2 Corintianach 13 - Am Bìoball Gàidhlig 1992

¹ Is i seo an treas uair a tha mi a’ teachd dur n‑ionnsaigh: ann am beul dithis no triùir fhianaisean bidh gach facal seasmhach.

² Dh’innis mi cheana, agus tha mi ro‑làimh ag innse dhuibh, mar gum bithinn an làthair an dara uair; agus a‑nis air dhomh a bhith as ur làthair, tha mi a’ sgrìobhadh a‑chum na dream a pheacaich roimhe seo, agus a‑chum chàich uile, ma thig mi a‑rìs, nach caomhain mi:

³ O tha sibh ag iarraidh dearbhaidh air Crìosd a’ labhairt annamsa, neach dur taobh-se nach eil anfhann, ach a tha cumhachdach annaibh.

⁴ Oir ged a cheusadh e tre anfhainneachd, gidheadh tha e beò tre chumhachd Dhè: oir tha sinne mar an ceudna anfhann annsan, gidheadh bidh sinn beò maille ris tre chumhachd Dhè dur taobh-se.

⁵ Ceasnaichibh sibh fhèin, a bheil sibh anns a’ chreideamh; dearbhaibh sibh fhèin: nach aithne dhuibh sibh fhèin, gu bheil Iosa Crìosd annaibh, mura daoine a chuireadh air cùl sibh?

⁶ Ach tha dòchas agam gum bi fhios agaibh nach daoine a chuireadh air cùl sinne.

⁷ A‑nis tha mi a’ guidhe air Dia gun sibhse a dhèanamh uilc air bith; chan ann a‑chum gum faicear sinne a bhith dearbhte, ach a‑chum gun dèanadh sibhse an nì sin a tha math, ged robh sinne mar dhaoine a chuireadh air cùl.

⁸ Oir chan urrainn sinn nì air bith a dhèanamh an aghaidh na fìrinn, ach airson na fìrinn.

⁹ Oir tha sinn subhach nuair a tha sinn fhèin anfhann, agus sibhse làidir: agus tha sinn a’ guidhe seo mar an ceudna, sibhse a bhith coileanta.

¹⁰ Is ann uime seo a sgrìobh mi na nithean seo dur n‑ionnsaigh air dhomh a bhith as ur làthair, a‑chum air dhomh a bhith an làthair nach bithinn garg, a rèir a’ chumhachd a thug an Tighearna dhomh a‑chum togail suas, ach chan ann a‑chum sgrios.

¹¹ Fa‑dheòidh, a bhràithrean, slàn leibh: bithibh coileanta, bithibh subhach, bithibh a dh’aon inntinn, bithibh sìochail; agus bidh Dia a’ ghràidh agus na sìthe maille ribh.

¹² Cuiribh fàilte air a chèile le pòig naoimh.

¹³ Tha na naoimh uile a’ cur beannachd dur n‑ionnsaigh.

¹⁴ Gràs an Tighearna Iosa Crìosd, agus gràdh Dhè, agus co‑chomann an Spioraid Naoimh, gu robh maille ribh uile. Amen.