Римдегилерге 3 - Јаҥы Кереес

Кудай чындык, кижи – тӧгӱнчи

¹ Анайдарда, иудей болорыныҥ артыгы незинде, ол эмезе томдоштоҥ кандый туза бар?

² Ончо јанынаҥ артык. Элдеҥ озо неде дезе, олорго Кудайдыҥ сӧзи бӱдӱмјилелген.

³ Олордыҥ кезиги чындык эмес болзо, не? Мынызы Кудайдыҥ чындыгын јоголтып болор бо?

⁴ Јок туру! Кудай чындык, кандый ла кижи – тӧгӱнчи, бичилгениле: «Ончо сӧстӧриҥде Сен акту болорыҥ, јаргылазаҥ, јеҥип аларыҥ».

⁵ Је чын эмес эдип турганыс Кудайдыҥ чынын иле эдип турган болзо, не деерибис? Ол биске чугулын ийип, чын эмес эдип турган болор бо? (Мыны улустыҥ шӱӱгени чилеп айдадым.)

⁶ Јок туру! Ол чындык эмес болзо, бу телекейдиҥ улузын канайып јаргылайтан?

⁷ Је мениҥ меке-тӧгӱним Кудайдыҥ чындыгын там иле эдип, Ого мак экелип турган болзо, мени кинчектӱни чилеп не учун јаргылайтан?

⁸ Айса, јакшы боло берзин деп, јаманды эдерис пе? Анайда бисти кезик улус јамандап, бого ӱредип јадыгар деп бурулайдылар. Андый улус јаргыга турары јолду.

⁹ Анайдарда, не деерибис? Бис ӧскӧлӧринеҥ артык айалгада ба? Эмеш те эмес. Иудейлерди де, еллиндерди де, ончозын кинчек бийлеп јат деп кӧргӱскенибис,

¹⁰ бичилгениле: «Бир де акту кижи јок, бир де.

¹¹ Аайлап турган кижи јок, кем де Кудайды бедиребейт.

¹² Ончозы јолдоҥ аскан, ончозы эш-немеге јарабас. Кем де јакшыны этпейт, кем де, бир де кижи.

¹³ Олордыҥ сӧстӧри ӧлӱм ле чириш экелет. Тилдериле тӧгӱндеп јадылар, эриндеринде – јыланныҥ короны.

¹⁴ Оосторы ачу сӧстӧрлӧ, каргышла толо.

¹⁵ Буттары кан тӧгӧргӧ јылгыр.

¹⁶ Јолдорында бускалаҥ ла кату-јобол артырып јадылар.

¹⁷ Амырдыҥ јолдорын билгилебес.

¹⁸ Кудайдаҥ айабай јадылар».

¹⁹ Јасак ого багып турган улуска айдып турганын бис билерис. Анайып айдар неме табылбай, бастыра телекейдиҥ улузы Кудайдыҥ алдында бурулу боло берет.

²⁰ Јасактыҥ некеп турганын эткениле Кудайдыҥ алдында кем де актанып болбос. Јасак ажыра кинчек ачылат ине.

Јасакла эмес, Кудайга бӱткенисле аргадаларыс

²¹ Је эмди Јасактаҥ камаан јокко акту болор јолды Кудай улуска кӧргӱзип берген. Ол керегинде Јасак ла јарлыкчылар керелейт.

²² Кудай дезе Иисус Христоско бӱткени ажыра бӱдӱп турган ончо улусты Бойыныҥ алдында акту эдет. Мында башказы јок,

²³ нениҥ учун дезе, ончо улус кинчек эдип, Кудайдыҥ магын керексинип јадылар.

²⁴ Ончозы Кудайдыҥ јакшылыгыла тегинге акталадылар, нениҥ учун дезе олорды Иисус Христос јайымга садып алган.

²⁵ Улус Ого бӱткени ажыра Оныҥ каныныҥ шылтузында кинчектери ташталып, быйан алзын деп, Кудай Оны тайылгага учурлаган. Бойыныҥ чындыгын кӧргӱзерге, Оныҥ анайда эткени ол. Башкыда эдилген кинчектерге ајару этпей,

²⁶ эмдиги де ӧйдӧ Бойыныҥ чындыгын кӧргӱзерге, чындык болорго ло Иисуска бӱдӱп турган улусты акту эдерге, Ол чыдашкан.

²⁷ Анайдарда, мактанар немебис кайда? Јоголтылып калган. Јасакты бӱдӱргени ажыра ба? Эткен керектер ажыра ба? Јок, Кудайга бӱткени ажыра.

²⁸ Кижи Јасакты бӱдӱретенинеҥ камаан јокко, Кудайга бӱткениле акталат деп бодоп јадыбыс ине.

²⁹ Кудай јаҥыс иудейлердийи бе? Ол ӧскӧ дӧ калыктардыйы эмес пе? Эйе, Ол ӧскӧ дӧ калыктардыйы.

³⁰ Кудай јаҥыс эмей. Ол бӱдӱп турган учун томдолгон до кижини, бӱдӱп турган болзо, томдолбогон до кижини актаар.

³¹ Анайдарда, бӱдӱп турган болзобыс, Јасакты јоголтып турганыс ол бо? Јок туру! Карын, Јасакты јӧптӧп јадыбыс.