Римдегилерге 8 - Јаҥы Кереес

Тынла агарулалган јӱрӱм

¹ Анайдарда, Христос Иисусла кожо эт-канга эмес, Тынга башкартып јӱрген улусты јаргы бурулап болбос.

² Христос Иисус ажыра јӱрӱм берип турган Тынныҥ јасагы мени кинчектиҥ ле ӧлӱмниҥ јасагынаҥ јайымдаган.

³ Эт-каннаҥ улам кӱчин јылыйткан Јасактыҥ эдип болбогонын Кудай эткен. Ол кинчектӱ эт-каныбыстый эт-канду болгон Уулын кинчек учун тайылга эдип ийип, эт-кан эдип турган кинчекти бурулаган.

⁴ Эт-канга эмес, Тынга башкартып јӱрген бойыбыста Јасактыҥ чындык некелтелери бӱтсин деп, Кудайдыҥ мынайда эткени бу.

⁵ Эт-канга башкартып јӱрген улус эт-канныҥ кӱӱнин бӱдӱрейин деп, Тынга башкартып јӱрген улус Тынныҥ кӱӱнин бӱдӱрейин деп, сананып јадылар.

⁶ Санаагарда эт-кан башкарып турган болзо, – ол ӧлӱм, санаагарда Тын башкарып турган болзо, – ол јӱрӱм ле амыр,

⁷ нениҥ учун дезе эт-канныҥ кӱӱнин бӱдӱрейин деп умзанып јӱрген кижи Кудайла ӧштӧжӧт. Ол Кудайдыҥ Јасагына бакпайт, ого багып та болбойт.

⁸ Эт-канга башкартып јӱрген улус Кудайга јарабас.

⁹ Кудайдыҥ Тыны бойыгарда јӱрген болзо, слер эт-канга эмес, Тынга башкартып јӱрӱп јадыгар. Кемде Христостыҥ Тыны јок, ол Оныйы эмес.

¹⁰ Је Христос бойыгарда јӱрген болзо, эди-каныгар кинчектеҥ улам ӧлӱмтик, тын дезе акталганыгардаҥ улам јӱрӱп јат.

¹¹ Христосты тиргискен Кудайдыҥ Тыны бойыгарда јӱрген болзо, Оны тиргискен Кудай бойыгарда јӱрген Тыныла слердиҥ де ӧлӱмдӱ эди-каныгарды тындандырар.

¹² Анайдарда, карындаштар, бисте эт-кан алдында молју јок, бис ого башкартып јӱрбес учурлу.

¹³ Эт-канга башкартып јӱрзегер, ӧлӱп каларыгар, эт-канныҥ кинчектӱ керектерин Тынла ӧлтӱрзегер, тирӱ јӱреригер.

¹⁴ Кудайдыҥ Тынына башкартып јӱрген ончо улус Кудайдыҥ балдары болуп јадылар.

¹⁵ Слер ойто коркып јӱрбес учурлу, слер кулданыштыҥ тынын албадыгар, је слерди Кудайга балазынып турган Тынды алдыгар. Бу Тынла «Авва, Ада!» деп, кыйгырып јадыбыс.

¹⁶ Ол ок Тын бистиҥ тынла кожо бисти Кудайдыҥ балдары деп керелейт.

¹⁷ Балдары болзобыс, Кудайдыҥ берер болгонын аларыс. Мыны Христосло кожо аларыс. Оныла кожо шыралап турган болзобыс, Оныла кожо макталарыс.

Келер ӧйдӧги мак

¹⁸ Эмдиги шырабыс, бис алар макка кӧрӧ, неге де турбас деп бодоп турум.

¹⁹ Кудай Бойыныҥ балдарын макка кӧдӱрерин ончо јайалган неме энчикпей сакып јат ине.

²⁰ Кандый ла јайалган баштаҥы айалгазын бойыныҥ кӱӱниле эмес, Кудайдыҥ табыла јылыйткан.

²¹ Бойы да ӧлӱмниҥ кулданыжынаҥ јайымдалар деп, Кудайдыҥ балдарыныҥ јайымын ла магын ӱлежер деп, јайалган иженет.

²² Бис билерис, ончо јайалган эмдиге јетире кожо онтоп, кыйналып јат.

²³ Јаҥыс та јайалган эмес, је бис те, Тыннаҥ баштапкы ӱрендер алган бойлорыс, Кудай бисти качан балазынарын, эди-каныбысты јайым эдерин сакып, ичибисте онтоп јадыбыс.

²⁴ Бис иженип турганыста, аргадалганыс ол. Кӧрӱп турганыҥа иженип турган болзоҥ, ол ижемји эмес. Кӧрӱп турган немеге кем иженер?

²⁵ Је кӧрбӧй турган немеге иженгенисте, ол тушта чыдажып сакып јадыбыс.

²⁶ Анайда ок Тын да бисти, чине јок бойыбысты, тыҥыдат. Не деп, канайып мӱргийтенин бис билбезис. Је Тын Бойы сӧслӧ чыгара айдып болбос эттире улу тынып, бис учун јайнап јат.

²⁷ Кудай јӱректеристи шиҥдеп, Тынныҥ санаазын билер, нениҥ учун дезе Тын агарулар учун Кудайдыҥ табыла сурап јат.

²⁸ Бис билерис, Кудайды сӱӱп турган, Оныҥ табыла кычырылган улуска ончозы јакшыга иштеп јат.

²⁹ Оныҥ Уулы кӧп карындаштар ортодо тун туулганы болзын деп, Кудай озолодо билип алган улузын Бойыныҥ Уулыныҥ сӱр-кеберине тӱҥей болзын деп темдектеп койгон.

³⁰ Озолодо темдектеп койгон улусты кычырып алган; кычырып алган улусты актап койгон; актап койгон улусты макка кӧдӱрген.

Кудайдыҥ сӱӱжинеҥ кем де айрып болбос

³¹ База нени айдар? Кудай бис учун болзо, кем биске удура?

³² Ол Бойыныҥ Уулын килебей, ончобыс учун ӧлӱмге берип, Оныла кожо биске ончозын сыйлап бербес беди?

³³ Кудайдыҥ талдап алган улузын кем бурулап болор? Олорды Кудай актап јат.

³⁴ Кем јаргылап болор? Ӧлгӧн, оноҥ тирилген Христос Иисус Кудайдыҥ оҥ јанында јӱрӱп, бис учун сурап јат.

³⁵ Бисти Кудайдыҥ сӱӱжинеҥ кем айрып койор? Ачу-корон бо, эмезе кысталаҥ ба? Истежӱ бе, эмезе торо бо? Тӱреҥи бе, јеткер бе, эмезе кылыш па?

³⁶ Бичилген јок беди: «Сен учун бисти кажы ла кӱн ӧлтӱредилер. Бисти сойотон койлорго бодойдылар».

³⁷ Је мыны ончозын биске карузып турган Кудайдыҥ болужыла јеҥип јадыбыс.

³⁸ Ӧлӱм де, јӱрӱм де, ангелдер де, ӧрӧги јаҥдар да, эмди болуп турганы да, келер ӧйлӧрдӧ дӧ болотоны, кандый да ийде-кӱч,

³⁹ теҥеридези де, алыс јердези де, јайалганныҥ бирӱзи де бисти Христос Иисус Кайраканыстыҥ Бойындагы Кудайдыҥ сӱӱжинеҥ айрып болбос деп, мен бӱдӱп јадым.