1 Corintianach 15 - Am Bìoball Gàidhlig 1992

¹ Os bàrr, a bhràithrean, tha mi a’ cur an cèill dhuibh an t‑soisgeil a shearmonaich mi dhuibh, ris an do ghabh sibhse mar an ceudna, agus anns a bheil sibh nur seasamh;

² Tro mar an ceudna a bheil sibh air ur tèarnadh, ma chumas sibh gu daingeann an nì a shearmonaich mi dhuibh, mura do chreid sibh gu dìomhain.

³ Oir thug mi dhuibh air tùs an nì a fhuair mi mar an ceudna, gun d’fhuair Crìosd bàs airson ar peacaidhean a rèir nan sgriobtar:

⁴ Agus gun d’adhlaiceadh e, agus gun d’èirich e a‑rìs air an treas là a rèir nan sgriobtar:

⁵ Agus gum facas e le Cèphas, na dhèidh sin leis an dà‑fhear-dheug.

⁶ Na dhèidh sin, chunnacas e le tuilleadh is còig ceud bràthair air aon àm; dem bheil a’ chuid as mò beò gus a‑nis, ach tha cuid dhiubh nan cadal.

⁷ Na dhèidh sin, chunnacas e le Seumas; agus a‑rìs leis na h‑abstoil uile.

⁸ Nan dèidh uile chunnacas leamsa e mar an ceudna, mar neach a rugadh ann an an‑àm.

⁹ Oir is mi as lugha de na h‑abstoil, neach nach fiù abstol a ghairm dhìom, do bhrìgh gu robh mi a’ geur-leanmhainn eaglais Dhè.

¹⁰ Ach tre ghràs Dhè is mi an nì as mi: agus cha robh a ghràs, a bhuilicheadh orm, gun bhrìgh; ach shaothraich mi nas pailte na iad uile; gidheadh cha mhise, ach gràs Dhè a bha maille rium.

¹¹ Uime sin cò air bith iad dhinn, mise no iadsan, is ann mar seo a tha sinne a’ searmonachadh, agus is ann mar seo a chreid sibhse.

¹² A‑nis ma shearmonaichear Crìosd, gun d’èirich e o na mairbh, cionnas a tha cuid nur measg-se ag ràdh nach eil aiseirigh nam marbh ann?

¹³ Ach mura eil aiseirigh nam marbh ann, cha mhò a dh’èirich Crìosd.

¹⁴ Agus mura d’èirich Crìosd, gu deimhinn is dìomhain ar searmoin-ne, agus is dìomhain ur creideamh-se mar an ceudna.

¹⁵ Seadh, fhuaireadh sinne nar fianaisean brèige air Dia; do bhrìgh gun do rinn sinn fianais a‑thaobh Dhè, gun do thog e suas Crìosd; neach nach do thog e suas, mura èirich na mairbh.

¹⁶ Oir mura èirich na mairbh, cha mhò a dh’èirich Crìosd:

¹⁷ Agus mura d’èirich Crìosd, tha ur creideamh-se dìomhain; tha sibh fhathast nur peacaidhean.

¹⁸ Mar sin mar an ceudna tha an dream a chaidil ann an Crìosd, caillte.

¹⁹ Mas anns a’ bheatha seo a‑mhàin a tha dòchas againn ann an Crìosd, is sinn as truaighe de na h‑uile dhaoine.

²⁰ Ach a‑nis tha Crìosd air èirigh o na mairbh, agus rinneadh dheth an ciad-thoradh dhiubhsan a chaidil.

²¹ Oir mar as ann tre dhuine a thàinig am bàs, is ann tre dhuine a thig aiseirigh nam marbh mar an ceudna.

²² Oir mar ann an Adhamh a tha na h‑uile a’ faghail a’ bhàis, is amhail sin mar an ceudna a nìthear na h‑uile beò ann an Crìosd.

²³ Ach gach uile dhuine na òrdagh fhèin: Crìosd an ciad-thoradh, na dhèidh sin iadsan as le Crìosd aig a theachd.

²⁴ An sin bidh a’ chrìoch dheireannach, nuair a bheir e suas an rìoghachd do Dhia, eadhon an t‑Athair; nuair a chuireas e as do gach uile uachdaranachd, agus gach uile ùghdarras, agus chumhachd.

²⁵ Oir is èiginn gun rìoghaich e gus an cuir e a naimhdean uile fo a chasan.

²⁶ Sgriosar an nàmhaid deireannach, am bàs.

²⁷ Oir chuir e na h‑uile nithean fo a chasan. Ach nuair a tha e ag ràdh gun do chuir e na h‑uile nithean fodha, is nì follaiseach gu bheil esan a chuir na h‑uile nithean fodha, an leth a‑muigh dheth seo.

²⁸ Agus nuair a chuirear na h‑uile nithean fodha, an sin bidh am Mac fhèin fon Tì a chuir na h‑uile nithean fodhasan, a‑chum gum bi Dia na uile anns na h‑uile.

²⁹ No ciod a nì iadsan a bhaistear airson nam marbh, mura èirich na mairbh air aon dòigh? Carson mas eadh a bhaistear iad airson nam marbh?

