Римдегилерге 14 - Јаҥы Кереес

Бой-бойыгарды јаргылабагар

¹ Кудайга бӱдеринде чинези јетпей турган кижини бойыгарга јуудып алыгар, кӧрӱм-шӱӱлтези керегинде оныла сӧс блаашпагар.

² Кезик кижи ончозын јиирге јараар деп бӱдет, чине јогы јаҥыс маала-ажын јийт.

³ Јип турганы, јибей турганды јаман кӧрбӧзин. Јибей турганы, јип турганды јаргылабазын, нениҥ учун дезе оны Кудай јуудып алган.

⁴ Ӧскӧ кижиниҥ кулын јаргылайтан сен кем андый? Ол бойыныҥ Кайраканы алдында турат, эмезе јыгылат. Јыгылза, тургузылар, нениҥ учун дезе Кудайда оны ойто тургузар кӱч бар.

⁵ Кезик кижи бир кӱнди арткан кӱндердеҥ аҥылу деп бодойт. Ӧскӧ кижиге ончо кӱндер тӱҥей. Кажы ла кижи ого бойыныҥ санаазы билип турганыла этсин.

⁶ Кӱндерди аҥылап турган кижи Кайраканга болуп аҥылайт, кӱндерди аҥылабай турганы Кайраканга болуп аҥылабайт. Курсак јип турган кижи Кайраканга болуп јийт, нениҥ учун дезе Кудайга алкыш-быйанын айдат. Курсак јибей турган кижи Кайраканга болуп јибей, Кудайга алкыш-быйанын айдат.

⁷ Кемибис те бойына болуп јӱрбейт, кемибис те бойына болуп ӧлбӧйт ине.

⁸ Јӱрген болзобыс, Кайраканга болуп јӱрӱп јадыбыс. Ӧлӱп јаткан болзобыс, Кайраканга болуп ӧлӱп јадыбыс. Анайдарда, јӱргенис пе, ӧлӱп јатканыс па, – бис Кайракандыйы.

⁹ Оныҥ учун ӧлгӧн дӧ, тирӱ де улусты бийлеерге, Христостыҥ ӧлгӧни де, тирилгени де, тынданганы да ол.

¹⁰ Сен дезе карындажыҥды не јаргылайдыҥ? Эмезе сен? Карындажыҥды не јаман кӧрӱп јадыҥ? Ончобыс Христостыҥ јаргызы алдына турарыбыс.

¹¹ Бичилген јок беди: «Мен бар, – деп, Кайракан айдат, – Мениҥ алдыма кажызы ла тизеленер, кажы ла тил Мени Кудай деп, ачыгынча айдар».

¹² Анайдарда, кажыбыс ла бойы учун Кудайдыҥ алдына каруу берер.

¹³ Оныҥ учун бойы бойыбысты јаргылабайлы. Карын, карындажыска бӱдӱрилер эмезе јыгылар шылтак болбойлы деп сананыгар.

¹⁴ Мен билерим, меге Иисус Кайракан бӱдӱмји берип јат: ончо неме бойы алдынаҥ ару эмес болбой јат. Је кандый бир немени ару эмес деп бодогон кижиге ол ару эмес.

¹⁵ Кандый бир курсакты јип, мынызыла карындажыҥды ӧӧркӧдип турган болзоҥ, сен сӱӱштиҥ айтканыла этпей јадыҥ. Анайып курсагыҥла карындажыҥа јаман эдип јадыҥ, Христос бу карындажыҥ учун база ӧлгӧн ине.

¹⁶ Јакшы деп бодогоноорды кижи јамандабазын.

¹⁷ Кудайдыҥ Каандыгы ол ичип-јийтени эмес ине. Је ол – Агару Тын ажыра берилип турган чындык, амыр ла сӱӱнчи.

¹⁸ Христоско мынайда јалчы болуп турган кижи Кудайга јарап јат, оны улус јарадып јат.

¹⁹ Анайдарда, биске амырды экелип, бой-бойыбысты тыҥыдып турганга јӱткӱйли.

²⁰ Кудайдыҥ эдип турганын курсакка болуп буспа. Ончо курсак ару. Је ӧскӧ кижини бӱдӱрилтип јип турган кижиге – јаман.

²¹ Карындажыҥды бӱдӱрилтип, эмезе јилбиркедип, эмезе кинчекке кийдирип турган болзо, эт јибезеҥ, аракы ичпезеҥ, ӧскӧзин де этпезеҥ – торт.

²² Бӱдӱп турган болзоҥ, бойыҥда бойыҥ Кудайдыҥ алдында бӱт. Чынга бодогонын эдип, бу учун бойын јаргылабай турган кижи кежиктӱ болгоны ол.

²³ Эреҥистелип, је курсакты јип турган кижи јаргылайт, нениҥ учун дезе ол мыны бӱтпей эдет. Бӱтпей эдип турган ончо неме – ол кинчек.

²⁴ Кудайды алкайлы! Сӱӱнчилӱ Јарым ажыра, Иисус Христостыҥ Јары ажыра чактарда јажырылган јажытты ачып, Ол слерди тыҥыдар аргалу.

²⁵ Је эмди ончо калыктар Кудайга багып, бӱтсин деп, бу јажыт јарлыкчылардыҥ бичиктери ажыра ӱргӱлји Кудайдыҥ јакарганыла ачылган.

²⁶ Ого, сок јаҥыс ойгор Кудайга, Иисус Христос ажыра ӱргӱлји чакка мак! Аминь.