Asa, agus thubhairt e ris, Eisdibh riumsa, Asa, agus Iùdah uile, agus a Bheniàmin: Tha an Tighearna maille ribh, am feadh a tha sibhse maille ris-san: agus ma dh’iarras sibh e, gheibhear leibh e: ach ma thrèigeas sibhse esan, trèigidh esan sibhse.

³ A‑nis rè iomadh là bidh Israel as eugmhais Dia na fìrinn, agus as eugmhais sagairt a theagaisgeas, agus as eugmhais lagha.

⁴ Ach nuair a thilleas iad nan airc a dh’ionnsaigh an Tighearna Dia Israeil, agus a dh’iarras iad e, gheibhear leo e.

⁵ Agus anns na h‑àmannan sin, cha bhi sìth ann dhàsan a thèid a‑mach, no dhàsan a thig a‑steach, ach buaireas mòr air uile luchd-àiteachaidh nan dùthchannan.

⁶ Agus sgriosar cinneach le cinneach, agus baile le baile; oir claoidhidh Dia iad leis gach airc.

⁷ Ach bithibh-se làidir, agus na biodh ur làmhan lag; oir tha duais ann airson ur n‑obrach.

⁸ Agus nuair a chuala Asa na briathran sin, agus fàidheadaireachd Asariah mhic Odeid am fàidh, ghabh e misneach, agus chuir e air falbh na h‑iodhalan gràineil à tìr Iùdah agus Bheniàmin uile, agus as na bailtean a ghlac e de shliabh Ephraim, agus dh’athnuadhaich e altair an Tighearna, a bha air beulaibh sgàth-thaigh an Tighearna.

⁹ Agus chruinnich e Iùdah uile agus Beniàmin, agus na coigrich maille riu à Ephraim, agus à Manaseh, agus à Simeon: oir thàinig iad thairis da ionnsaigh à Israel ann am pailteas, nuair a chunnaic iad gu robh an Tighearna a Dhia maille ris.

¹⁰ Agus chruinnich iad an ceann a chèile aig Ierusalem anns an treas mìos, anns a’ chòigeamh-bliadhna-deug de rìoghachadh Asa.

¹¹ Agus dh’ìobair iad don Tighearna anns an àm sin den chreich a thug iad leo, seachd ceud bò, agus seachd mìle caora.

¹² Agus rinn iad coicheangal gun iarradh iad an Tighearna, Dia an athraichean, len uile chridhe, agus len uile anam:

¹³ Agus gun rachadh gach neach nach iarradh an Tighearna Dia Israeil a chur gu bàs, co‑dhiù bu bheag no mòr, fear no bean, e.

¹⁴ Agus mhionnaich iad don Tighearna le guth àrd, agus le gàir, agus le trompaidean, agus le buabhallan.

¹⁵ Agus rinn Iùdah uile gàirdeachas a‑thaobh nam mionnan sin: oir mhionnaich iad len uile chridhe, agus dh’iarr iad e len uile rùn; agus fhuaireadh e leo. Agus thug an Tighearna fois dhaibh air gach taobh.

¹⁶ Agus mar an ceudna a‑thaobh Mhaachah, màthair rìgh Asa, chuir e i o bhith na bànrighinn, a chionn gun do rinn i dealbh uamhasach ann an doire: agus gheàrr Asa sìos a dealbh uamhasach, agus mhìn-phronn e e, agus loisg e e aig sruth Chidroin.

¹⁷ Ach cha do chuireadh na h‑àitean àrda air falbh à Israel: gidheadh bha cridhe Asa iomlan rè a làithean uile.

¹⁸ Agus thug e a‑steach na nithean a naomhaich a athair, agus na nithean a naomhaich e fhèin, do thaigh an Tighearna, airgead, agus òr, agus soithichean.

¹⁹ Agus cha robh cogadh tuilleadh ann gu ruig an còigeamh-bliadhna-deug ar fhichead de rìoghachadh Asa.