Римдегилерге 11 - Јаҥы Кереес

Кудай Бойыныҥ калыгын јектебеген

¹ Анайдарда, сурап турум: Кудай Бойыныҥ калыгын јектеп койды эмеш пе? Јок туру! Мен бойым да Израильдиҥ кижизи, Авраам калдыгы, Вениамин угынаҥ болорым.

² Озолодо билер болгон калыгын Кудай јектебеген. Ол эмезе Илия Кудайга баштанып, Израильге комыдап турарда, Агару Бичик не деп айдып турганын билбезигер бе? –

³ «Кайракан! Јарлыкчыларыҥды ӧлтӱрдилер, тагылдарыҥды јемирдилер; мен јаҥыскан арттым, мениҥ де тынымды бедиреп јадылар».

⁴ Кудай ого нени ачкан? – «Ваалдыҥ алдына тизеленбеген јети муҥ эрди Бойыма чеберлеп алдым».

⁵ Анайып эмди де, Кудай Бойыныҥ јакшылыгыла талдап алган арткан-калганы чеберлелген.

⁶ Олор јакшылыкла талдалган болзо, эткен керектериле талдалбаган. Оноҥ башка, јакшылык чын эмес болор эди. Эткен керектериле талдалган болзо, ол јакшылык эмес; оноҥ башка, эткен керек ол керек эмес.

⁷ Айдарда, не? Израиль нени бедиреген, ого јединбеген. Јӱк талдалган улус ого јединген, арткан улус – катуланган.

⁸ Бичилгениле: «Кудай санааларын ӧчӧмиктеп, јӱректерин мокорткон. Бу да кӱнге јетире кӧстӧри кӧрбӧй јат, кулактары укпай јат».

⁹ Давид те айдат: «Тойлоп-јыргаганы олорго тузак, чакпыдагы јем болзын, бу учун олор јыгылзын, кезедӱ алзын;

¹⁰ кӧрбӧскӧ, кӧстӧри карачкыланзын, арка-белдери ӱргӱлјиге бӱгӱлип калзын».

¹¹ Анайдарда, сурап турум: олор чек јыгыларга, бӱдӱрилди эмеш пе? Јок туру! Ол ажыра Израильдиҥ ичи кӱйзин деп, олордыҥ јыгылганы ӧскӧ калыктарга аргадаш экелген.

¹² Олордыҥ јыгылганы телекейге байлык экелип, олордыҥ тӱрегени калыктарга байлык экелип турган болзо, анчада ла орныкканы оноҥ кӧп байлык экелер.

¹³ Слерге, ӧскӧ калыктарга, айдадым: Кудай мени ӧскӧ калыктарга ийгени учун, Ол макталзын деп, бастыра кӱчимди саларым.

¹⁴ Айса болзо, каны јаҥыс карындаштарымды кӱнӱркедип, кезигин аргадап болорым.

¹⁵ Олордыҥ јектелгени бу телекейдиҥ улузын Кудайла јараштырган болзо, Кудай јаратса, не болор? Ӧлгӧндӧргӧ јӱрӱм болор.

¹⁶ Калаштыҥ баштапкы бӧлӱги агару болзо, ончо калаш агару; тазыл агару болзо, будактары да агару.

¹⁷ Май-агаштыҥ кезик будактары сынып калган. Сен, јерлик май-агаштыҥ корбозы, олордыҥ ордына кондырылгаҥ. Сен тазылла бирлик боло берип, май-агаштыҥ јулугыла азыранып јадыҥ.

¹⁸ Айдарда, бу будактар алдында мактанба. Сенде мактанар шылтак јок, нениҥ учун дезе тазылдаҥ сен тудунып јадыҥ, тазыл сенеҥ тудунып турган эмес.

¹⁹ Сен айдарыҥ: «Мени кондырылзын деп, будактар сындырылган».

²⁰ Јакшы. Олор бӱтпеген учун сындырылган, сен бӱдӱп турганыҥ учун јӱрӱп јадыҥ. Анайдарда, оморкобо, је коркып јӱр.

²¹ Кудай агашта ӧскӧн будактарга килебеген болзо, сеге килеер деп сананып туруҥ ба?

²² Анайдарда, Кудай јакшы ла кату болгонын кӧрӱп јадыҥ. Ол сынып калганга кату, је сеге јакшы. Оныҥ јакшызында јӱрӱп турган болзоҥ, Ол сеге јакшы. Оноҥ башка, сен де кезе чабыларыҥ.

²³ Је байагы да улус бӱде берзе, кондырылар, олорды ойто кондырар кӱч Кудайда бар.

²⁴ Сен ар-бӱткенинче јерлик май-агаштаҥ кезе чабылып, јакшы май-агашка ар-бӱткенге удура кондырылган болзоҥ, анчада ла тӧрӧл будактарга бойыныҥ агажына кондырыларга јеҥил болор.

²⁵ Бойыгар керегинде бийик сананбагар деп, бу јажытты билип алыгар деп турум, карындаштар: ӧскӧ калыктардыҥ Кудай темдектеп койгон тоозы Ого келбегенче, Израильдиҥ улузы кезек ӧйгӧ катуланган.

²⁶ Анайдарда, бастыра Израиль аргадалар, бичилгениле: «Сионноҥ Јайымдаачы келип, Иаковтоҥ кинчекти ырадар.

²⁷ Кинчектерин чечсем, олорго бу Мениҥ кереезим болор».

²⁸ Олор Сӱӱнчилӱ Јарды алынбай, слерге болуп Кудайдыҥ ӧштӱлери болуп јадылар, је олор Кудайдыҥ талдап алган калыгы болуп артып јадылар, нениҥ учун дезе олорды Кудай улу адаларга болуп сӱӱп јат.

²⁹ Ол Бойына кычырып алган улус керегинде шӱӱлтезин кубултпай јат, олорго берген сыйларын кайра албай јат.

³⁰ Слер де качан да Кудайга уккур эмес болгоныгар, је эмди, олордыҥ уккур эмезинеҥ улам, Ол слерге быйан эткен.

³¹ Кудай слерге быйан эткени чилеп, бойлорына да быйан этсин деп, эмди олор до уккур эмес.

³² Ончо улуска быйан эдерге, ончозын Кудай уккур эместиҥ олјозына алган.

³³ Э-э, Кудайдыҥ байлыгы кандый улу, ойгоры ла билими кандый тереҥ! Оныҥ шӱӱлтелерин шиҥдеер, Оныҥ јолдорын аайлаар арга јок.

³⁴ Кайраканныҥ санаазын кем билип алган? Ого кем јӧп айдып берген?

³⁵ Кайра јандырзын деп, Ого кем нени-нени берген бе?

³⁶ Ончозын Ол јайаган ине, ончозы Оныҥ шылтузында ла Ого болуп јӱрет. Ого ӱргӱлји чакка мак. Аминь.