Титке 3 - Јаҥы Кереес

¹ Олорго эске алындырып, јамылуларга ла јаҥдарга баксын, сӧсуккур болзын, кандый ла јакшы керекке белен болзын деп,

² кемди де јамандабазын, арбанчак болбозын, ончо улуска јымжак ла быйанду болзын деп, айдып тур.

³ Бис те качан да сананбас, бакпас болгоныс, асканыс, јӱзӱн-базын кычалардыҥ ла соот-јыргалдыҥ кулдары болгоныс; ачынып ла кӱйӱнип јӱргенис, јаман кӧрдиргенис ле бой-бойысты база јаман кӧргӧнис.

⁴ Аргадаачыбыс Кудайдыҥ јакшызы ла кижизеги ачыларда,

⁵ Ол бисти акту керектерис учун эмес, је Бойыныҥ быйаныла аргадаган – бисти јунала ойто ак-јарыкка чыгарып, Агару Тынла јаҥырткан.

^6-7 Оныҥ јакшылыгыла акталып, бис иженип турган ӱргӱлји јӱрӱмди энчилензин деп, Оны биске Аргадаачыбыс Иисус Христос ажыра артыктай берген.

⁸ Бу чын сӧс. Ол керегинде сени алаҥзыбай айтсын деп, кӱӱнзеп турум. Кудайга бӱткен улус јакшы керектер эдерге јӱткӱзин. Мынызы улуска јакшы ла тузалу.

⁹ Је учур јок блааш-тартыштардаҥ, ук-тӧс керегинде куучындардаҥ, Јасак керегинде сӧс блааштардаҥ кыйыжып тур, олор туза јок ло сандыртту.

¹⁰ Бӧлиниш эдип турган кижини бир катап, экинчи катап санандырган соҥында, оноҥ јана бол.

¹¹ Андый кижи јолдоҥ астыккан, кинчек эдип, бойын бойы јаргылаган деп бил.

Адакы алкыш сӧстӧр

¹² Сеге Артемды эмезе Тихикти ийзем, меге Никопольго келерге кичеен, мен ондо кыштаар деп шӱӱдим.

¹³ Зинас-јасакчы ла Аполлосты јолго јакшы јазап шыйды, олордо ончо неме јеткил болзын.

¹⁴ Јӱрӱми туза јок болбозын деп, бистиҥ де улус јакшы керектер эдерге ӱрензин, керексип турган улуска болушсын.

¹⁵ Мениле кожо јӱрген ончо улус сеге эзен айдып турулар. Кудайга бӱдӱп, бисти сӱӱп турган ончо улуска эзен айт. Јакшылык ончогорло болзын. Аминь.