³⁰ Agus carson a tha sinne an gàbhadh gach uair?

³¹ Air ur gàirdeachas-se a tha agam ann an Iosa Crìosd ar Tighearna, tha mi a’ faghail a’ bhàis gach là.

³² Ma chòmhraig mi mar dhuine ri fiadh-bheathaichean ann an Ephesus, ciod i mo thairbhe, mura èirich na mairbh? Itheamaid agus òlamaid, oir a‑màireach gheibh sinn bàs.

³³ Na meallar sibh: truaillidh droch choluadar deagh bheusan.

³⁴ Dùisgibh a‑chum fìreantachd, agus na dèanaibh peacadh; oir chan eil eòlas Dhè aig cuid; a‑chum ur nàire tha mi a’ labhairt seo.

³⁵ Ach their neach-eigin, Cionnas a dh’èireas na mairbh? Agus ciod a’ ghnè cuirp leis an tig iad?

³⁶ Amadain, an nì sin a chuireas tu, cha bheothaichear e, mura bàsaich e air tùs:

³⁷ Agus an nì a chuireas tu, chan e an corp a bhios a tha thu a’ cur, ach gràinne lom, faodaidh e a bhith de chruithneachd, no de sheòrsa-eigin eile:

³⁸ Ach tha Dia a’ toirt cuirp dha mar a bu toil leis, agus do gach uile shìol a chorp fhèin.

³⁹ Chan aon fheòil gach uile fheòil: ach tha feòil air leth aig daoine, agus feòil eile aig ainmhidhean, feòil eile aig iasg, agus feòil eile aig eunlaith.

⁴⁰ Agus tha cuirp nèamhaidh ann, agus cuirp thalmhaidh: gidheadh tha glòir air leth aig na cuirp nèamhaidh, agus glòir eile aig na cuirp thalmhaidh.

⁴¹ Tha aon ghlòir aig a’ ghrèin, agus glòir eile aig a’ ghealaich, agus glòir eile aig na reultan; oir tha eadar-dhealachadh eadar reul agus reul a‑thaobh glòire.

⁴² Agus is ann mar sin a bhios aiseirigh nam marbh. Cuirear ann an truaillidheachd e; togar ann an neo-thruaillidheachd e:

⁴³ Cuirear e ann an eas-urram; togar ann an glòir e: cuirear ann an anfhainneachd e; èiridh e ann an cumhachd:

⁴⁴ Cuirear e na chorp nàdarra; èiridh e na chorp spioradail. Tha corp nàdarra ann, agus corp spioradail.

⁴⁵ Agus mar seo tha e sgrìobhte, Rinneadh an ciad dhuine Adhamh na anam beò, an t‑Adhamh deireannach na Spiorad a bheothaicheas.

⁴⁶ Gidheadh chan e an nì spioradail a bha ann air tùs, ach an nì nàdarra; agus na dhèidh sin an nì spioradail.

⁴⁷ An ciad duine on talamh, talmhaidh: an dara duine, an Tighearna o nèamh.

⁴⁸ Mar an duine talmhaidh, is amhail sin iadsan a tha talmhaidh: agus mar a tha an duine nèamhaidh, is ann mar sin iadsan a tha nèamhaidh.

⁴⁹ Agus mar a ghiùlain sinn ìomhaigh an duine thalmhaidh, giùlanaidh sinn mar an ceudna ìomhaigh an duine nèamhaidh.

⁵⁰ A‑nis seo tha mi ag ràdh, a bhràithrean, nach faodar le feòil agus fuil rìoghachd Dhè a shealbhachadh; cha mhò a shealbhaicheas truaillidheachd neo-thruaillidheachd.

⁵¹ Feuch, tha mi a’ labhairt nì diamhair ribh; cha chaidil sinn uile, ach caochlaidhear sinn uile,

⁵² Ann an tiota, ann am priobadh na sùla, ri guth na trompaid deireannaich (oir sèididh an trompaid), agus èiridh na mairbh neo-thruaillidh, agus caochlaidhear sinne.

⁵³ Oir is èiginn don chorp thruaillidh seo neo-thruaillidheachd a chur uime, agus don chorp bhàsmhor seo neo-bhàsmhorachd a chur uime.

⁵⁴ Agus nuair a chuireas an corp truaillidh seo neo-thruaillidheachd uime, agus a chuireas an corp bàsmhor seo neo-bhàsmhorachd uime, an sin coileanar am facal a tha sgrìobhte, Shluigeadh suas am bàs le buaidh.

⁵⁵ O bhàis, càit a bheil do ghath? O uaigh, càit a bheil do bhuaidh?

⁵⁶ Is e am peacadh gath a’ bhàis; agus is e neart a’ pheacaidh an lagh:

⁵⁷ Ach buidheachas do Dhia, a tha a’ toirt dhuinne na buadha, tre ar Tighearna Iosa Crìosd.

⁵⁸ Uime sin, mo bhràithrean gràdhach, bithibh-se daingeann, neo-ghluasadach, a’ sìor mheudachadh ann an obair an Tighearna, air dhuibh fios a bhith agaibh nach eil ur saothair dìomhain anns an Tighearna.