1 Rìgh 10 - Am Bìoball Gàidhlig 1992

¹ Agus nuair a chuala bànrighinn Shèba cliù Sholaimh ann an ainm an Tighearna, thàinig i ga dhearbhadh le ceistean cruaidhe.

² Agus thàinig i do Ierusalem le cuideachd ro‑mhòir, le càmhail a’ giùlan spìosraidh, agus ro‑mhòran òir agus chlachan luachmhor: agus thàinig i a dh’ionnsaigh Sholaimh, agus labhair i ris gach nì a bha na cridhe.

³ Agus mhìnich Solamh dhi a briathran uile: cha robh nì air bith am falach air an rìgh nach do mhìnich e dhi.

⁴ Agus nuair a chunnaic bànrighinn Shèba uile ghliocas Sholaimh, agus an taigh a thog e,

⁵ Agus biadh a bhùird, agus suidhe a sheirbhiseach, agus feitheamh a luchd-frithealaidh, agus an trusgan, agus a ghillean-cupain, agus a dhol suas air an deachaidh e suas gu taigh an Tighearna, cha robh spiorad innte nas mò.

⁶ Agus thubhairt i ris an rìgh, B’fhìor an t‑iomradh a chuala mise ann am thìr fhèin air do ghnìomharan, agus air do ghliocas.

⁷ Gidheadh, cha do chreid mi na briathran gus an tàinig mi agus gum faca mo shùilean fhèin e; agus, feuch, cha d’innseadh a leth dhomh: chaidh do ghliocas agus do shoirbheachadh thar an iomraidh a chuala mi.

⁸ Is sona do dhaoine, is sona iad seo do sheirbhisich, a sheasas ann ad fhianais an còmhnaidh, ag èisdeachd rid ghliocas.

⁹ Guma beannaichte an Tighearna do Dhia, a ghabh tlachd annad gud chur air rìgh-chathair Israeil: a chionn gu bheil gràdh aig an Tighearna do Israel gu bràth, uime sin rinn e thusa ad rìgh, a dhèanamh breitheanais agus ceartais.

¹⁰ Agus thug i don rìgh sia-fichead tàlann òir, agus ro‑mhòran de spìosraidh, agus clachan luachmhor: (cha tàinig riamh tuilleadh a leithid seo de phailteas spìosraidh is a thug bànrighinn Shèba do rìgh Solamh.

¹¹ Agus mar an ceudna luingeas Hiraim a ghiùlain òr o Ophir, thug i o Ophir ro‑mhòran de fhiodh almuig, agus clachan luachmhor.

¹² Agus rinn an rìgh den fhiodh almuig puist do thaigh an Tighearna, agus do thaigh an rìgh, clàrsaichean mar an ceudna agus saltairean don luchd-ciùil: cha tàinig a leithid seo de fhiodh almuig, agus chan fhacas a leithid gus an là‑an‑diugh.)

¹³ Agus thug rìgh Solamh do bhànrighinn Shèba a h‑uile mhiann a dh’iarr i, a thuilleadh air na thug e dhi a rèir a fhialaidheachd rìoghail fhèin: agus thill i, agus dh’fhalbh i da tìr, i fhèin agus a seirbhisich.

¹⁴ A‑nis b’e cudthrom an òir a thàinig gu Solamh ann an aon bhliadhna, sia ceud, trì-fichead, agus sia tàlannan òir;

¹⁵ A thuilleadh air na fhuair e o na ceannaichean, agus o mhalairt an luchd-spìosraidh, agus o uile rìghrean Aràbia, agus o uachdarain na tìre.

¹⁶ Agus rinn rìgh Solamh dà cheud sgiath de òr buailte: sia ceud secel òir chuir e a‑chum gach sgèithe.

¹⁷ Agus rinn e trì cheud targaid de òr buailte: trì puinnd òir chuir e a‑chum gach targaide: agus chuir an rìgh iad ann an taigh frìth Lebanoin.

¹⁸ Rinn an rìgh mar an ceudna rìgh-chathair mhòr de fhiaclan elephant, agus chòmhdaich e i leis an òr a bu ghlaine.

¹⁹ Bha sia ceuman aig an rìgh-chathair, agus bha mullach na rìgh-chathrach cruinn o a cùl: agus bha làmhan air gach taobh den àite-shuidhe, agus dà leòmhann a’ seasamh làimh ris na làmhan.

²⁰ Agus sheas dà‑leòmhann-dheug an sin air na sia ceuman, air an taobh seo agus air an taobh ud: cha do rinneadh a leithid ann an rìoghachd air bith eile.

²¹ Agus bha uile shoithichean-òil rìgh Solamh de òr, agus uile shoithichean taigh frìth Lebanoin de òr fìorghlan: cha robh aon dhiubh de airgiod; cha robh meas air bith dheth ann an làithean Sholaimh.

²² Oir bha luingeas Tharsis aig an rìgh air muir maille ri luingeas Hiraim: aon uair anns na trì bliadhna thàinig luingeas Tharsis, a’ giùlan òir, agus airgid, fiaclan elephant, agus apa, agus pheucag.

²³ Mar seo thug rìgh Solamh barrachd air uile rìghrean an domhain ann an saoibhreas agus ann an gliocas.

²⁴ Agus dh’iarr an talamh uile teachd an làthair Sholaimh, a dh’èisdeachd ra ghliocas, a chuir Dia na chridhe.

²⁵ Agus thug iad leo gach fear a thìodhlac; soithichean airgid agus soithichean òir, agus trusganan, agus airm, agus spìosraidh, eich agus muileidean; cuibhreann bliadhna anns gach bliadhna.

²⁶ Agus chruinnich Solamh carbadan agus marc-shluagh: agus bha mìle agus ceithir cheud carbad aige, agus dà‑mìle-dheug marcaiche, a chuir e ann am bailtean nan carbad, agus maille ris an rìgh ann an Ierusalem.

²⁷ Agus thug an rìgh air airgead a bhith ann an Ierusalem mar chlachan, agus air na craobhan seudair thug e a bhith mar na craobhan sicomoir a tha anns an t‑srath, air lìonmhorachd.

²⁸ Agus thugadh eich do Sholamh a‑mach as an Eiphit, agus snàth-lìn: ghabh ceannaichean an rìgh an snàth-lìn air luach.

²⁹ Agus thàinig carbad a‑nìos agus chaidh e a‑mach as an Eiphit air sia ceud secel airgid, agus each air ceud gu leth: agus mar sin do uile rìghrean nan Hiteach, agus do rìghrean Shiria, thug iadsan a‑mach iad len làimh.