1 Corintianach 2 - Am Bìoball Gàidhlig 1992

¹ Agus nuair a thàinig mise dur n‑ionnsaigh-se, a bhràithrean, cha b’ann le òirdheirceas cainnte no gliocais a thàinig mi, a’ cur an cèill dhuibh teisteas Dhè:

² Oir chuir mi romham gun eòlas a ghabhail air nì sam bith nur measg, ach air Iosa Crìosd, agus esan air a cheusadh.

³ Agus bha mi nur measg ann an anfhainneachd agus ann an eagal, agus ann am mòr-chrith.

⁴ Agus cha robh m’fhacal agus mo shearmonachadh ann am briathran milis gliocas dhaoine, ach ann an làn-dearbhadh an Spioraid, agus a’ chumhachd:

⁵ A‑chum gum biodh ur creideamh-se chan ann an gliocas dhaoine, ach ann an cumhachd Dhè.

⁶ Gidheadh tha sinn a’ labhairt gliocais am measg nan daoine iomlan: ach chan e gliocas an t‑saoghail seo, no uachdaran an t‑saoghail seo, a thèid an neo-bhrìgh:

⁷ Ach tha sinn a’ labhairt gliocas Dhè ann an rùn-diamhair, an gliocas sin a bha falaichte, a dh’òrdaich Dia ron t‑saoghal a‑chum ar glòir-ne:

⁸ An gliocas nach b’aithne do aon neach de uachdarain an t‑saoghail seo: oir nam b’aithne dhaibh e, cha cheusadh iad Tighearna na glòire.

⁹ Ach a rèir mar a tha e sgrìobhte, Chan fhaca sùil, agus cha chuala cluas, agus cha tàinig ann an cridhe duine, na nithean a dh’ullaich Dia dhaibhsan aig a bheil gràdh dha.

¹⁰ Ach dh’fhoillsich Dia dhuinne iad le a Spiorad: oir tha an Spiorad a’ rannsachadh nan uile nithean, eadhon nithean domhain Dhè.

¹¹ Oir cò an duine don aithne nithean duine, ach do spiorad an duine a tha ann? Mar sin chan eil fhios aig neach sam bith air nithean Dhè, ach aig Spiorad Dhè.

¹² A‑nis fhuair sinne, chan e spiorad an t‑saoghail, ach an Spiorad a tha o Dhia; a‑chum gum biodh aithne againn air na nithean sin a thugadh dhuinn gu saor le Dia.

¹³ Nithean mar an ceudna a tha sinn a’ labhairt, chan ann am briathran a theagaisgeas gliocas dhaoine, ach am briathran a theagaisgeas an Spiorad Naomh; a’ coimeas nithean spioradail ri nithean spioradail.

¹⁴ Ach cha ghabh an duine nàdarra ri nithean Spiorad Dhè: oir is amaideachd leis iad; agus chan eil e an comas dha eòlas a ghabhail orra, do bhrìgh gur ann air mhodh spioradail a thuigear iad.

¹⁵ Ach bheir an duine spioradail breith air na h‑uile nithean, gidheadh chan eil e fhèin fo bhreith duine sam bith.

¹⁶ Oir cò dom b’aithne inntinn an Tighearna, agus a theagaisgeas e? Ach tha inntinn Chrìosd againne.