2 Eachdraidh 14 - Am Bìoball Gàidhlig 1992

¹ Agus chaidil Abiah maille ra athraichean, agus dh’adhlaic iad e ann am baile Dhaibhidh; agus rìghich Asa a mhac na àite. Na làithean-san bha an tìr sàmhach deich bliadhna.

² Agus rinn Asa an nì a bha math agus ceart ann an sùilean an Tighearna a Dhia:

³ Oir chuir e air falbh altairean nan diathan coimheach, agus na h‑àitean àrda, agus bhris e sìos na dealbhan, agus gheàrr e sìos na doireachan;

⁴ Agus dh’àithn e do Iùdah an Tighearna, Dia an athraichean, iarraidh, agus an lagh a ghleidheadh, agus an àithne.

⁵ Chuir e air falbh mar an ceudna à uile bhailtean Iùdah na h‑àitean àrda, agus na dealbhan. Agus bha an rìoghachd sàmhach na làthair.

⁶ Agus thog e bailtean daingnichte ann an Iùdah: oir bha an tìr sìochail, agus cha robh cogadh aige anns na bliadhnachan sin; oir thug an Tighearna fois dha.

⁷ Uime sin thubhairt e ri Iùdah, Togamaid na bailtean seo, agus dèanamaid mun cuairt orra ballachan, le tùir, geatachan, agus crainn, nuair a tha an tìr fhathast romhainn: oir dh’iarr sinne an Tighearna ar Dia; dh’iarr sinn e, agus thug e fois dhuinn air gach taobh. Uime sin thog e iad, agus shoirbhich leo.

⁸ Agus bha aig Asa armailt de dhaoine a dh’iomchair sgiath agus sleagh, à Iùdah trì cheud mìle, agus à Beniàmin, a dh’iomchair targaid agus a tharraing bogha dà cheud agus ceithir fichead mìle; iad sin uile nan daoine treuna gaisgeil.

⁹ Agus thàinig a‑mach nan aghaidh Serah an t‑Etiopach le armailt mìle de mhìltean, agus trì cheud carbad, agus thàinig e gu Maresah.

¹⁰ Agus chaidh Asa a‑mach na aghaidh, agus chuir iad an cath an òrdagh ann an gleann Shephatah aig Maresah.

¹¹ Agus ghlaodh Asa ris an Tighearna a Dhia, agus thubhairt e, A Thighearna, chan eil ann ach an aon chuid dhutsa cuideachadh le mòran, no leòsan a tha gun neart: cuidich leinne, a Thighearna ar Dia; oir asadsa earbaidh sinn, agus ann ad ainm-sa thèid sinn an aghaidh na mòr-chuideachd seo: a Thighearna, is tusa ar Dia: na buadhaicheadh duine ad aghaidh.

¹² Agus bhuail an Tighearna na h‑Etiopaich ro Asa, agus ro Iùdah: agus theich na h‑Etiopaich.

¹³ Agus lean Asa agus an sluagh a bha maille ris iad gu Gèrar: agus thuit de na h‑Etiopaich uiread is nach robh tuilleadh neirt aca: oir sgriosadh iad ron Tighearna agus ro a fheachd: agus thug iad leo ro‑mhòran creiche.

¹⁴ Agus bhuail iad na bailtean uile mun cuairt air Gèrar, oir bha eagal an Tighearna orra; agus chreach iad na bailtean uile, oir bha mòran creiche annta.

¹⁵ Agus bhuail iad mar an ceudna bùthan na sprèidhe, agus thug iad leo caoraich ann am pailteas, agus càmhail; agus thill iad gu Ierusalem.