1 Eachdraidh 16 - Am Bìoball Gàidhlig 1992

¹ Agus thug iad a‑steach àirc Dhè, agus chuir iad i ann am meadhon a’ bhùtha a shuidhich Daibhidh air a son: agus thug iad seachad ìobairtean-loisgte agus ìobairtean-sìth am fianais Dhè.

² Agus nuair a chuir Daibhidh crìoch air na h‑ìobairtean-loisgte a thoirt suas, agus na h‑ìobairtean-sìth, bheannaich e an sluagh ann an ainm an Tighearna.

³ Agus roinn e air gach aon de Israel, eadar fhir agus mhnathan, do gach aon, buileann arain, agus mìr math feòla, agus cupan fìona.

⁴ Agus dh’òrdaich e cuid de na Lèbhithich a fhrithealadh ro àirc an Tighearna, agus a chur air chuimhne agus a thoirt buidheachais agus cliù don Tighearna Dia Israeil:

⁵ Aspah an ceann, agus na dhèidh-san Sechariah, an sin Ieiel, agus Semiramot, agus Ieheil, agus Matitiah, agus Eliab, agus Benaiah, agus Obed-edom; agus Ieiel le saltairean agus clàrsaichean; agus Asaph le ciombalan a’ dèanamh fuaim:

⁶ Benaiah mar an ceudna agus Iahasiel na sagartan, le trompaidean a‑ghnàth ro àirc coicheangal Dhè.

⁷ An sin air an là sin, thug Daibhidh seachad a’ chiad uair an laoidh mholaidh seo don Tighearna, ann an làimh Asaiph agus a bhràithrean:

⁸ Molaibh an Tighearna, gairmibh air a ainm, dèanaibh a ghnìomharan aithnichte am measg nan sluagh.

⁹ Seinnibh dhàsan, seinnibh salm dha, labhraibh air a uile obraichean iongantach-san.

¹⁰ Dèanaibh-se uaill na ainm naomh: dèanadh cridhe na muinntir a tha ag iarraidh an Tighearna gàirdeachas.

¹¹ Iarraibh an Tighearna agus a neart, iarraibh a ghnùis a‑ghnàth.

¹² Cuimhnichibh a obraichean iongantach a rinn e, a chomharraidhean agus breitheanais a bheòil;

¹³ O sibhse a shliochd Israeil, a òglaich-san, sibhse a chlann Iàcoib, a dhaoine taghte-san.

¹⁴ Is esan an Tighearna ar Dia-ne; air feadh na talmhainn uile tha a bhreitheanais-san.

¹⁵ Cuimhnichibh an còmhnaidh a choicheangal, am facal a dh’àithn e do mhìle ginealach;

¹⁶ A rinn e ri Abrahàm, agus a mhionnan do Isaac:

¹⁷ Agus dhaingnich e sin do Iàcob mar lagh, do Israel mar choicheangal bithbhuan,

¹⁸ Ag ràdh, Dhutsa bheir mi fearann Chanàain, crannchur ur n‑oighreachd;

¹⁹ Nuair nach robh iad ach ro‑thearc ann an àireamh, agus nan coigrich ann,

²⁰ Agus a chaidh iad o chinneach gu cinneach, agus o rìoghachd gu sluagh eile;

²¹ Cha do leig e le duine sam bith eucoir a dhèanamh orra; agus smachdaich e rìghrean air an son,

²² Ag ràdh, Na beanaibh rim dhaoine ungte, agus air m’fhàidhean na dèanaibh cron sam bith.

²³ Seinnibh don Tighearna, gach uile thìr; foillsichibh o là gu là a shlàinte.

²⁴ Cuiribh a ghlòir an cèill am measg nan cinneach; a obraichean iongantach am measg nan uile shluagh:

²⁵ Oir is mòr an Tighearna, agus ro‑airidh air cliù: agus is adhbhar eagail esan os cionn nan uile dhiathan:

²⁶ Oir is iodhalan uile dhiathan nan cinneach; ach is e an Tighearna a rinn na nèamhan.

²⁷ Tha glòir agus mòralachd na làthair; neart agus subhachas na ionad-san.

²⁸ Thugaibh don Tighearna, sibhse fhineachan nan sluagh, thugaibh don Tighearna urram agus neart.

²⁹ Thugaibh don Tighearna an t‑urram as cubhaidh da ainm: thugaibh tabhartas leibh, agus thigibh na làthair; sleuchdaibh don Tighearna ann am maise na naomhachd.

³⁰ Biodh eagal oirbh na fhianais-san, gach uile thìr: daingnichear an domhan leis, air chor is nach gluaisear e.

³¹ Biodh na nèamhan ait, agus dèanadh an talamh gàirdeachas; agus abradh iad am measg nan cinneach, Tha an Tighearna a’ rìoghachadh.

³² Beucadh an fhairge, agus a làn; dèanadh a’ mhachair gàirdeachas, agus gach nì a tha innte.

³³ An sin seinnidh craobhan na coille gu h‑àrd-ghuthach an làthair an Tighearna, a chionn gu bheil e a’ teachd a thoirt breith air an talamh.

³⁴ Molaibh an Tighearna, oir tha e math; oir gu bràth mairidh a thròcair.

³⁵ Agus abraibh-se, Tèarainn sinn, O Dhè ar slàinte, agus cruinnich ri chèile sinn, agus saor sinn o na cinnich, a‑chum gun toir sinn moladh dod ainm naomh-sa, agus gun dèan sinn uaill ann ad chliù.

³⁶ Beannaichte gu robh an Tighearna Dia Israeil gu saoghal nan saoghal. Agus thubhairt an sluagh uile, Amen, agus chliùthaich iad an Tighearna.

³⁷ Agus dh’fhàg e an sin fa chomhair àirc choicheangal an Tighearna, Asaph agus a bhràithrean, a fhrithealadh air beulaibh na h‑àirce an còmhnaidh, mar a dh’iarradh obair gach là:

³⁸ Agus Obed-edom, agus am bràithrean, ochd agus trì-fichead: Obed-edom mar an ceudna, mac Iedutuin, agus Hosah, nan dorsairean:

³⁹ Agus Sadoc an sagart, agus a bhràithrean na sagartan, fa chomhair pàillean an Tighearna, anns an àit àrd a bha ann an Gibeon,

⁴⁰ A dh’ìobradh ìobairtean-loisgte don Tighearna air altair na h‑ìobairt-loisgte a‑ghnàth, anns a’ mhadainn agus anns an fheasgar, agus a dhèanamh a rèir gach nì a tha sgrìobhte ann an lagh an Tighearna, a dh’àithn e do Israel:

⁴¹ Agus maille riùsan Heman agus Iedutun, agus a’ chuid eile a thaghadh, a ghairmeadh air an ainmean, a thoirt cliù don Tighearna, a chionn gu bheil a thròcair bithbhuan:

⁴² Eadhon maille riùsan Heman agus Iedutun le trompaidean, agus le ciombalan, a’ dèanamh fuaim, agus le innealan-ciùil Dhè: agus bha mic Iedutuin nan dorsairean.

⁴³ Agus dh’fhalbh an sluagh uile, gach duine da thaigh fhèin: agus thill Daibhidh a bheannachadh a thaighe fhèin.