1 Corintianach 3 - Am Bìoball Gàidhlig 1992

¹ Agus, a bhràithrean, chan fhaodainn-sa labhairt ribhse mar ri daoine spioradail, ach mar ri daoine feòlmhor, amhail ri naoidheanan ann an Crìosd.

² Bheathaich mi le bainne sibh, agus chan ann le biadh: oir fhathast cha b’urrainn sibh a ghabhail, agus a‑nis fhèin chan urrainn sibh.

³ Oir tha sibh fhathast feòlmhor: oir a‑thaobh gu bheil farmad nur measg, agus strì, agus aimhreit, nach eil sibh feòlmhor, agus ag imeachd mar dhaoine?

⁴ Oir nuair a tha neach ag ràdh, Is le Pòl mise; agus neach eile, Is le Apollos mise; nach eil sibh feòlmhor?

⁵ Cò e mas eadh Pòl, agus cò e Apollos, ach ministearan, tre an do chreid sibh, eadhon mar a thug an Tighearna do gach aon?

⁶ Shuidhich mise, dh’uisgich Apollos: ach is e Dia a thug am fàs.

⁷ Uime sin chan eil anns an tì a shuidhicheas no anns an tì a dh’uisgicheas, brìgh sam bith; ach ann an Dia a tha a’ toirt an fhàis.

⁸ An tì a shuidhicheas, agus an tì a dh’uisgicheas, is aon iad: agus gheibh gach aon a dhuais fhèin, a rèir a shaothair fhèin.

⁹ Oir is co‑luchd-obrach le Dia sinne: is sibhse treabhachas Dhè, is sibh aitreabh Dhè.

¹⁰ A rèir gràs Dhè a thugadh dhòmhsa mar fhear-togail aitreibh glic, leag mi am bunait, agus tha neach eile a’ togail air, ach thugadh gach neach an aire cionnas a thogas e air.

¹¹ Oir bunait eile chan urrainn duine sam bith a leagadh, ach am bunait a leagadh cheana, eadhon Iosa Crìosd.

¹² A‑nis ma thogas neach air a’ bhunait seo, òr, airgead, clachan luachmhor, fiodh, feur, connlach;

¹³ Nìthear obair gach aon duine follaiseach: oir nochdaidh an là i, do bhrìgh gum foillsichear i le teine; agus dearbhaidh an teine obair gach aoin, ciod as gnè dhi.

¹⁴ Ma dh’fhanas obair neach sam bith a thog e air, gheibh e duais.

¹⁵ Ma loisgear obair neach sam bith, fuilingidh e call: ach saorar e fhèin; gidheadh mar tre theine.

¹⁶ Nach eil fhios agaibh gur sibh teampall Dhè, agus gu bheil Spiorad Dhè na chòmhnaidh annaibh?

¹⁷ Ma thruailleas neach air bith teampall Dhè, sgriosaidh Dia an tì sin: oir tha teampall Dhè naomh, agus is sibhse e.

¹⁸ Na mealladh neach air bith e fhèin: ma shaoileas neach air bith nur measg e fhèin a bhith glic anns an t‑saoghal seo, biodh e na amadan, a‑chum gum bi e glic.

¹⁹ Oir is amaideachd aig Dia gliocas an t‑saoghail seo: oir tha e sgrìobhte, Glacaidh e na daoine glice nan innleachdan fhèin.

²⁰ Agus a‑rìs, Is aithne don Tighearna smuaintean nan daoine glice, gur dìomhain iad.

²¹ Uime sin na dèanadh neach air bith uaill à daoine: oir is leibhse na h‑uile nithean:

²² Mas e Pòl, no Apollos, no Cèphas, no an saoghal, no beatha, no bàs, no nithean a tha làthair, no nithean a tha ri teachd; is leibhse iad uile;

²³ Agus is le Crìosd sibhse; agus is le Dia Crìosd.