Римдегилерге 13 - Јаҥы Кереес

Јаҥга багары

¹ Кажы ла кижи јаҥдуга баксын, нениҥ учун дезе Кудай тургуспаган јаҥ јок. Бар јаҥдарды ончозын Кудай тургускан.

² Оныҥ учун јаҥга удурлашкан кижи Кудайдыҥ тургусканына удурлажып јат. Удурлажып турганы, бойлорын јаргыга тӱжӱрет.

³ Јакшыны эдип јӱрген улус эмес, јаманды эдип јӱрген улус јаҥдулардаҥ коркыыр учурлу. Јаҥнаҥ коркыбайын деп турган болзоҥ, јакшыны эт, ол сени мактаар.

⁴ Јаҥда отурган кижи Кудайдыҥ јалчызы ине, ол сеге јакшыны эдерге иштеп јат. Јаманды эдип јӱрген болзоҥ, коркы: ол кылышты тегин алып јӱрбей јат. Ол Кудайдыҥ јалчызы, јаманды эдип јӱрген улусты јаргылайт.

⁵ Оныҥ учун јаҥ берилгенге багар керек, јаҥыс та кезедӱ аларым деп коркыыр эмес, је јӱрек айдып турганыла багар керек.

⁶ Мыныҥ учун калан да тӧлӧйдигер. Олор Кудайга јалчы болуп, јаантайын молјулу керегин бӱдӱрет.

⁷ Кажызына ла нени беретен, оны беригер: кемге калан, – ого калан, кемге албан, – ого албан, кемнеҥ коркыйтан, коркыгар, кемге кӱндӱ эдетен, эдигер.

Сӱӱш – ол Јасакты бӱдӱрери

⁸ Кемге де, нени де тӧлӱлӱ болбогор. Сок јаҥыс тӧлӱгер – ол бой-бойыгарды сӱӱйтен тӧлӱ болзын, нениҥ учун дезе ӧскӧ кижини сӱӱп турганы – Јасакты бӱдӱрген.

⁹ Јакылталар: чайдам кылынба, ӧлтӱрбе, ууры этпе, тӧгӱндеп керелебе, ӧскӧ кижинийин кӱӱнзебе – булар ла ӧскӧлӧри де бу сӧстӧрдӧ салынган ине: «Бойыҥды бойыҥ сӱӱгеҥдий, јуугыҥды сӱӱп јӱр».

¹⁰ Сӱӱп турган кижи јуук кижизине јаманды этпес. Оныҥ учун сӱӱри – ол Јасакты бӱдӱрери.

¹¹ Анайда эдигер, нениҥ учун дезе слер эмдиги ӧйди билеригер: биске уйкудаҥ ойгонор ӧй келген. Бис Кудайга бӱткен тужыска кӧрӧ эмди аргадалатан кӱнибис јуук.

¹² Тӱн ӧдӱп калды, тӱш јууктап келди. Анайдарда, караҥуйдыҥ керектерин таштап, јарыктыҥ мылтык-јепселин кийели.

¹³ Бойыбысты тӱштиҥ јарыгында чылап тудуналы: јыргабайлы, аракыдабайлы, балыр, кал кылык кылынбайлы, ӧӧркӧшпӧйли, кӱйӱнбейли.

¹⁴ Куйагаар Иисус Христос Кайракан болзын. Эт-канды кичееп, оныҥ кычазын бӱдӱрбегер.