1 Eachdraidh 13 - Am Bìoball Gàidhlig 1992

¹ Agus chuir Daibhidh a chomhairle riùsan a bha os cionn mhìltean agus cheud, ris gach uile cheannard.

² Agus thubhairt Daibhidh ri uile cho-chruinneachadh Israeil, Ma chìthear iomchaidh dhuibh, agus gur ann on Tighearna ar Dia a tha a’ chùis, cuireamaid fios a‑mach a dh’ionnsaigh ar bràithrean anns gach àite, a dh’fhàgadh ann an uile thìr Israeil, agus maille riùsan a dh’ionnsaigh nan sagart agus nan Lèbhitheach a tha nam bailtean lem fearann co‑roinn, iad gan cruinneachadh fhèin thugainn.

³ Agus thugamaid a‑rìs àirc ar Dè dar n‑ionnsaigh: oir cha d’fhiosraich sinn dheth ann an làithean Shauil.

⁴ Agus thubhairt an co‑chruinneachadh gu lèir gum bu chòir sin a dhèanamh; oir bha an nì ceart ann an sùilean an t‑sluaigh uile.

⁵ Uime sin chruinnich Daibhidh Israel uile an ceann a chèile, o Shihor na h‑Eiphit gu dol a‑steach Hamait, a‑chum àirc Dhè a thoirt o Chiriat-iearim.

⁶ Agus chaidh Daibhidh suas, agus Israel uile do Bhàalah, eadhon gu Ciriat-iearim a bhuineadh do Iùdah, a thabhairt leo as a sin àirc Dhè an Tighearna, a tha a chòmhnaidh eadar na ceruban, air an gairmear a ainm.

⁷ Agus ghiùlain iad àirc Dhè air feun nodha o thaigh Abinadaib, agus dh’iomain Usa agus Ahio am feun.

⁸ Agus chluich Daibhidh agus Israel uile am fianais Dhè len uile neart, eadhon le laoidhean, agus le clàrsaichean, agus le saltairean, agus le tiompanan, agus le ciombalan, agus le trompaidean.

⁹ Agus nuair a thàinig iad gu ùrlar-bualaidh Chidoin, chuir Usa a‑mach a làmh a ghabhail greim den àirc, oir chuir na daimh air chrith i.

¹⁰ Agus las fearg an Tighearna an aghaidh Usa, agus bhuail e e, a chionn gun do chuir e a làmh ris an àirc: agus dh’eug e an sin an làthair Dhè.

¹¹ Agus bha doilgheas air Daibhidh a chionn gun do rinn an Tighearna briseadh air Usa: agus thug e Peres-usa mar ainm air an àite sin gu ruig an là‑an‑diugh.

¹² Agus bha eagal air Daibhidh ro Dhia air an là sin, agus thubhairt e, Cionnas a bheir mise àirc Dhè dhachaigh am ionnsaigh?

¹³ Uime sin cha tug Daibhidh an àirc da ionnsaigh fhèin gu baile Dhaibhidh; ach thug e a lethtaobh i gu taigh Obed-edoim an Giteach.

¹⁴ Agus dh’fhan àirc Dhè maille ri teaghlach Obed-edoim na thaigh trì mìosan. Agus bheannaich an Tighearna taigh Obed-edoim, agus gach nì a bha aige.