1 Eachdraidh 27 - Am Bìoball Gàidhlig 1992

¹ A‑nis bha clann Israeil, a rèir an àireimh, eadhon cinn nan athraichean, agus na ceannardan mhìltean agus cheud, agus an luchd-riaghlaidh, a’ frithealadh don rìgh anns gach cùis a bhuineadh do na roinnean, a bha a’ teachd a‑steach agus a’ dol a‑mach mìos air mhìos air feadh uile mhìosan na bliadhna: anns gach roinn bha ceithir-mìle-fichead fear.

² Os cionn na ciad roinne, fa chomhair a’ chiad mhìos, bha Iasobeam mac Shabdieil: agus na roinn-san bha ceithir-mìle-fichead.

³ De chloinn Pheres bha ceann uile cheannardan an t‑slòigh fa chomhair a’ chiad mhìos.

⁴ Agus os cionn roinn an dara mìos bha Dodai an t‑Ahohach, agus air a roinn-san b’e Miclot am fear-riaghlaidh: agus na roinn-san mar an ceudna bha ceithir-mìle-fichead.

⁵ B’e treas ceannard an t‑slòigh, fa chomhair an treasa mìos, Benaiah mac Iohoiada, àrd-shagart: agus na roinn-san bha ceithir-mìle-fichead.

⁶ Seo am Benaiah ud a bha treun am measg an deich-ar‑fhichead, agus os cionn an deich-ar‑fhichead: agus na roinn-san bha Amisabad a mhac.

⁷ B’e an ceathramh ceannard, fa chomhair a’ cheathramh mìos, Asahel bràthair Ioaib, agus Sebadiah a mhac na dhèidh: agus na roinn-san bha ceithir-mìle-fichead.

⁸ B’e an còigeamh ceannard, fa chomhair a’ chòigeamh mìos, Samhut an t‑Israhach: agus na roinn-san bha ceithir-mìle-fichead.

⁹ B’e an siathamh ceannard, fa chomhair an t‑siathamh mìos, Ira mac Iceis, an Tecòthach: agus na roinn-san bha ceithir-mìle-fichead.

¹⁰ B’e an seachdamh ceannard, fa chomhair an t‑seachdamh mìos, Heles am Pelonach de chloinn Ephraim; agus na roinn-san bha ceithir-mìle-fichead.

¹¹ B’e an t‑ochdamh ceannard, fa chomhair an ochdamh mìos, Sibecai an Husatach de na Sarhaich: agus na roinn-san bha ceithir-mìle-fichead.

¹² B’e an naoidheamh ceannard, fa chomhair an naoidheamh mìos, Abièser an t‑Anetotach de chloinn Iamin: agus na roinn-san bha ceithir-mìle-fichead.

¹³ B’e an deicheamh ceannard, fa chomhair an deicheamh mìos, Maharai an Netophatach de na Sarhaich: agus na roinn-san bha ceithir-mìle-fichead.

¹⁴ B’e an t‑aon-cheannard-deug, fa chomhair an aon-mhìos-deug, Benaiah am Piratonach de chloinn Ephraim: agus na roinn-san bha ceithir-mìle-fichead.

¹⁵ B’e an dara-ceannard-deug, fa chomhair an dara-mìos-deug, Heldai an Netophatach o Otniel: agus na roinn-san bha ceithir-mìle-fichead.

¹⁶ Os bàrr, os cionn treubhan Israeil: b’e ceannard nan Reubeneach, Elièser mac Shichri: nan Simeonach, Sephatiah mac Mhaachah:

¹⁷ Ceannard nan Lèbhitheach, Hasabiah mac Chemueil: ceannard nan Aaronach, Sadoc:

¹⁸ Ceannard Iùdah, Elihu aon de bhràithrean Dhaibhidh: ceannard Isachair, Omri mac Mhichaeil:

¹⁹ Ceannard Shebuluin, Ismaiah mac Obadiah: ceannard Naphtali, Ierimot mac Asrieil:

²⁰ Ceannard chloinn Ephraim, Hosèa mac Asasiah: ceannard leth-threubh Mhanaseh Ioel mac Phedaiah:

²¹ Ceannard leth-threubh Mhanaseh ann an Gilead, Ido mac Shechariah: ceannard Bheniàmin, Iasiel mac Abneir:

²² Ceannard Dhain, Asareel mac Ierohaim. B’iad sin ceannardan treubhan Israeil.

²³ Ach cha do ghabh Daibhidh an àireamh o aois fichead bliadhna agus foidhe; a chionn gun dubhairt an Tighearna gun dèanadh e Israel lìonmhor mar reultan nan nèamh.

²⁴ Thòisich Ioab mac Sheruiah air àireamh, ach cha do chrìochnaich e, a chionn gu robh air a shon seo fearg an aghaidh Israeil; cha mhò a chuireadh sìos an uimhir ann an àireamh eachdraidh rìgh Dhaibhidh.

²⁵ Agus os cionn ionmhasan an rìgh bha Asmabhet mac Adieil: agus os cionn nan taigh-tasgaidh anns na machraichean, anns na mòr-bhailtean, agus anns na frith-bhailtean, agus anns na tùran, bha Iehonatan mac Udsiah.

²⁶ Agus os an cionn-san a rinn obair na machrach, ann an treabhadh an fhearainn, bha Esri mac Cheluib.

²⁷ Agus os cionn nam fìonlios bha Simei an Ramatach: os cionn toradh nam fìonlios, fa chomhair nam fìon-thaisgeach, bha Sabdi an Siphmitheach.

²⁸ Agus os cionn nan craobh-ola agus nan craobh sicomoir a bha anns na còmhnardan ìosal, bha Bàal-hanan an Gedereach: agus os cionn nan taisgeachan ola bha Iòas.

²⁹ Agus os cionn a’ chruidh a bha air feurach ann an Sàron bha Sitrai an Saronach: agus os cionn a’ chruidh anns na gleanntan bha Saphat mac Adlai.

³⁰ Os cionn nan càmhal mar an ceudna bha Obil an t‑Ismaeleach: agus os cionn nan asal bha Iehdeiah am Meronotach.

³¹ Agus os cionn nan treud bha Iasis an t‑Hagereach. B’iad sin uile luchd-riaghlaidh na maoin a bu le rìgh Daibhidh.

³² Mar an ceudna bha Ionatan, bràthair-athar Dhaibhidh na chomhairleach, na dhuine glic, agus na sgrìobhaiche: agus bha Ieheil mac Hachmoni maille ri mic an rìgh.

³³ Agus b’e Ahitophel comhairleach an rìgh, agus Husai an t‑Architheach companach an rìgh.

³⁴ Agus an dèidh Ahitopheil bha Iehoiada mac Bhenaiah, agus Abiatar. Agus b’e Ioab ceannard armailt an rìgh.