Римдегилерге 16 - Јаҥы Кереес

Эзен айттырыштар

¹ Слерди Фивала таныштырып турум. Ол бистиҥ эјебис, Кенхреадагы серкпениҥ болушчызы.

² Оны агарулар чылап, Кайраканныҥ улузы чылап уткып, не-немедеҥ тутакту болзо, болужыгар. Ол бойы кӧп улуска, меге де болушкан.

³ Прискиллага ла Акилага эзен айдыгар. Олор мениле кожо Иисус Христоско иштеп јӱрген улус.

⁴ Олордыҥ јӱрӱми мен учун јеткердиҥ алдында болгон. Олорго јаҥыс та мен эмезим, је ӧскӧ калыктардыҥ ончо серкпелери быйанду.

⁵ Анайда ок олордыҥ айлындагы серкпеге эзен айдыгар. Сӱӱген Епенет карындажыма эзен айдыгар. Ол Ахаияда Христоско бӱткен баштапкы кижи болор.

⁶ Мариамга эзен айдыгар. Ол биске кӧп иштеген.

⁷ Угы јаҥыс Андроникке ле Юнияга эзен айдыгар. Бу улус мениле кожо кижендӱ болгондор. Олор апостолдор ортодо јарлу улус, менеҥ озо Христостыйы боло бергендер.

⁸ Кайраканныҥ Бойында сӱӱген Амплий карындажыма эзен айдыгар.

⁹ Бисле кожо Христоско иштеп јӱрген Урбанга, база сӱӱген Стахий карындажыма эзен айдыгар.

¹⁰ Христоско чындык болгоны ченелген Апеллеске эзен айдыгар. Аристовулдыҥ айылдагы улузына эзен айдыгар.

¹¹ Угы јаҥыс Иродионго эзен айдыгар. Наркисстиҥ айлындагы улузынаҥ Кайракандыйы болгондорго эзен айдыгар.

¹² Трифенага ла Трифосага эзен айдыгар. Бу ӱй улус Кайраканга кӧп иштеген. Сӱӱген Персида эјебиске эзен айдыгар. Ол база Кайраканга кӧп иштеген.

¹³ Кайракан талдап алган Руфка, база мениҥ де энейим боло берген оныҥ энейине эзен айдыгар.

¹⁴ Асинкритке, Флегонтко, Ермга, Патровко, Ермийге ле олорло кожо јӱрген ӧскӧ дӧ карындаштарга эзен айдыгар.

¹⁵ Филологко, Юлияга, Нирейге ле оныҥ эјезине, Олимпанга ла олорло кожо јӱрген ончо агаруларга эзен айдыгар.

¹⁶ Бой-бойыгарла агару окшошло эзендежигер. Слерге Христостыҥ ончо серкпелери эзен айдып турулар.

¹⁷ Слерди сурап турум, карындаштар: слер алган ӱредӱге удурлажып, слерди бӧлип, бӱдеринде буудак эдип турган улустаҥ чеберленигер, олордоҥ кыйыжыгар.

¹⁸ Андый улус Иисус Христос Кайраканыска эмес, боро кардына болуп иштеп јадылар. Олор тату, јараш сӧстӧр айдып, сӱмеленип билбес улусты астырадылар.

¹⁹ Кайраканга уккур болгоныгарды ончо улус билер. Оныҥ учун слер учун сӱӱнип турум. Је јакшы керектерге ойгор болыгар, јаман керектерге ару болыгар деп кӱӱнзейдим.

²⁰ Амырдыҥ Кудайы саадабай будыгардыҥ алдына сатананы јыга бассын. Иисус Христос Кайраканыстыҥ јакшылыгы слерле кожо болзын! Аминь.

²¹ Слерге мениле кожо иштеп јӱрген Тимофей, угы јаҥыс Луций, Иасон ло Сосипатр эзен айдып турулар.

²² Бу самараны бичип алган мен де, Тертий, слерле Кайракан ажыра бирлик бойым, слерге эзен айдып турум.

²³ Слерге Гаий эзен айдып туру. Ол мени ле ончо серкпени бойыныҥ айлында уткыган кижи болор. Слерге каланыҥ керектерин башкарып турган Ераст ла Кварт карындаш эзен айдып турулар.

²⁴ Иисус Христос Кайраканыстыҥ јакшылыгы слерле кожо болгой. Аминь.