1 Samuel 3 - Am Bìoball Gàidhlig 1992

¹ Agus fhritheil an leanabh Samuel don Tighearna, am fianais Eli: agus bha facal an Tighearna luachmhor anns na làithean sin; cha robh taisbeanadh follaiseach ann.

² Agus thàrladh anns an àm sin, nuair a bha Eli na laighe na àite: (agus thòisich a shùilean air fàilneachadh: cha b’urrainn e faicinn gu math;)

³ Agus mun deachaidh lòchran Dhè as, nuair a bha Samuel na laighe ann an teampall an Tighearna, far an robh àirc Dhè;

⁴ Gun do ghairm an Tighearna air Samuel; agus fhreagair esan, Tha mi an seo.

⁵ Agus ruith e a dh’ionnsaigh Eli, agus thubhairt e, Tha mi an seo, oir ghairm thu orm. Agus thubhairt esan, Cha do ghairm mise ort: till, laigh sìos. Agus dh’fhalbh e agus laigh e sìos.

⁶ Agus ghairm an Tighearna a‑rìs air Samuel. Agus dh’èirich Samuel, agus chaidh e a dh’ionnsaigh Eli, agus thubhairt e, Tha mi an seo, oir ghairm thu orm, Agus fhreagair esan, Cha do ghairm mise ort, a mhic; till, laigh sìos.

⁷ A‑nis cha b’aithne do Shamuel fhathast an Tighearna, agus cha d’fhoillsicheadh facal an Tighearna fhathast dha.

⁸ Agus ghairm an Tighearna fhathast air Samuel an treas uair. Agus dh’èirich e, agus chaidh e a dh’ionnsaigh Eli, agus thubhairt e, Tha mi an seo, oir ghairm thu orm. Agus thuig Eli gum b’e an Tighearna a ghairm air an leanabh.

⁹ Uime sin thubhairt Eli ri Samuel, Falbh, laigh sìos; agus ma ghairmeas e ort, an sin their thu, Labhair, a Thighearna, oir tha do sheirbhiseach a’ cluinntinn. Agus dh’fhalbh Samuel, agus laigh e sìos na àite fhèin.

¹⁰ Agus thàinig an Tighearna, agus sheas e, agus ghairm e mar air na h‑uairean eile, A Shamueil, a Shamueil. An sin fhreagair Samuel, Labhair, oir tha do sheirbhiseach a’ cluinntinn.

¹¹ Agus thubhairt an Tighearna ri Samuel, Feuch, nì mi nì ann an Israel, a nì gaoir ann an dà chluais gach neach a chluinneas e.

¹² Anns an là sin coileanaidh mi an aghaidh Eli na nithean sin uile a labhair mi mu thimcheall a thaighe: tòisichidh mi agus crìochnaichidh mi.

¹³ Oir dh’innis mi dha gun toir mi breith air a thaigh gu bràth, airson na h‑aingidheachd air a bheil e fiosrach; a chionn gun tug a mhic masladh dhòmhsa, agus nach do chaisg esan iad.

¹⁴ Agus uime sin mhionnaich mi do thaigh Eli, nach glanar as aingidheachd taigh Eli le ìobairt no le tabhartas gu bràth.

¹⁵ Agus laigh Samuel gu madainn, agus dh’fhosgail e dorsan taigh an Tighearna: agus bha eagal air Samuel an taisbeanadh innse do Eli.

¹⁶ An sin ghairm Eli air Samuel, agus thubhairt e, A Shamueil, a mhic. Agus thubhairt esan, Tha mi an seo.

¹⁷ Agus thubhairt e, Ciod an nì a chaidh a ràdh riut? Na ceil ormsa e, guidheam ort: gun dèanadh Dia mar sin riut, agus tuilleadh mar an ceudna, ma cheileas tu nì air bith orm, de gach nì a chaidh a ràdh riut.

¹⁸ Agus dh’innis Samuel dha na h‑uile nithean, agus cha do cheil e nì sam bith air. Agus thubhairt esan, Is e an Tighearna a tha ann; an nì sin a tha math na shùilean nì e.

¹⁹ Agus dh’fhàs Samuel suas, agus bha an Tighearna maille ris, agus cha do leig e do aon air bith de a fhacail tuiteam a dh’ionnsaigh an làir.

²⁰ Agus bha fhios aig Israel uile, o Dhan gu ruig Beer-sèba, gun d’òrdaicheadh Samuel na fhàidh don Tighearna.

²¹ Agus thaisbeineadh an Tighearna a‑rìs ann an Siloh; oir dh’fhoillsich an Tighearna e fhèin do Shamuel ann an Siloh, le facal an Tighearna.