2 Eachdraidh 1 - Am Bìoball Gàidhlig 1992

¹ Agus dhaingnicheadh Solamh mac Dhaibhidh na rìoghachd, agus bha an Tighearna a Dhia maille ris, agus dh’àrdaich e e gu mòr.

² Agus dh’àithn Solamh do Israel uile, do na ceannardan mhìltean agus cheud, agus do na britheamhan, agus do gach uachdaran air Israel uile, cinn nan athraichean.

³ Agus chaidh Solamh agus an coitheanal uile maille ris don àit àrd a bha ann an Gibeon; oir an sin bha pàillean coitheanal Dhè, a rinn Maois, òglach an Tighearna, anns an fhàsach.

⁴ Ach àirc Dhè thug Daibhidh a‑nìos o Chiriat-iearim don àit a dh’ullaich Daibhidh dhi; oir shuidhich e pàillean air a son ann an Ierusalem.

⁵ Mar an ceudna, bha an altair umha, a rinn Besalil mac Uri mhic Huir, an sin fa chomhair pàillean an Tighearna; agus dh’iarr Solamh agus an coitheanal i.

⁶ Agus chaidh Solamh suas an sin a dh’ionnsaigh na h‑altair umha am fianais an Tighearna, a bha aig pàillean a’ choitheanail, agus dh’ìobair e oirre mìle ìobairt-loisgte.

⁷ Air an oidhche sin dh’fhoillsich Dia e fhèin do Sholamh, agus thubhairt e ris, Iarr ciod a bheir mi dhut.

⁸ Agus thubhairt Solamh ri Dia, Nochd thu do Dhaibhidh m’athair coibhneas mòr, agus rinn thu mise ann am rìgh na àite.

⁹ A‑nis, a Thighearna Dhè, coileanar do ghealladh do Dhaibhidh m’athair: oir rinn thu mise ann am rìgh air sluagh, lìonmhor mar dhuslach na talmhainn.

¹⁰ Thoir dhomh a‑nis gliocas agus eòlas, a‑chum gun tèid mi a‑mach agus gun tig mi a‑steach ron t‑sluagh seo: oir cò as urrainn breith a thabhairt air do shluagh seo a tha cho mòr?

¹¹ Agus thubhairt Dia ri Solamh, A chionn gu robh seo ad chridhe, agus nach d’iarr thu beartas, maoin, no cliù, no anam do naimhdean, agus mar an ceudna nach d’iarr thu saoghal fada; ach gun d’iarr thu dhut fhèin gliocas agus eòlas, leis an tugadh tu breith air mo shluagh-sa, air an do rinn mi thu ad rìgh:

¹² Tha gliocas agus eòlas air an tabhairt dhut, agus bheir mise dhut beartas, agus maoin, agus cliù, air chor is nach robh a leithid aig na rìghrean a bha romhad, agus ad dhèidh nach bi a lethid.

¹³ Agus thàinig Solamh on àit àrd a bha ann an Gibeon gu Ierusalem, o làthair pàillean a’ choitheanail, agus rìghich e os cionn Israeil.

¹⁴ Agus chruinnich Solamh carbadan agus marc-shluagh: agus bha mìle agus ceithir cheud carbad aige, agus dà‑mhìle-dheug marcaiche; agus chuir e iad ann am bailtean nan carbad, agus maille ris an rìgh ann an Ierusalem.

¹⁵ Agus thug an rìgh air airgead agus air òr a bhith ann an Ierusalem mar na clachan, agus air na croinn seudair thug e a bhith mar na croinn shicomoir a tha anns an t‑srath, air lìonmhorachd.

¹⁶ Agus thugadh eich do Sholamh a‑mach as an Eiphit, agus snàth-lìn: ghabh ceannaichean an rìgh an snàth-lìn air luach.

¹⁷ Agus thàinig iad a‑nìos, agus thug iad a‑mach as an Eiphit carbad air sia ceud secel airgid, agus each air ceud agus lethcheud: agus mar sin do uile rìghrean nan Hiteach, agus do rìghrean Shiria, len làimh-san thugadh a‑mach iad.