1 Eachdraidh 2 - Am Bìoball Gàidhlig 1992

¹ Is iad seo mic Israeil: Reuben, Simeon, Lèbhi, agus Iùdah, Isachar, agus Sebulun,

² Dan, Iòseph, agus Beniàmin, Naphtali, Gad, agus Aser.

³ Mic Iùdah: Er, agus Onan, agus Selah: an triùir seo rugadh dha le nighinn Shuah a’ bhan-Chanàanach. Agus bha Er ciad-ghin Iùdah olc ann an sùilean an Tighearna, agus mharbh e e.

⁴ Agus rug Tàmar a bhana-chliamhain dha Phares, agus Serah. B’iad uile mhic Iùdah còignear.

⁵ Mic Phareis: Hesron agus Hamul.

⁶ Agus mic Sherah: Simri, agus Etan, agus Heman, agus Calcol, agus Dara: còignear dhiubh uile.

⁷ Agus mic Charmi: Achar, fear-buaireis Israeil, a chiontaich anns an nì mhallaichte,

⁸ Agus mic Etain: Asariah.

⁹ Agus mic Hesroin, a rugadh dha: Ierahmeel, agus Ram, agus Chelubai.

¹⁰ Agus ghin Ram Aminadab, agus ghin Aminadab Nahson, ceannard chloinn Iùdah;

¹¹ Agus ghin Nahson Salma, agus ghin Salma Bòas,

¹² Agus ghin Bòas Obed, agus ghin Obed Iese.

¹³ Agus ghin Iese a chiad-ghin Eliab, agus Abinadab an dara mac, agus Sima an treas,

¹⁴ Netaneel an ceathramh, Radai an còigeamh,

¹⁵ Osem an siathamh, Daibhidh an seachdamh:

¹⁶ Agus b’iad am peathraichean-san Seruiah agus Abigail. Agus mic Sheruiah: Abisai, agus Ioab, agus Asahel, triùir.

¹⁷ Agus rug Abigail Amasa: agus b’e athair Amasa Ieter an t‑Ismeeleach.

¹⁸ Agus ghin Càleb mac Hesroin ri Asubah a bhean, Ieriot: b’iad seo mar an ceudna a mic, Ieser, agus Sobab, agus Ardon.

¹⁹ Agus nuair a bha Asubah marbh, ghabh Càleb da ionnsaigh Ephrat, a rug Hur dha.

²⁰ Agus ghin Hur Uri, agus ghin Uri Besalil.

²¹ Agus na dhèidh sin chaidh Hesron a‑steach a dh’ionnsaigh nighean Mhachir, athair Ghilead, agus ghabh e i nuair a bha e trì-fichead bliadhna a dh’aois; agus rug i dha Segub.

²² Agus ghin Segub Iair, aig an robh trì-ar‑fhichead de bhailtean mòra ann an tìr Ghilead.

²³ Agus thug e Gesur agus Aram le bailtean Iair uapa, maille ri Cenat agus a bhailtean, eadhon trì-fichead baile mòr: bhuin iad sin uile do mhic Mhachir, athair Ghilead.

²⁴ Agus an dèidh do Hesron bàs fhaghail ann an Càleb-ephratah, an sin rug Abiah bean Hesroin Asur, athair Thecòah, dha.

²⁵ Agus b’iad mic Ierahmeeil, ciad-ghin Hesroin, Ram an ciad-ghin, agus Bunah, agus Oren, agus Osem, agus Ahiah.

²⁶ Bha mar an ceudna bean eile aig Ierahmeel dom b’ainm Atarah: b’ise màthair Onaim.

²⁷ Agus b’iad mic Ram, ciad-ghin Ierahmeeil, Maas, agus Iamin, agus Ecer.

²⁸ Agus b’iad mic Onaim, Samai, agus Iada. Agus mic Shamai: Nàdab agus Abisur.

²⁹ Agus b’e ainm bean Abisuir, Abihail; agus rug i dha Ahban agus Molid.

³⁰ Agus mic Nadaib: Seled agus Apaim: ach fhuair Seled bàs gun chlann.

³¹ Agus mic Apaim: Isi. Agus mic Isi: Sesan. Agus mic Shesain: Ahlai.

³² Agus mic Iada, bràthair Shamai: Ieter, agus Ionatan: agus fhuair Ieter bàs gun chlann.

³³ Agus mic Ionatain: Pelet, agus Sasa. B’iad sin mic Ierahmeeil.

³⁴ A‑nis cha robh aig Sesan mic ach nigheanan: agus bha aig Sesan òglach, Eiphiteach, dom b’ainm Iarha.

³⁵ Agus thug Sesan a nighean da òglach Iarha na mnaoi; agus rug i dha Atai.

³⁶ Agus ghin Atai Nàtan, agus ghin Nàtan Sabad,

³⁷ Agus ghin Sabad Ephlal, agus ghin Ephlal Obed,

³⁸ Agus ghin Obed Iehu, agus ghin Iehu Asariah,

³⁹ Agus ghin Asariah Heles, agus ghin Heles Eleasah,

⁴⁰ Agus ghin Eleasah Sisamai, agus ghin Sisamai Salum,

⁴¹ Agus ghin Salum Iecamiah, agus ghin Iecamiah Elisama.

⁴² A‑nis b’iad mic Chàleib, bràthair Ierahmeeil, Mesa a chiad-ghin; b’esan athair Shiph; agus mic Mharesah athair Hebroin.

⁴³ Agus mic Hebroin: Corah, agus Tapuah, agus Recem, agus Sema.

⁴⁴ Agus ghin Sema Raham, athair Iorcoaim: agus ghin Recem Samai.

⁴⁵ Agus b’e mac Shamai Maon; agus b’e Maon athair Bhet-suir.

⁴⁶ Agus rug Ephah, coileabach Chàleib, Hàran, agus Mosa, agus Gases: agus ghin Hàran Gases.

⁴⁷ Agus mic Iahdai: Regem, agus Iotam, agus Gesan, agus Pelet, agus Ephah, agus Saaph.

⁴⁸ Rug Maachah, coileabach Chàleib, Seber agus Tirhanah.

⁴⁹ Rug i mar an ceudna Saaph athair Mhadmanah, Sebhah athair Mhachbenah, agus athair Ghibeah: agus b’i nighean Chàleib Achsa.

⁵⁰ B’iad seo mic Chàleib mhic Huir, ciad-ghin Ephrata: Sobal athair Chiriat-iearim,

⁵¹ Salma athair Bhetlehem, Hareph athair Bhet-gadeir.

⁵² Agus bha aig Sobal, athair Chiriat-iearim, mic: Haroeh, Hatsi, Hameniot.

⁵³ Agus teaghlaichean Chiriat-iearim: na h‑Itrich, agus na Puthich, agus na Sumataich, agus na Misraich: uapasan thàinig na Sereataich, agus na h‑Estaulaich.

⁵⁴ Mic Shalma: Betlehem, agus na Netophataich, Atarot, taigh Ioaib, agus leth nam Manaheteach, na Soraich.

⁵⁵ Agus teaghlaichean nan sgrìobhaichean a bha a chòmhnaidh aig Iabes: na Tirataich, na Simeataich, agus na Suchataich. Is iad sin na Cenich a thàinig o Hemat, athair taigh Rechaib.