1 Samuel 6 - Am Bìoball Gàidhlig 1992

¹ Agus bha àirc an Tighearna ann am fearann nam Philisteach seachd mìosan.

² Agus ghairm na Philistich air na sagartan agus air na fiosaichean, ag ràdh, Ciod a nì sinn ri àirc an Tighearna? Thugaibh fios dhuinn cionnas a chuireas sinn air falbh i da h‑àite fhèin.

³ Agus thubhairt iadsan, Ma chuireas sibh air falbh àirc Dia Israeil, na cuiribh uaibh falamh i; ach air gach uile chor ìocaibh dha tabhartas-easaontais: an sin slànaichear sibh, agus bidh fhios agaibh carson nach do thill a làmh uaibh.

⁴ An sin thubhairt iad, Ciod an tabhartas-easaontais a dh’ìocas sinn dha? Agus fhreagair iadsan, Còig neasgaidean òir, agus còig luchan òir, a rèir àireamh tighearnan nam Philisteach; oir bha aon phlàigh oirbh uile, agus air ur tighearnan.

⁵ Uime sin nì sibh dealbhan ur neasgaidean, agus dealbhan ur luchan, a tha a’ milleadh na tìre; agus bheir sibh glòir do Dhia Israeil: theagamh gun aotromaich e a làmh dhibh, agus de ur diathan, agus de ur tìr.

⁶ Carson uime sin a chruadhaicheas sibh ur cridhe, mar a chruadhaich na h‑Eiphitich agus Phàraoh an cridhe, nuair a rinn e gu h‑iongantach nam measg, nach do leig iad an sluagh air falbh, agus dh’imich iad?

⁷ A‑nis uime sin dèanaibh feun nodha, agus gabhaibh dà mhart-bhainne, air nach deachaidh cuing: agus ceanglaidh sibh na mairt ris an fheun, agus bheir sibh an laoigh dhachaigh uapa:

⁸ Agus gabhaidh sibh àirc an Tighearna, agus cuiridh sibh i air an fheun; agus cuiridh sibh na seudan òir, a dh’ìocas sibh dha mar thabhartas-easaontais, ann an cobhan ra taobh; agus cuiridh sibh air falbh i, a‑chum gun imich i.

⁹ Agus chì sibh, ma thèid i suas rathad a crìche fhèin gu Bet-semes, an sin rinn e an t‑olc mòr seo oirnn: ach mura tèid, an sin bidh fhios againn nach i a làmh-san a bhuail sinn; is tuiteamas a thàinig oirnn.

¹⁰ Agus rinn na daoine mar sin; agus ghabh iad dà mhart-bhainne agus cheangail iad ris an fheun iad, agus dhruid iad an laoigh a‑staigh:

¹¹ Agus chuir iad àirc an Tighearna air an fheun, agus an cobhan leis na luchan òir, agus dealbhan an neasgaidean fala.

¹² Agus ghabh na mairt an rathad dìreach gu slighe Bhet-semeis; air an rathad mhòr dh’imich iad, a’ geumnaich mar a dh’imich iad, agus cha do thionndaidh iad a lethtaobh a dh’ionnsaigh na làimhe deise no na làimhe clìthe; agus chaidh tighearnan nam Philisteach nan dèidh gu crìch Bhet-semeis.

¹³ Agus bha muinntir Bhet-semeis a’ buain an cruithneachd anns a’ ghleann; agus thog iad suas an sùilean, agus chunnaic iad an àirc, agus rinn iad gàirdeachas nuair a chunnaic iad i.

¹⁴ Agus thàinig am feun gu achadh Iosua, am Bet-semeseach, agus sheas e an sin, far an robh clach mhòr; agus sgoilt iad fiodh an fheuna, agus thug iad suas na mairt nan ìobairt-loisgte don Tighearna.

¹⁵ Agus thug na Lèbhithich sìos àirc an Tighearna, agus an cobhan a bha maille rithe, anns an robh na seudan òir, agus chuir iad air a’ chloich mhòir iad: agus thug daoine Bhet-semeis suas tabhartasan-loisgte, agus dh’ìobair iad ìobairtean an là sin fhèin don Tighearna.

¹⁶ Agus nuair a chunnaic còig tighearnan nam Philisteach e, thill iad gu Ecron anns an là sin fhèin.

¹⁷ Agus is iad seo na neasgaidean òir, a dh’ìoc na Philistich mar thabhartas-easaontais don Tighearna: airson Asdoid aon, airson Ghàsa aon, airson Asceloin aon, airson Ghat aon, airson Ecroin aon;

¹⁸ Agus na luchan òir, a rèir àireamh uile bhailtean nam Philisteach a bhuineadh do na còig tighearnan, araon bhailtean daingnichte agus bhailtean gun bhalla, eadhon gu ruig a’ chlach mhòr, air an do chuir iad sìos àirc an Tighearna, clach a tha an làthair gus an là‑an‑diugh ann an achadh Iosua, am Bet-semeseach.

¹⁹ Ach bhuail e daoine Bhet-semeis, a chionn gun do sheall iad air àirc an Tighearna; bhuail e eadhon den t‑sluagh trì-fichead agus deichnear fhear: agus rinn an sluagh caoidh, do bhrìgh gun do bhuail an Tighearna cuid den t‑sluagh le plàigh mhòir.

²⁰ Agus thubhairt daoine Bhet-semeis, Cò as urrainn seasamh an làthair an Tighearna, an Dia naomh seo? Agus cò a dh’ionnsaigh an tèid i suas uainne?

²¹ Agus chuir iad teachdairean a dh’ionnsaigh luchd-àiteachaidh Chiriat-iearim, ag ràdh, Thug na Philistich air a h‑ais àirc an Tighearna; thigibh a‑nuas, thugaibh suas i dur n‑ionnsaigh.