Римдегилерге 5 - Јаҥы Кереес

Кудайла амыр

¹ Анайдарда, бӱдӱп турганысла акту бололо, Иисус Христос Кайраканыс ажыра Кудайла амыр јӱрӱп јадыбыс.

² Христос биске бӱдӱп турганыс ажыра јакшылыкка кирер арга берген. Бу јакшылыкта јӱрӱп, Кудайдыҥ магында туружарыска иженип турганысла мактанып јадыбыс.

³ Јаҥыс та мыныла эмес, је кыйын-шырала да мактанып јадыбыс, нениҥ учун дезе кыйын-шыра бисти чыдамкай эдип турганын билерис.

⁴ Чыдажып турганыста, Кудай бисти ченейт, ченелгени – ижемји берет.

⁵ Ижемји уйатка салбас, нениҥ учун дезе биске берилген Агару Тын ажыра сӱӱш јӱректериске урулат.

⁶ Христос темдектелген ӧйдӧ, чине јок тужыбыста Кудайга бӱтпес бис учун ӧлгӧн ине.

⁷ Акту кижи учун кем де ӧлӧт эмеш пе? Айса болзо, јакшы кижи учун кем де ӧлӧргӧ тидинер болор бо?

⁸ Је Кудай биске карузып турганын кинчектӱ тужыбыста Христос бис учун ӧлгӧни ажыра кӧргӱзет.

⁹ Оныҥ учун, анчада ла эмди, Оныҥ каныла акталган бойлорыс, Ол ажыра Кудайдыҥ чугулынаҥ аргадаларыс.

¹⁰ Ӧштӱлер болгон бойлорыс, Кудайла Оныҥ Уулыныҥ ӧлӱми ажыра јарашкан болзобыс, анчада ла эмди, Оныла јарашкан соҥында, Оныҥ Уулыныҥ јӱрӱми ажыра аргадаларыс.

¹¹ Јаҥыс та бу эмес, је Иисус Христос Кайраканыс ажыра Кудайдыйы болгонысла мактанып јадыбыс. Ол бисти Кудайла јараштырган.

Адам ла Христос

¹² Кинчек телекейге бир кижи ажыра келген, кинчек ажыра ӧлӱм келген. Анайып ончо улус ӧлӱмдӱ боло берген, нениҥ учун дезе ончозы кинчек эткен.

¹³ Кинчек телекейде Јасактаҥ озо до болгон. Је Јасак јок тушта кинчек тоого алылбайт.

¹⁴ Ӧлӱм дезе баштапкы кижи Адамнаҥ ала Моисейге јетире бийлеген. Ол Кудайдыҥ јакылтазын бускан Адам чылап кинчек этпеген улусты да бийлеген. Адам – эмди болотонныҥ теми.

¹⁵ Је кижиниҥ јазык эткенин Кудайдыҥ сыйына тӱҥейлеерге јарабас. Бир кижиниҥ јазыгынаҥ улам кӧп улус ӧлгӧн болзо, анчада ла Кудайдыҥ јакшылыгы ла сыйы бир Кижиниҥ – Иисус Христостыҥ јакшылыгы ажыра кӧп улуска артыктай берилет.

¹⁶ Кудайдаҥ сый нени эдип турганын, бир јазык нени эдип турганын тӱҥейлеерге јарабас. Бир кижиниҥ јазыгы учун бурулаарга јаргы болгон, Кудайдаҥ сый кӧп јазыктардаҥ улусты акту эдерге берилген.

¹⁷ Бир кижи эткен јазыктаҥ улам ӧлӱм бир кижи ажыра бийлеген. Анчада ла бир Кижи – Иисус Христос ажыра Кудайдыҥ јакшылыгыныҥ байлыгын ла акталарга сый алып, тегинге акталып турган улус јӱрӱмде бийлеер.

¹⁸ Оныҥ учун бир кижиниҥ јазыгы ончо улуска јаргы экелгени чилеп, бир Кижиниҥ акту кереги ончо улусты актап, олорго јӱрӱм берет.

¹⁹ Бир кижиниҥ уккур эмези кӧп улусты кинчектӱ эткени чилеп, бир Кижиниҥ уккур болгоны кӧп улусты акту эдер.

^20-21 Јасак келерде, јазык кӧптӧй берген. Кинчек бойыла кожо ӧлӱм экелип, бийлей бергени чилеп, Кудайдыҥ да јакшылыгы Иисус Христос Кайраканыс ажыра бисти акту эдет. Кинчек кӧптӧй берерде, ӱргӱлји јӱрӱм берерге бийлезин деп, јакшылык там кӧптӧгӧн.