Римдегилерге 12 - Јаҥы Кереес

Кудайга учурлалган јӱрӱм

¹ Анайдарда, карындаштар, Кудайдыҥ буурзаганына болуп јайнап турум: Кудайга јараар агару ла тирӱ тайылганы чылап, эди-каныгарды Ого беригер. Ого анайып бажырганыгар чын болор.

² Бу телекейге эптешпегер, је санаагарды јаҥыртып, бойыгарды солыгар. Анайып, Кудай слердеҥ нени кӱӱнзеп турганын, не Ого јакшы, не јарап турганын, Оныҥ толо кеми не болгонын билип аларыгар.

³ Меге берилген јакшылыкла кажыгарга ла айдып турум: бойыгар кандый болгоныгардаҥ бийик сананбагар. Карын, кажыгарга ла Кудайдаҥ бӱдери канча кире берилгениле кеминде сананыгар.

⁴ Бистиҥ бир эт-каныбыста кӧп ӱйелер бар, је олор ончозы бир тӱҥей керек этпей јат.

⁵ Анайып бис те: бис кӧп тӧ болзобыс, Христостыҥ Бойында – бир эт-кан, је бойы бойыбыска ӱйелер болуп јадыбыс.

⁶ Кудай Бойыныҥ јакшылыгыла биске башка-башка јайалталар берген. Кемге Кудайдыҥ сӧзин айдары берилген, бӱдери канча кире берилгениле айтсын.

⁷ Кемге карындаштарга болужары берилген, болушсын. Кемге ӱредери берилген, ӱретсин.

⁸ Кемге кӧкӱдери берилген, кӧкӱтсин. Кемге ӱлежер јайалта берилген, ачык-јарык ӱлешсин. Кемге јаҥ берилген, кичеенип башкарзын. Кемге быйан эдери берилген, мыны јакшы кӱӱн-санаалу этсин.

⁹ Сӱӱжигер ару болзын. Јаманды кӧрӧр кӱӱнигер јок болзын, јакшыдаҥ тудуныгар.

¹⁰ Бой-бойыгарга карындаштар чылап эрке карузыгар, бой-бойыгарга кӱндӱ эдеринде баштапкы болыгар.

¹¹ Мында јаантайын кичееҥкей болыгар, тынла јалбыштаныгар, Кайраканга јалчы болуп јӱригер.

¹² Ижемји слерге сӱӱнчи экелзин. Ачу-корондо чыдамкай болыгар, јаантайын мӱргигер.

¹³ Кудайдыҥ улузы не-немедеҥ тутакту јӱрзе, ӱлежигер, кӱндӱзек болыгар.

¹⁴ Слерди истеечилерди алкагар. Алкагар, каргабагар.

¹⁵ Сӱӱнип јӱргендерле кожо сӱӱнигер, ыйлап јӱргендерле кожо ыйлагар.

¹⁶ Бой-бойыгарга санаагар јаҥыс болзын, улуркабагар, је јобожыган улуска тартылыгар, бойыгарды бийиксинбегер.

¹⁷ Кемге де јаман учун јаман этпегер. Ончо улус алдында јакшыны эдерге кичеенигер.

¹⁸ Аргалу болзогор, ончо улусла амыр јӱригер.

¹⁹ Бойыгар учун ӧчӱркебегер, кару улузым, Кудайдыҥ чугулына јер беригер. Бичилген јок беди: «Мен ӧч аларым, Мен јандыра берерим» – деп, Кайракан айдат.

²⁰ Карын, ӧштӱӱҥ аштап турган болзо, азыра, суузап турган болзо, суу ичир. Мынайда эдип, оныҥ бажына кос јуурыҥ.

²¹ Јаманга јеҥдирбе, је јаманды јакшыла јеҥ.