1 Eachdraidh 5 - Am Bìoball Gàidhlig 1992

¹ A‑nis b’iad mic Reubein, ciad-ghin Israeil (oir b’esan an ciad ghin; ach a chionn gun do thruaill e leabaidh a athar, thugadh a chòir-bhreith do mhic Iòseiph mhic Israeil: agus chan eil na ginealaichean gu bhith air an àireamh a rèir na còir-bhreithe;

² Oir bhuadhaich Iùdah air a bhràithrean, agus uaithe-san thàinig an t‑àrd-fhear-riaghlaidh, ach bu le Iòseph a’ chòir-bhreith):

³ Mic Reubein, ciad-ghin Israeil: Hanoch, agus Palu, Hesron, agus Carmi.

⁴ Mic Ioeil: Semaiah a mhac, Gog a mhac-san, Simei a mhac-san,

⁵ Micah a mhac-san, Reaia a mhac-san, Bàal a mhac-san,

⁶ Beerah a mhac-san, a thug Tilgat-pilneser, rìgh Asiria air falbh leis: b’esan uachdaran nan Reubeneach.

⁷ Agus bha a bhràithrean a rèir an teaghlaichean (nuair a dh’àirmheadh an sloinneadh a rèir an ginealaichean), nan cinn-fheadhna, Ieiel, agus Sechariah,

⁸ Agus Bela mac Asais, mhic Shema, mhic Ioeil, aig an robh a chòmhnaidh ann an Aroer, eadhon gu ruig Nebo, agus Bàal-meon:

⁹ Agus a làimh na h‑àird an ear, chòmhnaich e gu ruig dol a‑steach an fhàsaich on abhainn Euphràtes; a chionn gun d’fhàs an sprèidh ro‑lìonmhor ann am fearann Ghilead.

¹⁰ Agus ann an làithean Shauil rinn iad cogadh ris na Hàgaraich, a thuit len làimh: agus chòmhnaich iad nam bùthan-san air feadh uile aghaidh na h‑àird an ear de Ghilead.

¹¹ Agus chòmhnaich clann Ghad thall fan comhair, ann an tìr Bhasain gu ruig Salcah:

¹² Ioel an ceann, agus Saphan a b’fhaisge, agus Iaanai, agus Saphat ann am Basan.

¹³ Agus b’iad am bràithrean de thaigh an athraichean Michael, agus Mesulam, agus Sèba, agus Iorai, agus Iachan, agus Sia, agus Heber, seachdnar.

¹⁴ Is iad sin clann Abihail mhic Huri, mhic Ieroah, mhic Ghilead, mhic Mhichaeil, mhic Iesisai, mhic Iahdo, mhic Bhuis:

¹⁵ Ahi mac Abdieil, mhic Ghuni, ceann-taighe an athraichean.

¹⁶ Agus ghabh iad còmhnaidh ann an Gilead, ann am Basan, agus na bhailtean, agus ann an uile fhearann cho-roinn Shàroin, air an crìochan.

¹⁷ Dh’àirmheadh iad sin uile le sloinnteireachd ann an làithean Iotaim rìgh Iùdah, agus ann an làithean Ierobòaim rìgh Israeil.

¹⁸ Bha mic Reubein, agus na Gadaich, agus leth-threubh Mhanaseh, de fhir threuna, fir chomasach gu sgiath agus claidheamh iomchar, agus gu tilgeadh le bogha, agus teòma air cogadh, ceithir agus trì-fichead mìle agus seachd ceud agus trì-fichead an àireamh, a chaidh a‑mach gu cogadh.

¹⁹ Agus rinn iad cogadh ris na Hàgaraich, agus ri Ietur, agus Nephis, agus Nodab;

²⁰ Agus chuidicheadh leo nan aghaidh, agus thugadh thairis nan làimh na Hàgaraich, agus iadsan uile a bha maille riu: oir dh’èigh iad ri Dia anns a’ chath, agus dh’aontaich esan len guidhe, a chionn gun d’earb iad as.

²¹ Agus thug iad leo am feudail; càmhail deich agus dà‑fhichead mìle, agus de chaoraich dà cheud agus leth-cheud mìle, agus asail dà mhìle, agus de dhaoine ceud mìle:

²² Oir thuit mòran sìos air am marbhadh, a chionn gu robh an cogadh o Dhia. Agus ghabh iad còmhnaidh nan àite gu ruig am braighdeanas.

²³ Agus chòmhnaich clann leth-threubh Mhanaseh anns an tìr, o Bhasan gu Bàal-hermon agus Senir, agus gu sliabh Hermoin; agus dh’fhàs iad lìonmhor.

²⁴ Agus b’iad seo cinn-taighe an athraichean, eadhon Epher, agus Isi, agus Eliel, agus Asriel, agus Ieremiah, agus Hodabhiah, agus Iahdiel, daoine treunmhor, daoine allail, cinn-taighe an athraichean.

²⁵ Ach chiontaich iad an aghaidh Dia an athraichean, agus chaidh iad le strìopachas an dèidh diathan muinntir na tìre, a sgrios Dia romhpa.

²⁶ Agus dhùisg Dia Israeil suas spiorad Phul rìgh Asiria, agus spiorad Thilgat-pilneseir rìgh Asiria, agus thug e leis iad (eadhon na Reubenich, agus na Gadaich, agus leth-threubh Mhanaseh), agus thug e iad gu Halah, agus Habor, agus Hara, agus gu abhainn Ghosain, gus an là‑an‑diugh.